ހަނގުރާމައާއި ގުޅިގެން ރައީސް މުއިއްޒުގެ ސަރުކާރުން އުޅެނީ ކަންކަމުގައި މަތިޖަހަން: ނަޝީދު
މެދުއިރުމަތީގެ ހަނގުރާމައިގެ ސަބަބުން ރާއްޖޭގެ އިގްތިސާދަށް ކުރާ ނޭދެވޭ އަސަރުތަކުން ސަލާމަތްވުމަށް ސަރުކާރުން މަސައްކަތް ނުކުރާ ކަމަށް ވިދާޅުވެ، ކުރީގެ ރައީސް މުހައްމަދު ނަޝީދު ސަރުކާރަށް ފާޑުވިދާޅުވެއްޖެ. ދައުލަތުގެ މާލީ ހާލަތު ގޯސްވެ ބޭންކުތަކަށް ދަތިވެފައިވަނީ ބޭކާރު ސިޔާސީ ވަޒީފާތައް އިތުރުކުރުމުން ކަމަށާއި، މި ހަގީގަތްތައް އޮޅުވާލުމަށް ސަރުކާރުން މަސައްކަތް ކުރާ ކަމަށް އެމަނިކުފާނު ތުހުމަތު ކުރެއްވި. އަދި ގައުމަށް ބޭނުންވާ އިސްލާހީ ބަދަލުތައް ގެނެވޭނީ ހަމައެކަނި އެމްޑީޕީއަށް ކަމަށްވެސް ނަޝީދު ވިދާޅުވި.
އެމްޑީޕީ ހަރުގެ ޖަލްސާގައި ކުރީގެ ރައީސް މުހައްމަދު ނަޝީދު ވާހަކަފުޅުދައްކަވަނީ. | ރާއްޖެ އެމްވީ
މެދުއިރުމަތީގެ ހަނގުރާމައާއި ގުޅިގެން ދިވެހިރާއްޖެ އާއި ދިވެހީން ސަލާމަތުގެ އައްސޭރިއަކަށް ގެންދިއުމަށް ރައީސް ޑރ. މުހައްމަދު މުޢިއްޒުގެ ސަރުކާރުން ކަމެއް ކުރައްވާކަށް ނޫޅުއްވާ ކަމަށާއި، އުޅުއްވަނީ ކަންކަމުގައި މަތިޖަހައި ކަންކަން ފޮރުވަން ކަމަށް އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ކުރީގެ ރައީސް މުހައްމަދު ނަޝީދު ވިދާޅުވީ، މެދުއިރުމަތީގައި އުފެދިފައިވާ ހަނގުރާމައިގެ ސަބަބުން ދުނިޔެއަށް ބޮޑު ނުތަނަވަސްކަމެއް ކުރިމަތިވެފައިވާ އިރު، ރާއްޖޭގެ އިގްތިސާދު ބަރޯސާވެފައިވާ ފަތުރުވެރިކަމުގެ ސިނާއަތަށް މީގެ ނޭދެވޭ އަސަރު ކުރަމުންދާ ކަމަށެވެ. ދަތުރުފަތުރު ކުރުމަށް ދަތިތަކެއް ކުރިމަތިވެފައިވާ މި ދަނޑިވަޅުގައި، ދިވެހިރާއްޖެ ސަލާމަތުގެ އައްސޭރިއަކަށް ގެންދިއުމަށް ރައީސް ޑރ. މުހައްމަދު މުއިއްޒުގެ ސަރުކާރުން އެއްވެސް މަސައްކަތެއް ނުކުރައްވާ ކަމަށް އެމަނިކުފާނު ތުހުމަތު ކުރެއްވިއެވެ.
ރައީސް ނަޝީދު ވިދާޅުވީ ސަރުކާރުން މަސައްކަތް ކުރަނީ ހަގީގަތް އޮޅުވާލައި، ކަންކަމުގައި މަތިޖަހައި ފޮރުވަން ކަމަށެވެ. ގައުމުގެ މާލީ ހާލަތު ގޯސްވަމުންދާކަން ފާހަގަކުރައްވައި އެމަނިކުފާނު ވިދާޅުވީ، ބޭންކް އޮފް މޯލްޑިވްސްއިން 300 މިލިއަން ޑޮލަރުގެ ލޯނެއް ނަގަން އުޅޭ ހަބަރުން ބޭންކަށް ދަތިތަކެއް ހުރިކަން ސާފުވާ ކަމަށެވެ. މީގެ ކުރިން ލޯނު ދޫކުރާ ތަނެއްގެ ގޮތުގައި އޮތް ބޭންކުން މިއަދު ލޯނު ނަގަން ޖެހުނީ، ދައުލަތުގެ ދަރަނި ދެއްކުމަށްޓަކައި ބޭންކުގައި ހުރި ރައްޔިތުންގެ ފައިސާ ސަރުކާރަށް ނެގުމުން ކަމަށް ނަޝީދު ވިދާޅުވި އެވެ. މީގެ ސަބަބުން އާންމުންގެ ބޭންކް ކާޑުތަކުން ޑޮލަރުގެ މުއާމަލާތް ނުކުރެވޭ ހިސާބަށް ކަންކަން ގޮސްފައިވާ ކަމަށްވެސް އެމަނިކުފާނު ފާހަގަކުރެއްވި އެވެ.
