މެދުއިރުމަތީގެ މަސްރަހް ހޫނުވެ، ޔަމަނުގައި ތިބި ޔޫ.އޭ.އީ ގެ އަސްކަރީ ފައުޖުތައް ބާލަން އެ ގައުމުން އެންމެ ފަހުން ނިންމައިފި

ޔަމަނުގައި ތިބި ޔުނައިޓެޑް އެރަބް އެމިރޭޓްސް (ޔޫ.އޭ.އީ) ގެ އަސްކަރީ ފައުޖުތައް ބޭލުމަށް ނިންމާފައިވާކަން އެގައުމުގެ ދިފާއީ ވުޒާރާއިން އަންގާރަ ދުވަހު އިއުލާނުކޮށްފިއެވެ.

އެ ވުޒާރާ އިން ނެރުނު ބަޔާނެއްގައި ބުނެފައި ވަނީ، 2015 ވަނަ އަހަރުން ފެށިގެން ޔޫ.އޭ.އީ އިން ޔަމަނުގެ އޮޕަރޭޝަންތަކުގައި ބައިވެރިވަމުން އައީ އަރަބި ކޯލިޝަނުގެ ބައެއްގެ ގޮތުގައި ކަމަށެވެ. އެއީ ޔަމަނުގެ ގާނޫނީ ސަރުކާރު ދެމެހެއްޓުމަށާއި، ޓެރަރިސްޓް ޖަމާއަތްތަކާ ދެކޮޅަށް ކުރެވޭ ބައިނަލްއަގުވާމީ މަސައްކަތްތަކަށް އެހީތެރިވުމަށާއި، ޔަމަނުގެ ރައްޔިތުންނަށް އަމާންކަމާއި ހަމަޖެހުން ހޯދައިދިނުމަށް ކުރާ މަސައްކަތުގައި އެއްބާރުލުން ދިނުމަށް ކަމަށްވެސް އެ ބަޔާނުގައިވެއެވެ.

މީގެ އިތުރުން، ޔޫ.އޭ.އީގެ އަސްކަރީ ފައުޖުތަކުން ޔަމަނުގައި އަދާކުރަންޖެހޭ މައިގަނޑު މަސްއޫލިއްޔަތުތައް ނިމުމަކަށް އައުމާއެކު، 2019 ވަނަ އަހަރު އެގައުމުގެ ސިފައިން ޔަމަނުން ބާލާފައިވާ ކަމަށްވެސް ބަޔާނުގައިވެއެވެ. އޭގެ ފަހުން އެގައުމުގައި މަޑުކޮށްގެން ތިބީ ހަމައެކަނި ޓެރަރިޒަމާ ދެކޮޅަށް މަސައްކަތްކުރާ ހާއްސަ ފަންނީ މާހިރުން ކަމަށާއި، އެއީ ބައިނަލްއަގުވާމީ ބައިވެރިންނާ ގުޅިގެން ކުރިއަށްގެންދިޔަ ހަރަކާތްތަކެއް ކަމަށްވެސް ބުނެފައިވެއެވެ.

މިހާރު ޔަމަނުގައި ތިބި ޓެރަރިޒަމާ ދެކޮޅަށް މަސައްކަތްކުރާ ފައުޖުތައް ބޭލުމަށް ނިންމީ، މިހާރުގެ ހާލަތަށް ރިއާޔަތްކޮށް، ކަމާބެހޭ ބައިވެރިންނާ މަޝްވަރާކުރުމަށްފަހު ކަމަށްވެސް ޔޫ.އޭ.އީ އިން ބުނެ އެވެ. އަދި މި ނިންމުމަކީ ޔޫ.އޭ.އީ އިން އަމިއްލައަށް ނިންމި ނިންމުމެއް ކަމަށްވެސް ބަޔާނުގައި ފާހަގަކޮށްފައިވެއެވެ.

