މިއަހަރުގެ ހައްޖު ގައި މަސްޖިދުލް ހަރާމް އާއި މަސްޖިދުލް ނަބަވީ ގައި ފޮޓޯ ނެގުން މަނާ ކުރީތަ؟
ސޯޝަލް މީޑިއާގައި ފެތުރިފައިވާ ވާހަކަތާ ޚިލާފަށް، ސައުދީ އަރަބިއްޔާ އިން 2026 ވަނަ އަހަރުގެ ހައްޖު ގައި ފޮޓޯ ނެގުން މަނާ ކުރިކަން އެނގޭ އެއްވެސް އިޢުލާނެއް ނެރެފައެއް ނުވޭ.
ޙައްޖުވެރިއަކު ސަޢޫދީ ޢަރަބިއްޔާގެ މައްކާގައި ހުންނަ މާތްވެގެންވާ ގެފުޅުގެ ކައިރީގައި "ސެލްފީ" އެއް ނަގަނީ.
އަންނަ އަހަރު ހައްޖަށް ދާ މީހުން މަސްޖިދުލް ހަރާމް އާއި މަސްޖިދުލް ނަބަވީ ގައި ފޮޓޯ ނެގުން ސައުދީ އަރަބިއްޔާ ސަރުކާރުން މަނާ ކޮށްފި ކަމަށް ސޯޝަލް މީޑިއާ ގައި ވާހަކަތައް ދަނީ ފެތުރެމުންނެވެ.
ސޯޝަލް މީޑިއާ ގައި ފެތުރެމުންދާ ވާހަކަތަކުގެ ހަގީގަތް ބެލުމުން މައްކާގެ މަސްޖިދުލް ހަރާމާއި މަދީނާގެ މަސްޖިދުލް ނަބަވީގެ ތެރޭގައި ފޮޓޯ ނެގުން މަނާ ކޮށްފައިވާ އެއްވެސް ރަސްމީ ލިޔުމެއް ފެންނާކަށް ނެތެވެ.
ހައްޖާއި ޢުމްރާ އާ ބެހޭ ސައުދީ ސަރުކާރުގެ ވުޒާރާ އިން ހައްޖު މޫސުމުގެ ތެރޭގައި އެއްވެސް ބާވަތެއްގެ ފޮޓޯ ނެގުމާއި ވީޑިއޯ ނެގުން މަނާ ކޮށްފައިވާ ކަމަށާއި އަދި މޮބައިލް ފޯނު ބޭނުން ކޮށްގެން ވެސް މަންޒަރު ނެގުން ހައްޖު މޫސުމުގައި މަނާ ކޮށްފައިވާ ކަމަށް ބުނާ ވާހަކަތައް ވަރަށް ބާރަށް ސޯޝަލް މީޑިއާ ގައި ވަނީ ފެތުރިފައެވެ. އަދި އެކަން އެގޮތައް ނިންމީ ތޮއްޖެހުން ކުޑަ ކުރުމަށާއި، އަޅުކަމަށް ސަމާލުކަން ދިނުމަށް ބާރު އެޅުމުގެ ގޮތުން ކަމަށް ވެސް މި ފެތުރުނު ވާހަކަތަކުގައިވެ އެވެ.
ނަމަވެސް، ސައުދީ އަރަބިއްޔާ ރަސްމީ އިދާރާތަކުގެ ވެބްސައިޓްތަކުގައި މިވާހަކަތައް ބާރު ލިބޭ އެއްވެސް އިޢުލާނެއް ފެންނާކަށް ނެތެވެ. ސައުދީ ސަރުކާރުގެ މިފަދަ މުހިންމު ނިންމުންތައް ޝާއިއު ކުރާ ސައުދީ ޕްރެސް އޭޖެންސީ (އެސްޕީއޭ) އިން މިފަދަ ޚަބަރެއް ޝާއިއު ކޮށްފައި ނުވާ އިރު، ހައްޖާއި ޢުމްރާގެ ކަންކަމާ ބެހޭ ވުޒާރާ އާއި ޖެނެރަލް އޮތޯރިޓީ ފޯ ދަ ކެއަރ އޮފް ދަ ޓޫ ހޯލީ މޮސްކްސް އިން ވެސް މިފަދަ ސާކިއުލާ އެއް އާންމު ކޮށްފައި ނެތްކަން ފާހަގަ ކުރެވެއެވެ.
މާތް ވެގެންވާ ދެ މިސްކިތުގެ ތެރޭގައި ފޮޓޯ ނެގުމާއި ވީޑިއޯ ކުރުމުގައި ޒަމާނުއްސުރެ އަމަލު ކުރަން ބާރު އަޅާ އުސޫލުގައި މީހުންނަށް އުނދާގޫ ނުވާގޮތައް އަމަލުތައް ބެހެއްޓުމާއި، ބްލޮކް ނުވާނެ ގޮތަށް އަމަލުތައް ބެހެއްޓުމާއި، ނަމާދުގައި ތިބޭ މީހުންނަށް އުނދަގޫ ނުވާނެ ގޮތަށް އަމަލުކުރުމަށް ބާރު އަޅައެވެ. މި ކަންކަން ސްޓޭންޑަޑް ޕްރެކްޓިސް އެއް ގޮތުގައި ހަމަ ޖެހިފައި އޮތް އޮތުން ބަދަލު ކޮށް، 2026 ވަނަ އަހަރުގެ ހައްޖަށް ދާ މީހުންނަށް އިތުރު ގަވައިދެއް ހަދާފަ އެއް ނެތެވެ.
ހަގީގަތެއް ނެތް މި ވާހަކަ އުފަންވެފައި ވަނީ ވެރިފައި ނުކުރެވޭ އެކައުންޓަކުން އާންމު ކުރި ޕޯސްޓަކުންނެވެ. އަދި އެ ވާހަކަ އެކި ގޮތްގޮތައް ބަދަލު ކޮށްގެން އެކި ޕްލެޓްފޯމުތަކުގައި އެކި ފަރާތްތަކުން ފަތުރާފައިވެ އެވެ. އެހެން ނަމަވެސް މިއިން އެއްވެސް ޕޯސްޓެއް ގައި ރަސްމީ އިދާރާ އެއްގެ ބަޔާނެއް އެޓޭޗް ކޮށްފައި ނެތްކަން ފާހަގަ ކުރެވެއެވެ.
ސައުދީ ސަރުކާރުން އަބަދު ވެސް އިލްތިމާސް ކުރަނީ ކަންކަމަށް އަންނަ ބަދަލުތައް ދެނެގަތުމަށް ސައުދީ ސަރުކާރުގެ ރަސްމީ މަސްދަރުތައް ބެލުމަށެވެ.
