ސިޓީތަކުގެ އަންހެނުންގެ ކޮމެޓީ ރައީސުންނަށް މަހަކު 41،000 ރުފިޔާ އަދި ރަށްރަށުގެ ރައީސުންނަށް މަހަކު 21،000 ރުފިޔާ ދޭން ނިންމައިފި
އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަކީ ފުލްޓައިމްކޮށް މަސައްކަތްކުރާ ބައެއްގެ ގޮތުގައި ކަނޑައަޅައި، އެ ކޮމެޓީތަކުގެ ރައީސުންނާއި ނައިބު ރައީސުންގެ މުސާރަ ބޮޑުކުރުމަށް ޕޭ ކޮމިޝަނުން ވަނީ ނިންމާފަ. ޕޭ ކޮމިޝަނުން މިހާރު ނިންމާފައިވަނީ ސިޓީތަކުގެ އަންހެނުންގެ ކޮމެޓީގެ ރައީސުންގެ މުސާރައަށް މަހަކު 41،500ރ. ދިނުމަށާއި އަދި ރަށްރަށުގެ އަންހެނުންގެ ކޮމެޓީތަކުގެ ރައީސުންނަށް މަހަކު 21،000ރ. ދިނުމަށް.
އަލަށް އިންތިޚާބުވި ކައުންސިލަރުން މަޤާމުގެ ހުވާކޮށް، ޑަބްލިއުޑީސީ މެމްބަރުން އިޤުރާރުގައި ސޮއިކުރުމުގެ ރަސްމިއްޔަތުގެ ތެރެއިން | މާލެ ސިޓީ ކައުންސިލް
ސިޓީތަކާއި ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ (ޑަބްލިއުޑީސީ) ރައީސުންގެ މުސާރަ އެތައް ގުނައެއް ބޮޑުކުރަން ނޭޝަނަލް ޕޭ ކޮމިޝަނުން ނިންމައިފި އެވެ.
ޕޭ ކޮމިޝަނުން ނިންމާފައިވާ ގޮތުގައި ސިޓީތަކުގެ އަންހެނުންގެ ކޮމެޓީގެ ރައީސުންގެ މުސާރައަށް މަހަކު 41,500 ރުފިޔާ ލިބޭނެ އެވެ. މީގެ ތެރޭގައި ހިމެނެނީ 33,000 ރުފިޔާގެ އަސާސީ މުސާރައާއި 8,500 ރުފިޔާގެ ލިވިން އެލަވަންސެވެ. މީގެ ކުރިން ސިޓީތަކުގެ ރައީސުންނަށް ލިބެމުން އައީ މަހަކު 7,000 ރުފިޔާ އެވެ.
ރަށްރަށުގެ އަންހެނުންގެ ކޮމެޓީތަކުގެ ރައީސުންގެ މުސާރަ 6,000 ރުފިޔާ އިން 21,000 ރުފިޔާ އަށް ވަނީ ބޮޑުކޮށްފަ އެވެ. އެއީ 16,500 ރުފިޔާގެ އަސާސީ މުސާރައާއި 4,500 ރުފިޔާގެ ލިވިން އެލަވަންސެވެ.
މީގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ނައިބު ރައީސުންނާއި މެމްބަރުންގެ މުސާރައަށް ވެސް ބަދަލުތަކެއް ގެނެސްފައިވެ އެވެ. ސިޓީތަކުގެ އަންހެނުންގެ ކޮމެޓީތަކުގެ ނައިބު ރައީސުންގެ މުސާރަ 7،000 ރުފިޔާ އަށް ބޮޑުކުރުމުގެ އިތުރުން ބައިވެރިވާ ކޮންމެ ބައްދަލުވުމަކަށް 500 ރުފިޔާގެ އެލަވަންސެއް ދިނުމަށް ނިންމާފައިވެ އެވެ. އަދި ރަށްރަށުގެ ކޮމެޓީތަކުގެ ނައިބު ރައީސުންގެ މުސާރަ 6،000 ރުފިޔާއަށް ބޮޑުކުރުމުގެ އިތުރުން ބައިވެރިވާ ކޮންމެ ބައްދަލުވުމަކަށް އިތުރު 500 ރުފިޔާގެ އެލަވަންސެއް ދިނުމަށް ނިންމާފައިވެ އެވެ.
ސިޓީތަކާއި ރަށްރަށުގެ އަންހެނުންގެ ކޮމެޓީގެ މެމްބަރުންގެ މުސާރަ ބޮޑު ނުކުރި ނަމަވެސް އެ މީހުންނަށް ވެސް ބައިވެރިވާ ކޮންމެ ބައްދަލުވުމަކަށް 500 ރުފިޔާގެ އިތުރު އެލަވަންސެއް ދިނުމަށް ޕޭ ކޮމިޝަނުން ވަނީ ނިންމައިފަ އެވެ.
މުސާރައަށް ބަދަލު ގެނައިކަން އަންހެނުންގެ ކޮމެޓީތަކުގެ ރައީސުންނާއި މެމްބަރުންނަށް ހޮވުނު މީހުންނަށް ވެސް މިހާރު ވަނީ އަންގާފަ އެވެ.
މި ބަދަލާއެކު ސިޓީތަކުގެ އަންހެނުންގެ ކޮމެޓީތަކުގެ މެންބަރުންގެ މުސާރައަށް ކޮންމެ އަހަރަކު 6 މިލިއަން ރުފިޔާ އާއި ރަށްރަށުގެ ކޮމެޓީތަކުގެ މެންބަރުންގެ މުސާރަ އަށް އަހަރަކަށް 73 މިލިއަން ރުފިޔާ ހަރަދުވާނެކަމަށް ލަފާކުރެވެ އެވެ.
ލާމަރުކަޒީ ގާނޫނަށް މި ފަހުން ގެނައި އިސްލާހުގައިވާ ގޮތުން އަންހެނުންގެ ކޮމެޓީތަކުގެ މެންބަރުންގެ މުސާރަ ކަނޑައަޅަން ޖެހެނީ ޕޭ ކޮމިޝަނުންނެވެ. ޕޭ ކޮމިޝަނުން މުސާރަ ކަނޑައެޅުމަށްފަހު އެ ކޮމިޝަނުގެ ރައީސް އަދި ފިނޭންސް މިނިސްޓަރު މޫސާ ޒަމީރު ވަނީ ލޯކަލް ގަވަރުމެންޓް އޮތޯރިޓީގެ ސީއީއޯ މުހައްމަދު ނިމާލަށް ސިޓީއެއް ފޮނުވާފަ އެވެ.
