ސުލްޙައިގެ އެއްބަސްވުމުގެ މުއްދަތުގައި އީރާން އިން ޑްރޯން އުފައްދާ ކަަމަށް ބުނެފި
އިންޓެލިޖެންސް މައުލޫމާތުތަކާ ހަވާލާދީ ސީއެންއެން އިން ރިޕޯޓު ކޮށްފައިވާ ގޮތުގައި، އީރާންގެ އަސްކަރީ ގާބިލުކަން އަލުން އިއާދަ ކުރަމުންދާ ދިޔުމަކީ، އަލުން ބޮން އެޅުމުގެ ކެމްޕެއިން ރައީސް ޓްރަމްޕް ފައްޓަވައިފި ނަމަ ސަރަހައްދީ ބައިވެރިންނަށް އޮތް ބޮޑު ނުރައްކަލެއް.
އީރާންގެ ވެރި ރަށް ތެހެރާންގައި ހުންނަ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ އެއަރޯސްޕޭސް ފޯސް މިއުޒިއަމްގައި އެ ގައުމުގެ އުފެއްދުމެއް ކަމަށްވާ ޑްރޯން ތަކެއް ދައްކާލުމަށް ބަހައްޓާފައި. | ރޮއިޓާސް
މިދިޔަ އޭޕްރީލް މަހުގެ ކުރީ ކޮޅު ފެށުނު ހަ ހަފުތާގެ ހަމަލާ ބަދަލު ކުރުން ހުއްޓާލުމުގެ އެއްބަސްވުމުގެ ތެރޭގައި، އީރާން އިން އަނެއްކާ ވެސް ޑްރޯން އުފެއްދުމުގެ މަސައްކަތްތައް ފަށާފައިވާ ކަމަށް، އެމެރިކާގެ އިންޓެލިޖެންސް ރިޕޯޓުތަކާ ހަވާލާދީ ސީއެންއެން އިން ބުރާސްފަތި ދުވަހު ރިޕޯޓު ކޮށްފި އެވެ.
އެމެރިކާގެ އިންޓެލިޖެންސް އިދާރާ ތަކުގެ ވަޒަން ކުރުންތަކާ ހަވާލާދީ ހަތަރު މަސްދަރަކުން ބުނެފައިވާ ގޮތުގައި، އީރާންގެ އަސްކަރީ ގާބިލުކަން ކުރިން އަންދާޒާ ކުރި ވަރަށް ވުރެ މާ ހަލުވި މިނެއްގައި އަންނަނީ ވަރުގަދަ ކުރަމުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވީ، އީރާން އިން ސުލްހައިގެ އެއްބަސްވުމަކަށް ނައިސްފި ނަމަ، އެ ގައުމަށް އިތުރު ހަމަލާ ތަކެއް ދިނުމަށް އެމެރިކާ އޮތީ ތައްޔާރަށް ކަމަށެވެ. ނަމަވެސް، ރަނގަޅު ޖަވާބެއް ލިބޭތޯ ބެލުމަށް އެމެރިކާ އިން އަދި މަދު ދުވަސް ކޮޅަކަށް މަޑު ކޮށްފާނެ ކަމުގެ އިޝާރާތެއް ވެސް ރައީސް ޓްރަމްޕް ވަނީ ދެއްވާފަ އެވެ.
އިންޓެލިޖެންސް މައުލޫމާތުތަކާ ހަވާލާދީ ސީއެންއެން އިން ރިޕޯޓު ކޮށްފައިވާ ގޮތުގައި، އީރާންގެ އަސްކަރީ ގާބިލުކަން އަލުން އިއާދަ ކުރަމުންދާ ދިޔުމަކީ، އަލުން ބޮން އެޅުމުގެ ކެމްޕެއިން ރައީސް ޓްރަމްޕް ފައްޓަވައިފި ނަމަ ސަރަހައްދީ ބައިވެރިންނަށް އޮތް ބޮޑު ނުރައްކަލެކެވެ. އެމެރިކާގެ އޮފިޝަލަކު ވިދާޅުވި ގޮތުގައި، އީރާން އިން މިހާރު މަސައްކަތް ކުރަމުންދާ ދުވެއްޔަށް ބަލާއިރު، ކުރިއަށް އޮތް ހަ މަސް ދުވަހުގެ ތެރޭގައި އެ ގައުމުގެ ޑްރޯން ހަމަލާ ދިނުމުގެ ފުރިހަމަ ގާބިލުކަން އަލުން ހޯދޭނެ ކަމަށް ބެލެވެ އެވެ.
އީރާން އިން މިހާ ހަލުވިކަމާ އެކު އަސްކަރީ ގާބިލުކަން އިތުރު ކުރަމުންދާ ސަބަބު ތަކުގެ ތެރޭގައި، ރަޝިޔާ އާއި ޗައިނާގެ އެހީތެރިކަން ހިމެނޭ ކަމަށް ރިޕޯޓުގައި ފާހަގަ ކޮށްފައިވެ އެވެ. މިގޮތުން، ހިނގަމުންދާ ހަމަނުޖެހުން ތަކުގެ ތެރޭގައި ވެސް މިސައިލް އުފެއްދުމަށް ބޭނުންވާ މުހިންމު ސާމާނު ޗައިނާ އިން އީރާން އަށް ފޯރުކޮށްދެމުންދާ ކަމަށް އެމެރިކާގެ އިންޓެލިޖެންސް މަސްދަރު ތަކުން ބުނެ އެވެ. ނަމަވެސް، އެމެރިކާ އިން އީރާންއާ ދެކޮޅަށް އަޅާފައިވާ ބްލޮކޭޑް ނުވަތަ ދަތި ކުރުމުގެ ފިޔަވަޅު ތަކުގެ ސަބަބުން މި ތަކެތި އެތެރެ ކުރުމަށް ކޮންމެ ވެސް ވަރެއްގެ ހުރަސް ތަކެއް ކުރިމަތި ވެފައިވާ ކަމަށް ވެސް ރިޕޯޓުގައި ބަޔާން ކޮށްފައިވެ އެވެ.
މަސްދަރު: އަލް އަރަބިއްޔާ