ޙަޤީޤަތުގައި އެ ލޯނު އަނބުރާ ދައްކަން ސަރުކާރުން ކުރަންވީ ކަމަކީ، ބޭކާރު ޚަރަދު ކުޑަކުރުން. އެހެނެއްނު ހެއްދެވީ. މަސްދޯނިފަހަރު މަހަށް ނުފުރޭ މިންވަރަށް ރާއްޖޭގެ ރަށްތަކުގައި ތިބި ޒުވާނުން ސަރުކާރުގެ ކަމެއްނެތް މަގާމުތަކަށް ވައްދައި، އެ މީހުން އެ ތަންތަނުގައި އިށީނދެގެން އެބަ ތިބޭ ދިހަބާރަ ހާސް ރުފިޔާ، ކަމެއްނުކޮށް ތިބެ، ރަށުގައި ތިބެ ލިބޭތީ. މީގެ ހިތާމައަކީ ދިހަބާރަ ހާސް ރުފިޔާ އެއީ، ޙަޤީޤަތުގައި މީހަކަށް ދިރިއުޅުމަށް މިއަދު ބޭނުންވާ މިންވަރަށްވުރެ މާކުޑަ ޢަދަދެއް. އެބަ އެނގޭ، ކުއްޔަށް ނުލާ ވެސް، ރަށެއްގައި އުޅޭއިރުގައި، އަމިއްލަ ގެދޮރުގައި އުޅޭއިރުގައި ވެސް، ވިއްސަކަށް ހާސް ރުފިޔާ މަހެއްގެ މައްޗަށް އެބަ ޖެހެންޖެހޭ. މަހަށް ދިޔައިމަ ޖެހޭ. ވިހި ތިރީސް ހާސް ރުފިޔާ މަހެއްގެ މައްޗަށް ޖެހޭ. އެހެންނަމަވެސް، މި ރަށުގެ ޠަބީޢަތު ބަދަލުކޮށްލުމަށްޓަކައި ސަރުކާރުން ވަޒީފާތައް ދީ، އެއީ މަސައްކަތް ނުކުރާ ބަޔަކު ދިރިއުޅޭ ތަނަކަށް ހެދުމަށް ސަރުކާރުން މިދަނީ ބުރަ މަސައްކަތެއް ކުރަމުން. އެ ބޭފުޅުންނަށް ލަފާ މިވަނީ، އެ ބޭފުޅުންނަށް އިންތިޚާބުތައް ކާމިޔާބުކުރެވެން އޮތީ ދިވެހިންނަށް އޮޅުވާލައިގެން ކަމަށް.ކުރީގެ ރައީސް މުހައްމަދު ނަޝީދު
ސިޔާސީ މަސްރަހަށް އަލިއަޅުވާލައްވަމުން ނަޝީދު ވިދާޅުވީ، ރައީސް މުއިއްޒުގެ ސަރުކާރަށް މިހާރު އޮތީ 30 އިންސައްތައިގެ ތާއީދު ކަމަށާއި، އެކަން ފަހުގެ އިންތިޚާބުތަކުން ސާފުވެފައިވާ ކަމަށެވެ. ރިޝްވަތާއި ނާޖާއިޒު ފައިދާ ދީގެން އިންތިޚާބުތައް ކާމިޔާބު ކުރަން އުޅުނު ނަމަވެސް، ދިވެހި ރައްޔިތުން މިހާރު ތިބީ ހޭލާ ކަމަށާއި، ސަރުކާރާއެކު އަނދަވަޅަކަށް ވެއްޓެން ރައްޔިތުން ބޭނުންނުވާ ކަމަށް އެމަނިކުފާނު ވިދާޅުވި އެވެ.
ރައީސް ނަޝީދު އިތުރަށް ވިދާޅުވީ، ރާއްޖެއަށް މިހާރު ބޭނުންވަނީ ބޮޑު ބަދަލެއް ކަމަށެވެ. އެއީ ގާނޫނުއަސާސީއަށް ގެންނަންޖެހޭ ބަދަލުތަކުގެ އިތުރުން، މީހާގެ ވިސްނުމާއި، އަހުލާގާއި، ސުލޫކަށް ގެންނަންޖެހޭ ބަދަލެއް ކަމަށް އެމަނިކުފާނު ވިދާޅުވި އެވެ. އަދި މިފަދަ ބޮޑު ބަދަލެއް ދިވެހި މުޖުތަމައަށް ތައާރަފުކޮށްދެވޭނެ ހަމައެކަނި މުއައްސަސާއަކީ އެމްޑީޕީ ކަމަށްވެސް ރައީސް ނަޝީދު ވިދާޅުވި އެވެ.
