ނޫސްވެރިންނަށް ކުރިމަތިވަމުންދާ ފިއްތުންތަކާ ދެކޮޅަށް ރާއްޖޭގެ ބޮޑެތި މީޑިއާތަކުން ޚަބަރު ފެތުރުން މެދުކަނޑާލައި "ބްލެކްއައުޓް"އަކަށް!

މިއަދު ރާއްޖޭގެ ބޮޑެތި ނޫސްތަކާއި އޮންލައިން މީޑިއާތައް ވަނީ "ބްލެކްއައުޓަކަށް" ގޮސްފައެވެ. ނޫސްވެރިން އިސްނަގައިގެން ކުރިއަށްގެންދާ މި ޙަރަކާތުގައި ވަކި ވަގުތެއް ވަންދެން އެ ނޫސްތަކުގެ ވެބްސައިޓާއި މީސްމީޑިއާގައި ޚަބަރު ފެތުރުމާއި ޕަބްލިޝް ކުރުން ވަނީ މުޅިން މެދުކަނޑާލާފައެވެ. އެއްވެސް ޙާލެއްގައި ރިޕޯޓްކުރާނެ ޚަބަރެއް ނެތިގެންނެއް ނޫނެވެ. އެކަން އެގޮތަށް ދިމާވީ، ހަގީގަތުގައިވެސް މިއަދު ނޫސްވެރިކަން ބްލެކްއައުޓެއްގެ ތެރޭގައި އޮތުމުންނެވެ.

މިއީ މީޑިއާގެ ބާރު ކަނޑުވާލައި، ނޫސްވެރިން ބިރުވެރިކަމެއްގެ ތެރެއަށް ކޮށްޕާލަމުންދާ ކަމަށް ގަބޫލުކުރާ ނޫސްވެރިން، އެކަމާ ދެކޮޅަށް ގުޅިގެން ކުރިއަށްގެންދާ އިހުތިޖާޖެކެވެ. މި އިހުތިޖާޖުގައި ރާއްޖޭގެ ބޮޑެތި އޮންލައިން މީޑިއާތަކުން ވެސް ބައިވެރިވެފައިވެއެވެ.

މިއަދު ދިވެހި ނޫސްވެރިން މަސައްކަތް ކުރަމުން އަންނަނީ ފިއްތުންތަކުގެ ތެރޭގައިކަން މިއީ ފެންނަން އޮތް ހަގީގަތެކެވެ. މިއީ އެކި ޒަމާނުގައި، އެކި ސިފަސިފައިގައި ނޫސްވެރިންނަށް ދިމާވާ ގޮންޖެހުންތަކެއް ނަމަވެސް، މިއަދު ފެންނަމުންދަނީ ކުރިއަށްވުރެ ވެސް ބޮޑަށް މި މިނިވަންކަން ނަގާލެވެމުންދާ މަންޒަރެވެ.

ވެރިކަމުގައި އޮތީ ކޮންމެ ސަރުކާރެއް ކަމުގައި ވިޔަސް، ފާޑުކިޔުމާއި، ބިރުދެއްކުމާއި، ސިޔާސީ ގޮތުން ކުރިމަތިވާ ހުރަސްތަކަކީ ރިޕޯޓަރުންނާއި އެޑިޓަރުންނަށް އާ ކަންކަމެއް ނޫނެވެ. ނަމަވެސް މިހާރު ފެންނަމުންދާ ކަންކަމަކީ، ނޫސްވެރިންގެ މައްޗަށް ޖިނާއީ ދައުވާ އުފުލުމާއި، ހައްޔަރުކުރުމާއި، ޙުކުމްކޮށް ޖަލަށް ލުމާއި، މީޑިއާ ސްޓޭޝަންތައް ރެއިޑްކުރުމާއި، ވަކި މައުޟޫއުތަކަށް ރިޕޯޓްކުރުން ހަނިކުރުމުގެ އިތުރުން، ނޫސްވެރިކަމުގެ މަސައްކަތް ކުރުމުން ގާނޫނީ އަދަބު ލިބިދާނެ ކަމުގެ ބިރު އިންތިހާއަށް އޮތްކަމެވެ. މި "ބްލެކްއައުޓް" ގެ ފަހަތުގައިވާ ހަގީގީ ސަބަބުތަކަކީ ވެސް އެއީއެވެ.

