ފްލައިޓްތަކުގެ ތެރޭގައި ޕަވަރ ބޭންކް ޗާޖުކުރުން ސައުދީ އަރަބިއްޔާ އިން މަނާކޮށްފި

ފްލައިޓްތަކުގެ ތެރޭގައި ޕަވަރ ބޭންކް ޗާޖުކުރުން ސައުދީ އަރަބިއްޔާ އިން މަނާކޮށްފިއެވެ. ސައުދީ އަރަބިއްޔާގެ ޖެނެރަލް އޮތޯރިޓީ އޮފް ސިވިލް އޭވިއޭޝަނުން ވަނީ، އެ ގައުމުގެ އެއާޕޯޓުތަކުގައި ހަރަކާތްތެރިވާ ހުރިހާ އެއާލައިންތަކަކަށް، ފްލައިޓްތަކުގައި ޕަވަރ ބޭންކާއި އިލެކްޓްރޯނިކް ސާމާނު ގެންގުޅުމާ ގުޅޭ އާ ސާކިއުލާއެއް ނެރެފައެވެ.

އެ އޮތޯރިޓީން ހާމަކުރި ގޮތުގައި، މި ފިޔަވަޅުތަކަށް ބަދަލު ގެނެސްފައިވަނީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ކަނޑައަޅާފައިވާ ބައިނަލްއަގުވާމީ ސިވިލް އޭވިއޭޝަންގެ ރައްކާތެރިކަމުގެ މިންގަނޑުތަކާ އެއްގޮތްވާ ގޮތުގެ މަތިންނެވެ. އަދި މި ބަދަލުގެ މައިގަނޑު މަގްސަދަކީ ވައިގެ ދަތުރުފަތުރުގެ ސަލާމަތާއި ރައްކާތެރިކަން އިތުރަށް ވަރުގަދަކުރުން ކަމަށްވެސް އެ އިދާރާއިން ބުނެފައިވެއެވެ.

އަލަށް އަމަލުކުރަން ފެށި އުސޫލުތަކުގެ ދަށުން، ފްލައިޓްގެ ތެރޭގައި ޕަވަރ ބޭންކް ޗާޖުކުރުމަކީ ފަސިންޖަރުންނާއި ފްލައިޓްގެ ކުރޫއިންނަށްވެސް މަނާކަމެކެވެ.

މީގެ އިތުރުން، ޕަވަރ ބޭންކް ފަދަ ތަކެތި އުފުލޭނީ ހަމައެކަނި އަތްދަބަހުގައި (ހޭންޑް ލަގޭޖް) ކަމަށާއި، ފްލައިޓްގެ ކާގޯއަށްލާ ޗެކް-އިން ބެގޭޖުގައި ޕަވަރ ބޭންކް ބެހެއްޓުމަކީ މަނާކަމެއްގެ ގޮތުގައި ވަނީ ކަނޑައަޅާފައެވެ.

މި އާ ގަވާއިދުގެ ދަށުން ކޮންމެ ފަސިންޖަރަކަށްވެސް ފްލައިޓްގައި ގެންގުޅެވޭނީ ގިނަވެގެން ދެ ޕަވަރ ބޭންކެވެ.

ރައްކާތެރިކަމުގެ އިތުރު ފިޔަވަޅެއްގެ ގޮތުން، ފްލައިޓް ދަތުރުމަތީގައި އެހެނިހެން އިލެކްޓްރޯނިކް ސާމާނު ޗާޖުކުރުމަށް ޕަވަރ ބޭންކް ބޭނުން ނުކުރުމަށްވެސް ސައުދީގެ ސިވިލް އޭވިއޭޝަން އޮތޯރިޓީން ވަނީ އިލްތިމާސްކޮށްފައެވެ.