ނަމަވެސް، ޔަމަނުގެ ރިޔާސީ ކައުންސިލްގެ ރައީސް ރަޝާދު އަލް-އަލީމީ ވަނީ 24 ގަޑިއިރުގެ ތެރޭގައި ޔޫ.އޭ.އީގެ ސިފައިން ޔަމަނުން ފޭބުމަށް އަމުރުކުރައްވާފައެވެ. ސަދަން ޓްރާންސިޝަނަލް ކައުންސިލް (އެސް.ޓީ.ސީ) އާއެކު އުފެދިފައިވާ ނުތަނަވަސްކަމާ ގުޅިގެން އަލް-އަލީމީ ވަނީ ވަރުގަދަ ފިޔަވަޅުތަކެއް އަޅާނެކަން އިއުލާނުކުރައްވާފައެވެ.

ޓީވީ މެދުވެރިކޮށް ދެއްވި ހިތާބެއްގައި އަލް-އަލީމީ ވިދާޅުވީ، ޔަމަނުގެ މަސްލަހަތު އިތުރަށް ގޯސްވާނެ ފަދަ އާ ހަމަނުޖެހުންތަކަށް ޔަމަނުން ޖާގަ ނުދޭނެ ކަމަށެވެ. އަދި ޔަމަނުގެ ސަރުކާރު ވަރުގަދަ ކަމަށާއި އެކަން ހާސިލުވެފައި ވަނީ ސައޫދީ އަރަބިއްޔާ އިސްވެ އޮވެ ހިންގާ އަރަބި ކޯލިޝަނުގެ އެހީތެރިކަމާއެކު ކަމަށްވެސް އޭނާ ވިދާޅުވިއެވެ.

ޓެރަރިސްޓް ނުރައްކާތަކާ ދެކޮޅަށް މަސައްކަތް ކުރުމުގައި ޔަމަނުގެ ސަރުކާރުން ދުވަހަކުވެސް ފަސްނުޖެހޭނެ ކަމަށް ވިދާޅުވަމުން، އަލް-އަލީމީ ވަނީ އެސް.ޓީ.ސީ އިން މައްސަލަތައް ހައްލުކުރުމަށް އިޖާބަ ނުދޭ ކަމަށް ތުހުމަތުކުރައްވާފައެވެ. މީގެ އިތުރުން، ޔޫ.އޭ.އީގެ ފުޖައިރާއިން ދެ އުޅަނދެއްގައި އެސް.ޓީ.ސީ އަށް ހަތިޔާރު ފޮނުވާފައިވާ ކަމަށް ތުހުމަތުކުރައްވައި، އެއީ މަސްލަހަތު ގޯސްކުރުމަށް އެޅި ފިޔަވަޅެއްގެ ގޮތުގައި އޭނާ ސިފަކުރެއްވިއެވެ.

ޔަމަނުގެ ލީޑަރު ވަނީ ޔޫ.އޭ.އީ އާއެކު ވެފައިވާ ދިފާއީ އެއްބަސްވުން ބާތިލުކުރިކަން އިއުލާނުކުރައްވާފައެވެ. އޭނާ ވިދާޅުވި ގޮތުގައި ޔޫ.އޭ.އީގެ އެހީތެރިކަން މިހާރު އޮތީ ޔަމަނުގެ ރައްޔިތުންނާ ދެކޮޅަށެވެ. އެހެންކަމުން 24 ގަޑިއިރުގެ ތެރޭގައި އެގައުމުގެ ހުރިހާ ސިފައިން ޔަމަނުން ފޭބުމަށް ވަނީ ގޮވާލައްވާފައެވެ.

މީގެ އިތުރުން، އަލް-އަލީމީ ވަނީ ޔަމަނަށް ވަދެ ނުކުމެވޭ ހުރިހާ މަގުތަކެއް (ވައިގެ، އެއްގަމު އަދި ކަނޑުގެ) 72 ގަޑިއިރަށް ބަންދުކޮށް، 90 ދުވަހުގެ ކުއްލި ނުރައްކަލުގެ ހާލަތު އިއުލާނުކުރައްވާފައެވެ. އަދި މި މުއްދަތު އިތުރުކުރެވިދާނެ ކަމަށްވެސް އޭނާ ވިދާޅުވިއެވެ.