ނޫސްވެރިކަން ބްލެކްއައުޓަކަށް ދިއުމަކީ ކަންބޮޑުވާން ޖެހޭ ކަމެކެވެ. ކިތަންމެ މަދުވަގުތުކޮޅަކަށް ނަމަވެސް، މީޑިއާއެއްގެ މަސައްކަތް ހުއްޓާލަން ޖެހޭ ހިސާބަށް ދިއުމަކީ ނޫސްވެރިކަމަށް އޮތް ގޮންޖެހުންތަކާއި، ނޫސްވެރިކަން އޮތް ޙާލަތުވެސް ވަރަށް ސާފުކޮށް ފެންނަން އޮތް ކަމެކެވެ. މިކަމުގެ ގެއްލުން އޮތީ ހަމައެކަނި ނޫސްވެރިންނަށް ނުވަތަ ނޫސްމީޑިއާތަކަށް އެކަންޏެއް ނޫނެވެ.

މީޑިއާ ހިމޭންކުރުވުމަކީ ހަމައެކަނި ރިޕޯޓަރުންނަށް ދެވޭ އަދަބެއް ނޫނެވެ. އެއީ މުޅި ރައްޔިތުންނަށް ލިބޭ އުނިކަމެކެވެ. ކޮރަޕްޝަންގެ މައްސަލަތައް ތަހުގީގުކުރުމާއި، ވެރިކަމުގައި އެ އިރަކު ތިބޭ ފަރާތްތަކާ ސުވާލުކުރުމާއި، ބޮޑެތި މައްސަލަތަކާ ގުޅޭގޮތުން ރިޕޯޓްކުރުމަށް ނޫސްވެރިންނަށް ހުރަސްއެޅުމުން، ރައްޔިތުންނަށްވެސް ދެފުއް ފެންނަ ސަރުކާރެއް ފެނިގެން ދިއުމަށް އޮތް ދޮރުތައް ބަންދުވެގެން ދެއެވެ.

މިއަދުގެ ބްލެކްއައުޓްގެ ފަހަތުގައި ތިބީ ނޫސްވެރިންނާއި، އެޑިޓަރުންނާއި، ކެމެރާމަނުންނާއި ޕްރޮޑިއުސަރުންނެވެ. އެމީހުން އެ އުނދަގޫ ނިންމުން ނިންމީ، މުސްތަގުބަލުގައި ވެސް ރައްޔިތުންނަށް މައުލޫމާތު ފޯރުކޮށްދިނުމުގެ ހައްގު ދިފާއުކުރުމަށްޓަކައި، ވަގުތީ ގޮތުން މައުލޫމާތު ފޯރުކޮށްދިނުން ހުއްޓާލުމަށެވެ. ނޫސްވެރިންނަށް ލިބެމުންދާ ގެއްލުންތަކާމެދު ނުރުހޭކަން ބުނެދިނުމަށް ކުރެވޭ އިހުތިޖާޖެއްގެ ގޮތުގައެވެ.

ހަމަ ޔަގީނުންވެސް މިއީ ފަސޭހަ ކަމެއް ނޫނެވެ. ނިއުސްރޫމްތައް ހުންނަނީ ޚަބަރު ފެތުރުމަށެވެ. ނަމަވެސް ބައެއް މީޑިއާތަކުން މި އުނދަގޫ ނިންމުން ނިންމީ މީޑިއާ ނެތް ދުވަހަކު ގައުމުގެ ހާލަތު އޮންނާނެ ގޮތް ރައްޔިތުންނަށް އިހުސާސް ކޮށްދިނުމަށްކަމަށް ވެސް ވެދާނެއެވެ. މަދު ގަޑިއިރުތަކަކަށް ނަމަވެސް، މިނިވަން ނޫސްވެރިކަމެއް ނެތް ގައުމެއް ފެންނާނެ ގޮތުގެ ކުޑަ މަންޒަރެއް މި ބްލެކްއައުޓުން ފެނިގެން ގޮސްފިއެވެ.