ރޮނާލްޑޯ އާއި އޭނާގެ ބައިވެރިޔާ ސައުދީ އަރަބިއްޔާ އިން އަގުބޮޑު ދެ ގެ ގަނެފި

ފުޓުބޯޅައިގެ މަޝްހޫރު ތަރި ކްރިސްޓިއާނޯ ރޮނާލްޑޯ އާއި އޭނާގެ ބައިވެރިޔާ ޖޯޖީނާ ރޮޑްރިގޭޒް ސަޢޫދީ އަރަބިއްޔާ އިން އަގު ބޮޑު ދެ ގެ ގަނެފި އެވެ.

ސަޢޫދީ އަރަބިއްޔާގެ ހުޅަނގު އައްސޭރީގައި ހިންގާ ރިޖެނެރޭޓިވް ޓޫރިޒަމް މަޝްރޫޢުގެ ޑިވެލޮޕަރ، ރެޑް ސީ ގްލޯބަލް (އާރް.އެސް.ޖީ.) އިން ހޯމަ ދުވަހު އިއުލާންކުރީ ރޮނާލްޑޯ އާއި ރޮޑްރިގޭޒް ވަނީ 'ނުޖޫމާ' ރިޒް-ކާލްޓަން ރިޒަރވް ރެސިޑެންސް އިން ދެ އަލްޓްރާ-ލަގްޒަރީ ވިލާ ގަނެފައިވާ ކަމަށެވެ.

ނުޖޫމާ އަކީ ރެޑް ސީ ރެސިޑެންސަސް ކަލެކްޝަންގެ ބައެކެވެ. މިއީ ދޮންވެއްޔާއި ރީތި  މާހައުލެއް ގައި ތަރައްގީ ކޮށްފައިވާ އާދަޔާ ޚިލާފް ޕްރައިވެޓް ވިލާތަކެކެވެ. ވިލާތައް ތަަރައްގީ ކޮށްފައިވަނީ ދޮންވެލިގަނޑެއްގައި ވަށައިގެން ސާފު މޫދު އޮންނަ ގޮތަށެވެ. މީހުން އުޅޭ ސަރަހައްދާ ގާތްގަނޑަކަށް 26 ކިލޯމީޓަރު ދުރުގައި ތަރައްގީ ކޮށްފައި ވަނީ މި ބާވަތުގެ ޖުމްލަ 19 ހާއްސަ ވިލާ އެވެ. އެތަނަށް ދަތުރުކުރެވެނީ ހަމައެކަނި ޗާޓަރުކޮށްފައިވާ ބޯޓެއް ގައި ނުވަތަ ސީޕްލޭނަކުންނެވެ.

ރެޑް ސީގެ ފުރަތަމަ ރިސޯޓްތައް ހުޅުވުނު ފަހުން ރޮނާލްޑޯ އާއި ރޮޑްރިގޭޒް ވަނީ އެތަނަށް އެތައް ފަހަރެއްގެ މަތިން ޒިޔާރަތްކޮށްފަ އެވެ.

ރޮނާލްޑޯ އާއި ރޮޑްރިގޭޒް ވަނީ މި ތަންތަނުގެ ރީތި ކަމަށް ތައުރީފް ކޮށްފައި ކަމަށް ސައުދީ މީޑިއާ ރިޕޯޓުތަކުގައިވެ އެވެ.  ރޮނާލްޑޯ އާއި ރޮޑްރިގޭޒް ގަތް ދެ ވިލާގެ ތެރޭގައި، އާއިލާއާ އެކު ވަގުތު ހޭދަކުރުމަށް ތިން ކޮޓަރީގެ ވިލާއަކާއި، އިތުރު ދެ ކޮޓަރީގެ ވިލާއެއް ހިމެނެ އެވެ.

ރެޑް ސީ ޑެސްޓިނޭޝަން އަކީ ސަޢޫދީ ވިޝަން 2030 ގެ މުހިންމު މަޝްރޫޢެކެވެ. މި މަޝްރޫޢުގެ ދަށުން ސައުދީ އަރަބިއްޔާ ގައި ލަގްޒަރީ ޓޫރިޒަމް ކާމިޔާބު ކަމާ އެކު ގެންދަނީ ކުރިއަރުވަމުންނެވެ.