ޔަމަނުގެ މުކައްލާ ބަނދަރަށް ބޭލި ހަތިޔާރުގެ ޝިޕްމަންޓަކަށް ސައުދީ އިސްވެ ހަރަކާތްތެރިވާ ކޯލިޝަނުން ހަމަލާދިނުމާ ގުޅިގެން، 24 ގަޑިއިރުގެ ތެރޭގައި އެމިރޭޓްސްގެ ސިފައިން އެ ގައުމުން ފޭބުމަށް ޔަމަނުގެ ރިޔާސީ މަޖިލީހުން ކުރި ޑިމާންޑަށް ސައުދީ އަރަބިއްޔާއިން ވަނީ ތާއީދުކޮށްފައެވެ. ސައުދީން ބުނާ ގޮތުގައި އެ ހަތިޔާރުތަކަކީ އެމިރޭޓްސްގެ ތާއީދާއެކު ޔަމަނުން ވަކިވެގަންނަން މަސައްކަތްކުރާ ހަނގުރާމަވެރި ޖަމާއަތަކަށް ފޮނުވި ތަކެއްޗެވެ.

ސައުދީ ޚާރިޖިއްޔާ އިން ތުހުމަތުކުރާ ގޮތުގައި، ޔަމަނުގެ އިރުމަތީގެ ޕްރޮވިންސްތައް ކަމަށްވާ ޙަޟްރަމައުތާއި އަލް-މަހްރާގައި މިފަހަކުން ދިން ހަމަލާތަކަކީ، ދެކުނު ޔަމަނުގެ މިނިވަންކަމަށް މަސައްކަތްކުރާ ސަދަން ޓްރާންސިޝަނަލް ކައުންސިލަށް (އެސް.ޓީ.ސީ) އެމިރޭޓްސް އިން ބާރުއަޅައިގެން ދީފައިވާ ހަމަލާތަކެކެވެ. މިއީ އިންތިހާ އަށް ނުރައްކާތެރި އަމަލުތަކެއް ކަމަށް ސިފަކޮށް، މިފަދަ ކަންކަމާ ކުރިމަތިލުމަށް ހަރުދަނާ ފިޔަވަޅުތަކެއް އަޅާނެ ކަމުގެ އިންޒާރު ސައުދީން ވަނީ ދީފައެވެ.

މިކަމާ ގުޅިގެން އެމިރޭޓްސްގެ ޚާރިޖިއްޔާ އިން ވަނީ އެ ޝިޕްމަންޓުގައި ހަތިޔާރު ހުރި ކަމަށް ބުނާ ވާހަކަ ދޮގުކޮށްފައެވެ. އަދި ސައުދީގެ ބަޔާނާ ގުޅިގެން ނުހަނު ބޮޑަށް ހިތާމަކުރާ ކަމަށްވެސް އެ ގައުމުން ބުނެފައިވެ އެވެ.

އަރަބި ކޯލިޝަނުން އަންގާރަ ދުވަހު ބުނި ގޮތުގައި، އެމިރޭޓްސް އިން ޔަމަނުގެ ދެކުނުގެ ބަނދަރެއް ކަމަށްވާ މުކައްލާ އަށް އެތެރެކުރި ޝިޕްމަންޓްގެ ކޮންޓޭނަރުތަކުގައި ހުރީ ހަތިޔާރާއި ގޮވާތަކެތީގެ ވަސީލަތްތަކެވެ. ކޯލިޝަނުން މި ބަޔާން ނެރެފައި ވަނީ، އެ ޝިޕްމަންޓުގައި ހަތިޔާރު ނުހުންނާނެ ކަމަށާއި އެއީ އެމިރޭޓްސްގެ ސިފައިންނަށް ހާއްސަކޮށްގެން ގެނައި ތަކެތި ކަމަށް ބުނެ އެމިރޭޓްސް އިން ކުރިން ނެރުނު ބަޔާނަށް ރައްދު ދިނުމުގެ ގޮތުންނެވެ.