ޖަރުމަނުގެ ޗާންސެލަރު މާޒް ސައުދީ އަށް ވަޑައިގެން، ވަލީ އަހުދު މުޙައްމަދާ ބައްދަލު ކުރައްވައިފި

ޖަރުމަނުގެ ޗާންސެލަރު ފްރިޑްރިކް މާޒް، ރަސްމީ ދަތުރުފުޅެއްގައި ސައުދީ އަރަބިއްޔާ އަށް ވަޑައިގެންފި އެވެ.

ބުދަ ދުވަހު މާޒް ސައުދީ އަށް ވަޑައިގެންފައިވާއިރު، ބުދަ ދުވަހުގެ ރޭގެ ވަގުތެއްގައި ވަނީ ސައުދީގެ ވަލީ އަހުދު މުޙައްމަދު ބިން ސަލްމާންއާ ވެސް ބައްދަލު ކުރައްވައިފަ އެވެ. އެ ބައްދަލު ކުރެއްވުން އޮތީ ސައުދީގެ ވެރި ރަށް ރިޔާޟްގައި ހުންނަ، އަލް ޔަމާމާ ޕެލަސްގަ އެވެ. 

މި ބައްދަލުވުމުގައި ޖަރުމަނުގެ ޗާންސެލަރު މާޒް އާއި، ސައުދީގެ ވަލީ އަހުދު މުޙައްމަދު ވަނީ ދެ ޤައުމުގެ ދެމެދުގައި ގުޅުން ބަދަހި ކުރުމާ ގުޅޭ ގޮތުން މަޝްވަރާ ކުރައްވައިފަ އެވެ. ފުޅާ ދާއިރާއެއްގައި ދެ ބޭފުޅުން މަޝްވަރާ ކުރެއްވިއިރު، އެ ބައްދަލުވުމުގައި ދެ ޤައުމުގެ އިސް ފަރާތްތަކުން ވެސް ވަނީ ބައިވެރިވެފަ އެވެ. 

އެގޮތުން ދެ ޤައުމުގެ މަސްލަޙަތު ހިމެނޭ މުހިންމު ދާއިރާ ތަކުން އެއްބާރުލުން އިތުރު ކުރުމަށާއި، ސަރަޙައްދީ އަދި ބައިނަލްއަޤުވާމީ މައިދާނުގައި ހުރި ގޮންޖެހުންތަކާ ގުޅޭ ގޮތުން ވެސް މަޝްވަރާ ކުރައްވާފައިވާ ކަމަށް ސައުދީގެ މީޑިއާ ތަކުން ވަނީ ބުނެފަ އެވެ. ޚާއްސަކޮށް އިޤްތިޞާދީ ގޮތުންނާއި، ސިޔާސީ ގޮތުން ދެ ޤައުމުގެ ދެ މެދުގައި އޮތް ގުޅުން އައު ހަރުފަތަކަށް ގެންދިޔުމަށް މާޒް އާއި މުޙައްމަދު ވަނީ މަޝްވަރާ ކުރައްވައިފަ އެވެ. 

އެ ބައްދަލުވުމުގައި ސައުދީގެ ވަލީ އަހުދު މުޙައްމަދު ވަނީ، ޖަރުމަނުގެ ޗާންސެލަރު މާޒް ސައުދީ އަށް ކުރެއްވި ދަތުރުފުޅަކީ ދެ ޤައުމުގެ ދެ މެދުގައި އޮތް ޒަމާންވީ ގުޅުން އިތުރަށް ޚަރުދަނާ ވެގެން ދާނެ ދަތުރުފުޅެއް ކަަމަށް ވަނީ ވިދާޅުވެފަ އެވެ. ސައުދީގެ ގަނޑުވަރު އަލް ޔަމާމާގައި މުޙައްމަދު ވަނީ މާޒް އަށް ރަސްމީ ގޮތުން މަރުޙަބާ ވެސް ދަންނަވައިފަ އެވެ.

މި ބައްދަލުވުމަކީ މެދު އިރުމަތީގެ ހަމަޖެހުމާއި، ދުނިޔޭގެ ހަކަތައިގެ ބާޒާރާއި، އަދި ވިޔަފާރީގެ ދާއިރާ އިން ޖަރުމަނާއި، ސައުދީއާ ދެމެދު އޮންނަ ގުޅުން ކުރިއަށް ގެންދިޔުމަށް މުހިންމު ދަނޑިވަޅެއްގައި ބޭއްވި ބައްދަލުވުމެއް ކަމަށް ތަޖުރިބާކާރުން ވަނޯ ފާހަގަ ކޮށްފަ އެވެ.