ސަރުކާރު ހިއްސާވާ ކުންފުނިތަކުގައި 42،000 މުވައްޒަފުން އެބަތިބި: ޒަމީރު
ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކުރުމަށްޓަކައި މުވައްޒަފުންގެ އަދަދު 33 އިންސައްތަ މަދުކުރުމަށް ފިނޭންސް މިނިސްޓްރީން ވަނީ އަންގާފައި. މި ނިންމުމާ ގުޅިގެން މިނިސްޓަރު މޫސާ ޒަމީރު ވިދާޅުވީ، މުވައްޒަފުން މަދުކުރާނީ ވަޒީފާއާ ބެހޭ ގާނޫނާ އެއްގޮތަށް ކުންފުނިތަކުގެ އޮޕަރޭޝަންތަކަށް ބަލައިގެން ކަމަށް. އަދި ބައެއް ކުންފުނިތަކުން އެ މިންވަރަށް މުވައްޒަފުން މަދުކޮށްފިނަމަ ހިންގުމަށް ދަތިވާނެތީ، އެކަމުގައި ކުންފުނިތަކުގެ ހާލަތަށް ރިއާޔަތްކުރައްވާނެ ކަމަށްވެސް މިނިސްޓަރު ވިދާޅުވި.
ފިނޭންސް މިނިސްޓަރު މޫސާ ޒަމީރު. | ރައީސް އޮފީސް
ސަރުކާރު ހިއްސާވާ ކުންފުނިތަކުގައި 42،000 މުވައްޒަފުން އެބަތިބި ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
މެދުއިރުމަތީގެ ހަނގުރާމަ އާއި ގުޅިގެން ރައީސް އުފެއްދެވި ކްރައިސިސް ކޮމިޓީގެ ބައްދަލުވުމުގައި ވާހަކަ ދައްކަވަމުން ޒަމީރު ވިދާޅުވީ އެސްއޯއީތަކާ އެކު މަޝްވަރާ ކުރަމުން އަންނަ ކަމަށެވެ. އެގޮތުން އެސްއޯއީތަކުގައި އަބަދު ވެސް މުވައްޒަފުން ނެގުމާއި ވަކިކުރުން އޮންނާނެ ކަމަށާއި، ކުންފުނިތަކުގައި ގާތްގަނޑަކަށް 42،000 މުވައްޒަފުން ތިބޭނެ ކަމަށެވެ. އަދި ރައިޓްސައިޒް ކުރަން ބައެއް ކުންފުނިތަކުން 33 އިންސައްތަ މުވައްޒަފުން ނުކެނޑިދާނެ ކަމަށާއި، އައީއޭސް އިން އެހާވަރަށް މުވައްޒަފުން މަދުކުރަން ނުޖެހޭނެ ކަމަށާއި، 33 އިންސައްތަ މުވައްޒަފުން މަދުކޮށްފިނަމަ ކުންފުނި ނުހިންގޭނެ ކަމަށެވެ.
ޒަމީރު ވިދާޅުވީ 33 އިންސައްތަ މަދު ނު ކުރެވޭނެ ކުންފުނިތައް ވެސް ހިމެނޭ ކަމަށެވެ. އަދި މިހާރު ހުރި އޮޕަރޭޝަންސް އަށް ބަލާފައި ރައިޓްސައިޒް ކުރުން އެއީ ކުރާނެ ކަމެއް ކަމަށާއި، އެކަން ކުރަން ނިންމާފައި ވަނީ މާދަމާ ހެނދުނު އިރު އަރާއިރު އެވަރަށް މީހުން ކެނޑުމެއް ނޫން ކަމަށެވެ. އޭނާ ވިދާޅުވީ މުވައްޒަފުން މަދުކުރަން އަންގާފައި ވާނީ އެމްޕްލޯއިމަންޓް ގާނޫނާ އެއްގޮތަށް އެކަން ކުރުމަށް ކަމަށާއި، މިކަމުގެ ސަބަބުން މީހުންނަށް ވާނެ އުނދަގޫތަކަށް ބަލައިގެން އެކަން ކުރާނެ ކަމަށެވެ.
އަޅުގަނޑުމެންގެ އެސްޓިމޭޓަކީ 42،000 ތިބޭނެޔޭ ހުރިހާ އެސްއޯއީތަކުގައި ވަޒީފާގައި. ޕީސީބީން އެކަމަކު އެ ޑޭޓާ ބަލަހައްޓާނީ، މި ދެންނެވީ އިންޑިވިޖުއަލް ކުންފުނިތަކުން ބަލަހައްޓާނީ. އެކަމަކު އަޅުގަނޑުމެންގެ މިހާރު އެސްޓިމޭޓަކީ 42،000 ތިބޭނެޔޭފިނޭންސް މިނިސްޓަރު މޫސާ ޒަމީރު
ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު %33 މަދުކުރުމަށާއި ތައުލީމާއި ހުނަރާއި ގާބިލުކަމަށް ބަލައިގެން ވަޒީފާތަކަށް މީހުން ނެގުމަށް ފިނޭންސް މިނިސްޓްރީން، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް ބުރާސްފަތި ދުވަހު ވަނީ އަންގާފަ އެވެ.
މިނިސްޓްރީން ބުނި ގޮތުގައި، އެކަން އެގޮތަށް ކުރަން އަންގާފައިވަނީ، ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް، ނަތީޖާ ނެރުން އިތުރުކުރުމަށެވެ.
