ރަމަޟާން މަހުގެ ހަނދު ބެލުމަށް ސައުދީ ރައްޔިތުންނަށް ގޮވާލައިފި
ފަލަކީ ހިސާބުތަކަށް ބަލާއިރު، މި އަހަރުގެ ރަމަޟާން މަސް ފެށޭނެ ކަމަށް ލަފާކުރެވެނީ ފެބްރުއަރީ މަހުގެ 18 ނުވަތަ 19 ވަނަ ދުވަހު.
ދެކުނު އެފްރިކާގެ މުސްލިމުން ހުޅެވި ހަނދު ފެނޭތޯ ބަލަނީ. | ގެޓީ އިމޭޖަސް
މި އަހަރުގެ ރަމަޟާން މަހުގެ ހަނދު ބެލުމަށް ސައުދީ އަރަބިއްޔާގެ ސުޕްރީމް ކޯޓުން އެ ގައުމުގެ ހުރިހާ މުސްލިމުންނަށް އާދިއްތަ ދުވަހު ގޮވާލައިފިއެވެ.
އެ ކޯޓުން ބުނެފައިވާ ގޮތުގައި ހަނދު ބެލުން އޮންނާނީ ފެބްރުއަރީ މަހުގެ 17 ވާ އަންގާރަ ދުވަހުގެ އިރުއޮއްސޭ ވަގުތުގައެވެ.
ސައުދީ ސުޕްރީމް ކޯޓުން ނެރުނު ބަޔާނެއްގައި ބުނެފައިވަނީ، ހަމަ ލޮލުން ނުވަތަ ދުރުމީ ބޭނުންކޮށްގެން ވިޔަސް ހަނދު ފެނިއްޖެ މީހަކު، އެންމެ ކައިރީގައި ހުރި ކޯޓަކަށް އެކަން އަންގައި ހެކިބަސް ދިނުމަށް އެދޭ ކަމަށެވެ.
އިސްލާމީ ކަލަންޑަރުގެ ނުވަ ވަނަ މަހަކީ ރަމަޟާން މަހެވެ. މިއީ މުސްލިމުންގެ އެންމެ މުގައްދަސް މަސް ކަމުގައި ބެލެވެ އެވެ.
ހަނދު ފެންނަ ގޮތަށް ބަލައި، މި އަހަރުގެ ރަމަޟާން މަސް ފެށޭނެ ކަމަށް ލަފާކުރެވެނީ ފެބްރުއަރީ މަހުގެ 18 ނުވަތަ 19 ވަނަ ދުވަހު އެވެ.
