ސައުދީން ރަމަޟާން މަހު 1،000 ޓަނުގެ ކަދުރު 120 ގައުމަކަށް ފޮނުވާނެ
1447 ވަނަ އަހަރުގެ ރަމަޟާން މަހަށް އަމާޒުކޮށްގެން 120 ގައުމަކަށް 1،000 ޓަނުގެ ކަދުރުގެ އިތުރުން 2.2 މިލިއަން މުސްހަފާއި ތަރުޖަމާ ބެހުމަށް ސައުދީ ސަރުކާރުން ވަނީ ނިންމާފައެވެ. މީގެ އިތުރުން 49 ގައުމަކަށް އިމާމުން ފޮނުވުމަށް ހަމަޖެހިފައިވާއިރު، މިއީ މުސްލިމް އުންމަތުގެ އެއްބައިވަންތަކަން ވަރުގަދަކޮށް އިންސާނީ އެހީތެރިކަން ފޯރުކޮށްދިނުމަށް އެ ގައުމުން ކުރިއަށްގެންދާ މުހިންމު ހަރަކާތެއް.
ސައުދީ އަރަބިއްޔާގެ ރިޔާޟްގައި ހުންނަ އިމާމް ތުރުކީ ބިން އަބްދުﷲ މިސްކިތުގައި، 2007 ވަނަ އަހަރުގެ ސެޕްޓެމްބަރު މަހުގެ 14 ވީ ހުކުރު ދުވަހު، ރަމަޟާން މަހުގެ ފުރަތަމަ ހުކުރު ދުވަހުގެ ރޯދަވީއްލަނީ. | ގެޓީ އިމޭޖަސް
ސައުދީ އަރަބިއްޔާގެ މިނިސްޓަރ އޮފް އިސްލާމިކް އެފެއާޒް، ކޯލް އެންޑް ގައިޑެންސް ޝެއިޚް އަބްދުއްލަތީފް އާލް-ޝެއިޚް، 1447 ވަނަ އަހަރުގެ ރަމަޟާން މަހަށް އަމާޒުކޮށްގެން ދެ ހަރަމްފުޅުގެ ޚާދިމްގެ ހައިސިއްޔަތުން ސައުދީ އަރަބިއްޔާ އިން ކުރިއަށް ގެންދާ ރަމަޟާން ޕްރޮގްރާމްތައް އާދީއްތަ ދުވަހު ރިޔާޟްގައި އިފްތިތާހުކޮށްދެއްވައިފި އެވެ.
މި ޕްރޮގްރާމްތަކުގެ ތެރޭގައި ރޯދަވީއްލުން އިންތިޒާމުކުރުމާއި، ކީރިތި ގުރުއާނުގެ މުސްހަފްތައް ބެހުމުގެ އިތުރުން، ދުނިޔޭގެ 120 ގައުމެއްގައި ދިރިއުޅޭ މުސްލިމުންނަށް ކަދުރު ބެހުމުގެ މަސައްކަތް ހިމެނެ އެވެ.
މި ޕްރޮގްރާމްގެ ދަށުން ކީރިތި ގުރުއާނުގެ 2.2 މިލިއަން މުސްހަފާއި އޭގެ ތަރުޖަމާ ބެހުމަށް ވަނީ ހަމަޖެހިފައެވެ. ދެ ހަރަމްފުޅުގެ ޚާދިމްގެ ހަދިޔާގެ ގޮތުގައި ކަދުރު ބެހުމުގެ ޕްރޮގްރާމްގެ ދަށުން މިއަހަރު 1،000 ޓަނުގެ ކަދުރު ފޯރުކޮށްދޭނެއެވެ. މިއީ މިދިޔަ އަހަރާ އަޅާބަލާއިރު 300 ޓަނުގެ އިތުރުވުމެކެވެ. މި އެހީ ޖުމްލަ 120 ގައުމަކަށް ފޯރުކޮށްދޭއިރު، މީގެ ތެރޭގައި އަލަށް ހިމެނުނު 18 ގައުމެއް ހިމެނެއެވެ. މީގެ އިތުރުން، ރަމަޟާން މަހުގެ ތެރޭގައި އިމާމުވެ ނަމާދު ކުރުމަށްޓަކައި 49 ގައުމަކަށް 91 އިމާމުން ފޮނުވުމަށް ވެސް ސައުދީ އިސްލާމިކް މިނިސްޓްރީން ވަނީ ނިންމާފަ އެވެ.
މި ޕްރޮގްރާމްތައް އިފްތިތާހުކޮށްދެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުން ޝެއިޚް އަބްދުއްލަތީފް އާލް-ޝެއިޚް ވިދާޅުވީ، މިއީ ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް ހެޔޮކަން ފޯރުކޮށްދިނުމަށް ސައުދީ ސަރުކާރުގެ ލީޑަޝިޕުން ބަހައްޓަވާ އަހަންމިއްޔަތު ހާމަކޮށްދޭ ކަމެއްކަމަށެވެ. މީގެ އިތުރުން، މިއީ އިސްލާމްދީނާއި މުސްލިމުންގެ ޚިދުމަތުގައި ސައުދީ އަރަބިއްޔާއިން އަދާކުރާ އިސް ދައުރު ރަމްޒުކޮށްދޭ، އަދި މެދުމިނުގެ އުސޫލުތަކާއި، ކެތްތެރިކަމާއި، އެއްބައިވަންތަކަން ވަރުގަދަކޮށްދޭ ކަމެއް ކަމަށްވެސް މިނިސްޓަރު ވިދާޅުވި އެވެ.
މި އެހީތައް އޭގެ ހައްގުވެރިންނަށް އެންމެ ފުރިހަމަ ގޮތުގައި ފޯރުކޮށްދިނުމަށްޓަކައި، މިނިސްޓްރީގެ އިންސާނީ އަދި އިދާރީ ހުރިހާ ވަސީލަތްތަކެއް ބޭނުންކުރަމުންދާނެ ކަމުގެ ޔަގީންކަން މިނިސްޓަރު ދެއްވި އެވެ. މީގެ ސަބަބުން އިންސާނީ އެހީތެރިކަމުގައި އެ ގައުމުގެ ދައުރު ވަރުގަދަވެގެންދާނެ ކަމަށާއި، ސުލްހަ ފެތުރުމަށާއި މުސްލިމް އުންމަތަށް ޚިދުމަތް ކުރުމުގައި ސައުދީން ދެމިއޮންނާނެކަން މިކަމުން ކަށަވަރުވާނެ ކަމަށްވެސް އޭނާ ވިދާޅުވި އެވެ.
