އަންހެނުންގެ ކޮމިޓީ މުސާރަ 48 ގަޑިއިރު ތެރޭ ތިން ފަހަރު ބަދަލުކޮށްފި: މިނިސްޓްރީ އިން ބުނީ މިއީ "ފައިނަލް" ކަމަށް
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މުސާރަ ބޮޑުކުރި މައްސަލައިގައި އާންމުންގެ ފާޑުކިއުން އަމާޒުވުމާ ގުޅިގެން، ފިނޭންސް މިނިސްޓްރީން އެ މުސާރަތައް ކުޑަކޮށް ފައިނަލް އޮނިގަނޑު އާންމުކޮށްފި. މި ބަދަލާއެކު ސިޓީތަކުގެ ކޮމިޓީ ރައީސުންގެ މުސާރަ 20،000 ރުފިޔާއަށް އަދި ރަށްރަށުގެ ކޮމިޓީ ރައީސުންގެ މުސާރަ 15،000 ރުފިޔާއަށް ވަނީ ދަށްކޮށްފަ. މުސާރައަށް މި ބަދަލު ގެނައި ނަމަވެސް، މިއީ ކުރީގެ ދައުރުތަކާ އަޅާބަލާއިރު އަދިވެސް ބޮޑު އަދަދެއް.
އަލަށް އިންތިޚާބުވި ކައުންސިލަރުން މަޤާމުގެ ހުވާކޮށް، ޑަބްލިއުޑީސީ މެމްބަރުން އިޤުރާރުގައި ސޮއިކުރުމުގެ ރަސްމިއްޔާތުގެ ތެރެއިން | މާލެ ސިޓީ ކައުންސިލް
ސިޓީތަކާއި ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މުސާރައިގެ އޮނިގަނޑު ދެ ދުވަސް ތެރޭގައި ތިން ފަހަރު މުރާޖައާ ކޮށްފައިވާއިރު، ފިނޭންސް މިނިސްޓްރީން ހުކުރު ދުވަހު ބުނީ މިއީ މި މައްސަލައިގައި ނިންމާފައިވާ "ފައިނަލް" ނިންމުން ކަމަށެވެ.
ޕޭ ކޮމިޝަނުން އަންހެނުންގެ ކޮމިޓީތަކުގެ މެންބަރުންގެ މުސާރަ މިދިޔަ ބުދަ ދުވަހު ކަނޑައަޅައި ފޮނުވިއިރު، ކައުންސިލުތަކުގެ ރައީސުންނާއި ކައުންސިލަރުންނަށް ލިބޭ މުސާރައަށް ވުރެ ވެސް ބޮޑުވުމުން ސޯޝަލް މީޑިއާގައި ގިނަ ބަޔަކު ވަނީ ސަރުކާރުގެ ސިޔާސަތުތައް ދެކޮޅު ނުޖެހޭ ކަމަށްބުނެ ފާޑުކިޔާފަ އެވެ.
ފުރަތަމަ ފޮނުވި ސާކިއުލާގައިވާ ގޮތުން، ސިޓީތަކުގެ އަންހެނުންގެ ކޮމިޓީތަކުގެ ރައީސުންގެ މުސާރައަކީ 41،500 ރުފިޔާ އަދި ރަށްރަށުގައި ތިބޭ ކޮމިޓީތަކުގެ ރައީސުންގެ މުސާރައަކީ 21،000 ރުފިޔާ އެވެ. ފާޑުކިއުންތަކާ އެކު ސިޓީތަކުގެ ރައީސުންގެ މުސާރަ 33،000 ރުފިޔާ އަށް ކުޑަކުރި ނަމަވެސް، ރަށު ރައީސުންގެ މުސާރައަށް ބަދަލެއް ނުގެނެސްފައިވެ އެވެ.
އާންމުންގެ ފާޑުކިއުންތަކާ ގުޅިގެން މުސާރަ އަށް އަނެއްކާވެސް ބަދަލު ތަކެއް ގެނެސްފައިވާއިރު، ސިޓީތަކުގެ އަންހެނުންގެ ކޮމިޓީގެ ރައީސުންގެ މުސާރައަކީ މިހާރު 20،000 ރުފިޔާ ކަމަށް ފިނޭންސް މިނިސްޓްރީ އިން ބުނެފައިވެ އެވެ. އަދި ރަށްރަށުގެ އަންހެނުންގެ ކޮމިޓީގެ ރައީސުންނަށް ދޭނީ މަހަކު 15،000 ރުފިޔާ ކަމަށް އެ މިނިސްޓްރީ އިން ހާމަކޮށްފައިވެ އެވެ.
އެހެން މެމްބަރުންގެ މުސާރައަށް މިފަހަރު ވެސް ބަދަލެއް ގެނެސްފައެއް ނުވެ އެވެ. އެހެންވެ، ކުރިއެކޭ ވެސް އެއްގޮތަށް ސިޓީތަކުގެ އަންހެނުންގެ ކޮމިޓީ މެންބަރުންނަށް 6،000 ރުފިޔާ އަދި ނައިބު ރައީސުންނަށް 7،000 ރުފިޔާ ދިނުމަށް ކަނޑައަޅާފައިވެ އެވެ. ރަށްރަށުގެ އަންހެނުންގެ ކޮމިޓީ މެންބަރުންނަށް 5،000 ރުފިޔާ އަދި ނައިބު ރައީސުންނަށް 6،000 ރުފިޔާ ދިނުމަށް ވަނީ ކަނޑައަޅާފަ އެވެ.
ނިމިދިޔަ ކައުންސިލުތަކުގެ ދައުރުގައި ސިޓީތަކުގެ އަންހެނުންގެ ކޮމިޓީ ރައީސުންގެ މުސާރައަކީ 7،000 ރުފިޔާ އަދި ރަށްތަކުގެ އަންހެނުންގެ ކޮމިޓީ ރައީސުންގެ މުސާރައަކީ 6،000 ރުފިޔާ އެވެ.
