ކުރީގެ ދެ ރައީސުން ކަމަށްވާ ނަޝީދު އަދި ޔާމީން، "އަނގަބަންދު" އަމުރާ ހިލާފުވި މައްސަލަ ކްރިމިނަލް ކޯޓަށް ހުށަހަޅައިފި
މި މައްސަލާގައި އެ ބޭފުޅުން ކޯޓުގެ ހުރުމަތް ކަނޑާފައިވާ ކަމަށް ކަނޑައަޅައިދިނުމަށް އެދިފައިވާއިރު، އަމުރާ ހިލާފުވި ކަމަށް ބެލެވޭ ހެކިތައް ވެސް ވަނީ ހުށަހަޅާފަ. ކޯޓު އަމުރުގައިވާ ގޮތުން އެ ވީޑިއޯގައި ހިމެނޭ ވާހަކަތައް ސީދާކޮށް ނުވަތަ ނުސީދާކޮށް ދެއްކުމަކީ މަނާކަމެއް.
ކުރީގެ 3 ރައީސުން ބޭއްވި ބައްދަލުވުމުގެ ތެރެއިން | އެމްޑީޕީ
އަދަދު ނޫހުން އާއްމުކުރި ޑޮކިއުމެންޓްރީއަކާ ގުޅިގެން ކްރިމިނަލް ކޯޓުން ނެރުނު "އަނގަބަންދު" އަމުރާ، ކުރީގެ ދެ ރައީސުން ކަމަށްވާ މުހައްމަދު ނަޝީދު އާއި އަބްދުﷲ ޔާމީން އަބްދުލްގައްޔޫމް ހިލާފުވެފައިވާ ކަމަށް ބުނެ އެ މައްސަލަ ކްރިމިނަލް ކޯޓަށް ހުށަހަޅައި ފިއެވެ. އަމިއްލަ ފަރާތަކުން ހޯމަ ދުވަހު މި މައްސަލަ ހުށަހެޅީ އެ ދެ ބޭފުޅުން ކޯޓުގެ ހުރުމަތް ކަނޑާފައިވާ ކަމަށް ކަނޑައަޅައިދިނުމަށް އެދި އެވެ.
މި މައްސަލާގައި ފާހަގަކޮށްފައިވާ ގޮތުގައި، ރައީސް ނަޝީދު އެކި ސްޕީޗުތަކުގައި ތަކުރާރުކޮށް އެ އަމުރާ ހިލާފުވަމުން އަންނަ އިރު، ރައީސް ޔާމީން ވެސް ގެންދަވަނީ އެ ޑޮކިއުމެންޓްރީގެ ވާހަކަތައް ދައްކަވަމުންނެވެ. މައްސަލަ ހުށަހެޅި ފަރާތުން ވަނީ އެ އަމުރާ ހިލާފުވި ކަމަށް ބެލެވޭ ހެކިތަކެއް ވެސް ކޯޓަށް ހުށަހަޅާފަ އެވެ.
ކުރީގެ ދެ ރައީސުންގެ އިތުރުން، ރައްޔިތުންގެ މަޖިލީހުގެ ބައެއް މެންބަރުންނާއި އިތުރު ސިޔާސީ ބޭފުޅުން ވެސް މި އަމުރާ ހިލާފުވެފައިވާ ކަމަށް މައްސަލާގައި ފާހަގަކޮށްފައިވެ އެވެ. އޭގެ ތެރޭގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ)، ގަލޮޅު ދެކުނު ދާއިރާގެ މެންބަރު މީކާއިލް ނަސީމް، ވައިކަރަދޫ ދާއިރާގެ މެންބަރު ހުސައިން ޒިޔާދު އަދި ކަނޑިތީމު ދާއިރާގެ މެންބަރު އަމީން ފައިސަލް ހިމެނެއެވެ. މީގެ އިތުރުން ރައީސް މުހައްމަދު މުއިއްޒު ވެސް ކޯޓު އަމުރާ ހިލާފުވެފައިވާ ކަމަށް އެ މައްސަލާގައި ފާހަގަކޮށްފައިވެ އެވެ.
މިދިޔަ މެއި މަހުގެ 11 ވަނަ ދުވަހު ކްރިމިނަލް ކޯޓުން ނެރުނު އަމުރުގައި ވަނީ "އައިޝާ" ޑޮކިއުމެންޓަރީ މުޖުތަމައުގެ ތެރޭގައި ދައުރުކުރުން މުޅިން މަނާކޮށްފަ އެވެ. އަދި އެ ވީޑިއޯގައި ހިމެނޭ ވާހަކަތައް އެއްވެސް ފަރާތަކުން ސީދާގޮތުންނާއި ނުސީދާގޮތުން ދެއްކުން ވެސް އެ އަމުރުން ވަނީ މަނާކޮށްފަ އެވެ.
މީގެ އިތުރުން، އެ މައްސަލައިގެ ހަސްމުންނާއި ކުށުގެ ޝިކާރައަށްވީ ފަރާތާ ގުޅުވައިގެން އެއްވެސް ވާހަކައެއް ދެއްކުން މަނާކޮށް، މުޅި މައްސަލައާ ގުޅޭ ގޮތުން ވާހަކަ ދެއްކުން ވަނީ އެ އަމުރުގެ ދަށުން ހިފަހައްޓާފަ އެވެ. މި އަމުރާ ހިލާފުވާ ފަރާތްތަކާމެދު ކޯޓުގެ ހުރުމަތް ކެނޑުމުގެ މައްސަލައިގައި ފިޔަވަޅު އެޅުމުގެ ބާރު ކޯޓަށް ލިބިގެންވެ އެވެ.
