ވަކި ސަބަބެއް ނާާންގާ ރައީސް މުޢިއްޒުގެ ނޫސްވެރިންގެ ބައްދަލުވުން ކެންސަލް ކޮށްފި

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ހޯމަ ދުވަހު ބާއްވަވަން އޮތް ނޫސްވެރިންގެ ބައްދަލުވުން، ވަކި ސަބަބެއް އެންގުމެއް ނެތި ކެންސަލް ކޮށްފި އެވެ.

ކޮންމެ ހޯމަ ދުވަހެއްގެ 10:00 އިން 11:00 އަށް ނޫސްވެރިންނާ ބައްދަލު ކުރައްވާނެ ކަމަށް ރައީސް މުޢިއްޒު ވިދާޅުވީ، މިއަހަރަށް ރައްޔިތުންގެ މަޖިލިސް ހުޅުވަން ބޭއްވި ޖަލްސާގަ އެވެ. މާޗު މަހުން ފެށިގެން އެކަން ކުރައްވަމުން ގެންދަވާނެ ކަމަށް އޭރު ރައީސް މުޢިއްޒު އޮތީ ވިދާޅުވެފަ އެވެ. ރައީސް މުޢިއްޒު ވިދާޅުވެފައި ވަނީ ދަތުރުފުޅެއްގައި މާލެ އިން ބޭރުގައި ނޫޅުއްވާ ނަމަ، ނޫސްވެރިންގެ ބައްދަލުވުން ކޮންމެ ހޯމަ ދުވަހަކު ބާއްވަމުން ގެންދަވާނެ ކަމުގައެވެ. 

އާދީއްތަ ދުވަހުގެ ރޭ ރައީސް އޮފީހުން ވަނީ، ހޯމަ ދުވަހުގެ ހެނދުނު 10:00 ގައި ނޫސްވެރިންގެ ބައްދަލުވުން އޮންނާނެ ކަމަށް މީޑިއާ ތަކަށް އަންގައިފަ އެވެ. ނަމަވެސް، ހޯމަ ދުވަހުގެ ހެނދުނު އަށެއް ޖެހި ފަހުން ރައީސް އޮފީހުން ވަނީ، ނޫސްވެރިންގެ ބައްދަލުވުން ނޯންނާނެ ކަމަށް އަންގައިފަ އެވެ. ނޫސްވެރިންގެ ބައްދަލުވުން ނުބާއްވަން ނިންމި ސަބަބެއް ރައީސް އޮފީހުން ބުނެފައި ނުވެ އެވެ. 

މިވަގުތު ރައީސް މުޢިިއްޒު ހުންނެވީ މާލޭގައި ކަމަށް ބެލެވެ އެވެ. އެމަނިކުފާނު އެއްވެސް ދަތުރުފުޅެއްގައި މާލެ އިން ބޭރަށް ވަޑައިގެންނެވި ކަމެއް ރައީސް އޮފީހުން ހާމަ ކޮށްފައި ނުވެ އެވެ. އެހެންވެ، މާލޭގައި ހުންނަވައި ހޯމަ ދުވަހުގެ ނޫސްވެރިންގެ ބައްދަލުވުން ކެންސަލް ކުރެއްވި ސަބަބެއް ސާފެއް ނުވެ އެވެ.

މިވަގުތަކީ ސަރުކާރަށް އެތައް ފާޑު ކިޔުންތަކެއް އަމާޒުވަމުން އަންނަ ވަގުތެކެވެ. ޚާއްސަކޮށް ދެ ނޫސްވެރިޔަކު ޖަލަށްލުމާ ގުޅިގެން ސަރުކާރަށް އިންތިހާ އަށް ފާޑު ކިޔުން އަމާޒުވެފައިވާއިރު، ބައިނަލްއަޤުވާމީ އެކި އެކި ޖަމިއްޔާތަކުން ވެސް ވަނީ އެ ނޫސްވެރިން ދޫކޮށްލުމަށް ގޮވާލައިފަ އެވެ.