ނާޒިމް މަޤާމުން ވަކިކުރުމަށް ނަގާ ވޯޓު ސިއްރު ނުކުރަނީ ވޯޓުގެ ހާމަކަން ބޮޑުކުރަން: ޝާހިދު
މި މަހުގެ 14 ވަނަ ދުވަހު ނާޒިމް މަގާމުން ވަކިކުރުމުގެ ގަރާރެއް ލިބިފައިވާ ކަމަށް މަޖިލީހުގެ އިދާރާއިން ވަނީ ބުނެފަ. މަޖިލީހުގެ އާއްމު ކޮމިޓީ އިން ފާސްކުރީ އެ މައްސަލައިގެ ބަހުސް އަށް 50 މިނިޓު ދިނުމަށާއި މެމްބަރަކަށް ބަހުސްގައި 3 މިނިޓުގެ 1 ފުރުސަތު ދިނުމަށް.
ހުޅުދޫ ދާއިރާގެ މެމްބަރު މުހައްމަދު ޝާހިދު މަޖިލީހުގެ ތަޅުމުގައި ވާހަކަދައްކަވަނީ | ރައްޔިތުންގެ މަޖިލިސް
ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމްގެ އިތުބާރު ނެތް ކަމުގެ މައްސަލައިގައި ނަގާ ވޯޓު ސިއްރު ނުކުރަނީ ވޯޓުގެ ހާމަކަން ބޮޑުކުރަން ކަމަށް މަޖިލީހުގެ އާއްމު ކޮމިޓީގެ މުގައްރިރު އަދި ހުޅުދޫ ދާއިރާގެ މެމްބަރު މުޙައްމަދު ޝާހިދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމްގެ އިތުބާރު ނެތް ކަމަށް ހުށަހަޅާފައިވާ ގަރާރަށް ބަހުސް ކުރުމަށް 50 މިނިޓު އަދި ޖަވާބުދާރީ ވާން 10 މިނިޓު ދިނުމަށް މަޖިލީހުގެ އާއްމު ކޮމިޓީ އިން ވަނީ ބުދަ ދުވަހު ހަވީރު ނިންމާފަ އެވެ.
އެ ބަހުސްގެ ވަގުތާ މެދު ކޮމިޓީގައި ވާހަކަދައްކަވަމުން، މާވަށު ދާއިރާގެ މެމްބަރު އަހުމަދު ޝާކިރު ވަނީ ނާޒިމް އަށް 10 މިނިޓު ދޭން ނިންމި ސަބަބާއި ގުޅޭ ގޮތުން ސުވާލުކޮށްފަ އެވެ. 10 މިނިޓަކީ ޖަވާބުދާރީ ވާން އެންމެ އެކަށީގެންވާ ވަގުތު ތޯ ވެސް އޭނާ ސުވާލު ކުރެއްވި އެވެ. ހަމައެހެންމެ މަޖިލީހުގެ ނައިބު ރައީސް އައްޔަން ކުރަނީ ސިއްރު ވޯޓަކުން ކަމަށް ވާއިރު އެ މަޤާމުގައި ހުންނަ މީހާ ވަކިކުރުމަށް ނަގާ ވޯޓު ސިއްރު ނުކުރާ ސަބަބާއި މެދުގައި ވެސް އޭނާ ވަނީ ސުވާލު އުފައްދަވާފަ އެވެ.
ޝާކިރުގެ އެ ސުވާލަށް ޖަވާބުދެއްވަމުން، އެ ހުށަހެޅުއްވުން ހުށަހެޅުއްވި ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ވިދާޅުވީ ޖަވާބުދާރީ ވާން ވަކި ވަރަކަށް ވަގުތު ދިނުމަށް ގަވާއިދުގައި ހިމަނާފައި ނުވާތީ އެ ގޮތަށް ހުށަހެޅީ ކަމަށެވެ. އަދި ކޮމިޓީގެ މުގައްރިރު ޝާހިދު ވަނީ ނާޒިމް އަށް ޖަވާބުދާރީ ވާން ލިބޭ 10 މިނިޓު ބަހުސް ފަށާ އިރު 5 މިނިޓު އަދި ބަހުސްގެ މެދުތެރެއިން 5 މިނިޓު ދިނުމަށް ނިންމި ދާނެ ކަމަށް ވިދާޅުވެފަ އެވެ. ހަމައެހެންމެ މަދުވެގެން ދޭން ޖެހޭ ވަގުތެއް ގަވާއިދުގައި ހިމަނާފައި ނެތް ކަމަށް ފާހަގަކުރައްވާ ޝާހިދު ވަހީ ނާޒިމް އަށް ޖަވާބުދާރީވުމަށް 10 މިނިޓު ދިނުމުގައި މައްސަލަ އެއް ނެތް ކަމަށް ދޭހަވާ މޭރުމަކުން ވާހަކަދައްކަވާފަ އެވެ.
މީގެ އިތުރުން މަޖިލީހުގެ ނައިބު ރައީސް އައްޔަން ކުރުމަށް ނަގާ ވޯޓު ސިއްރު ވި ނަމަވެސް އެ މަޤާމުގައި ހުންނަ މީހާ ވަކި ކުރާ އިރު ނަގާ ވޯޓު ސިއްރު ނުކުރަނީ ވޯޓުގެ ހާމަކަން ބޮޑު ކުރުމަށް ކަމަށް ޝާހިދު ވިދާޅުވި އެވެ.
މަޖިލީހުގެ އާއްމު ކޮމިޓީ އިން ފާސްކުރީ އެ މައްސަލައިގެ ބަހުސް އަށް 50 މިނިޓު ދިނުމަށާއި މެމްބަރަކަށް ބަހުސްގައި 3 މިނިޓުގެ 1 ފުރުސަތު ދިނުމަށެވެ.
މި މަހުގެ 14 ވަނަ ދުވަހު ނާޒިމް މަގާމުން ވަކިކުރުމުގެ ގަރާރެއް ލިބިފައިވާ ކަމަށް މަޖިލީހުގެ އިދާރާއިން ވަނީ ބުނެފަ އެވެ. އަދި އެ މައްސަލަ ގާނޫނު އަސާސީއާއި ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން ކުރިއަށްގެންދާނެ ކަމަށް މަޖިލީހުގެ އިދާރާއިން ވަނީ ހަމަ އެ ދުވަހު ބުނެފަ އެވެ.
