ދައުރު ދަންމާލައިގެން ކުރަން ޖެހޭ "މުހިއްމު މަސައްކަތަކީ" ނާޒިމް ވަކިކުރުން

20 ވަނަ ރައްޔިތުންގެ މަޖިލީހަކީ ހުރިހާ ގޮތަކުން ވެސް ތަފާތު މަޖިލީހެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޕީއެންސީގެ "މެގަ" މެޖޯރިޓީ އޮތް މި މަޖިލީހަކީ ރައީސް މުއިއްޒަށް ސަނާ ކިޔުއްވަން މެންބަރުންތަކެއް އައްޔަނު ކުރައްވައިގެން އުޅޭ މަޖިލީހެއްތޯ ހިތަށްއަރާ ފަހަރު ވެސް މަދެއް ނޫނެވެ. ސަރުކާރުން ބިލެއް ހުށަހަޅައިފި ނަމަ އޮންނަނީ ރައީސަށް ފަށްފަށުން ޝުކުރު ދެންނެވުމެވެ. އެއީ ބިލަށް އެ ބޭފުޅުން ކުރައްވާ ބަހުސެވެ. 2 ގަޑިއިރުން ބަހުސް ނިންމަވާލައްވަން ފަރިތަ މި މަޖިލީހުން ކޮމިޓީ މަރުހަލާގައި ކުރާ މަސައްކަތް އަދި މާ ޚާއްސަ އެވެ. 

މުހިއްމު، ބޮޑެތި ގާނޫނުތަކަށް އިސްލާހު ގެނައުމުން ފެށިގެން ގޮސް ގާނޫނު އަސާސީ އިސްލާހު ކުރުމަށް ވެސް ކޮމިޓީގައި އެ ހޭދަކޮށްލަނީ 5 ވަރަކަށް މިނެޓެވެ. ހައިރާންވަނީ މާ ބޮޑު ކަމެއް ކުރަން ނޯންނަ، ބައެއްް ބިލުތައް އިސްލާހު ކުރަން މަސް ދުވަހަށް ވުރެ ގިނަ ދުވަސް ނަގާތީ އެވެ. 

މި އަހަރުގެ ފުރަތަމަ ދައުރަށް ބަލާއިރު ވެސް ބާއްވާފައި ވަނީ އެންމެ 19 ޖަލްސާ އެވެ. 2 މަސް ދުވަހުގެ ޗުއްޓީއަކަށް ފަހު މި އަހަރަށް މަޖިލިސް ހުޅުވީ މި އަހަރުގެ ފެބްރުއަރީ މަހުގެ 5 ވަނަ ދުވަހު އެވެ. ޖަލްސާތައް ނުބާއްވާ ޖަލްސާތައް ކެންސަލް ކުރަމުން ދިއަ ސަބަބު ވެސް ހާމަކުރާކަހަލަ ޚިޔާލެއް ނެތެވެ. މި އަހަރުގެ ފުރަތަމަ ދައުރުގައި މިދިޔަ ފެބްރުއަރީ މަހުގެ 10 ވަނަ ދުވަހާ 11 ވަނަ ދުވަހު ޖަލްސާއެއް ބޭއްވުމަށް ފަހުން ދެން ބޭއްވީ އެ މަހުގެ 17 ވަނަ ދުވަހުގަ އެވެ. ދެން ޖަލްސާއެއް ބޭއްވީ ގާތްގަނޑަކަށް ތިން ހަފުތާގެ މެދުކެނޑުމަކަށްފަހު މާރިޗު 8 ގަ އެވެ. 

އަނެއްކާ ވެސް އެއްކަލަ ޖަލްސާތައް މެދުކެނޑުނެވެ. 2026 ވަނަ އަހަރުގެ ޖަލްސާތައް ވާއެއް ނުވާއެއް ނޭނގި ކެންސަލް ކުރަމުންގޮސް ޖަލްސާއެއް ނުބާއްވާތާ 35 ދުވަހަށް ފަހު މަޖިލީހުގެ ޖަލްސާތައް ދެން ފެށީ އޭޕްރީލް 13 ވަނަ ދުވަހުގަ އެވެ. ފޫހިވީމާ ކުޅޭ ކުޅިވަރެއް ގޮތަށް ބާއްވަމުން އައި ޖަލްސާތައް ބާއްވަން ޖެހޭ ގަވާއިދެއް ވެސް އޮވެ އެވެ. ނަމަވެސް އެ ގަވާއިދު ވީ ތަނެއް އެނގޭ މީހަކު ޕީއެންސީގައި ހުރިހެނެއް ހިޔެއް ނުވެ އެވެ. 

މިހާރު ކޮށްގެން މިއުޅެނީ އަދި މާ ހެއްވާ ކަމެކެވެ. 2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރު މެއި މަހުގެ 15 ވަނަ ދުވަހަށް ހަމަވާއިރު ގަވާއިދުގައިވާ ގޮތުގެ މަތިން ދައުރު ނިންމާ ޖަލްސާ ބާއްވަނީ އެ ދައުރުގެ ތެރޭގައި އޮންނަ ފަހު ބުރާސްފަތި ނުވަތަ ހޯމަ ދުވަހުގަ އެވެ. އެހެންކަމުން މިދިޔަ ބުރާސްފަތި ދުވަހު މަޖިލީހުގެ މިއަހަރުގެ ފުރަތަމަ ދައުރުގެ ފަހު ޖަލްސާ ބޭއްވި ނަމަވެސް ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ ވަނީ، "މުހިންމު މަސައްކަތްތަކެއް" ހުރި ކަމަށް ވިދާޅުވެ ދައުރު ދަންމާލުމަށް ހުށަހަޅުއްވައިފަ އެވެ.

ބުރާސްފަތި ދުވަހުގެ ޖަލްސާ ނިންމަވާލައްވަމުން އަބްދުއްރަހީމް ވަނީ ހޯމަ ދުވަހު ޖަލްސާ އޮންނާނެކަން އިއުލާނު ކުރައްވާފަ އެވެ. ނަމަވެސް ހޯމަ ދުވަހުގެ ޖަލްސާ ކެންސަލް ކޮށްފައިވާއިރު ޖަލްސާ ކެންސަލް ކޮށްފައިވާ ސަބަބު ހާމަ ކޮށްފައެއް ނުވެ އެވެ. ރައްޔިތުންގެ ބޮޑެތި މަސްލަހަތުތަކާ ގުޅުންހުރި މުހިންމު ބިލްތަކާއި މަސައްކަތްތައް ނިންމުމުގެ ބަހަނާގައި ދައުރު ދަންމާލި ފަހުން، ތާވަލުކުރެވުނު ޖަލްސާތަކެއް ނުބާއްވަ އެވެ. ހޯމަ ދުވަސް ގޮސް، އަންގާރަ ދުވަސް ފާއިތުވެ، ބުދަ ދުވަސް ދިޔަ އިރު ވެސް ޖަލްސާއެއްގެ ހިލަމެއް ނެތެވެ. ކެންސަލް ކުރީ ކަމެއް، ބާއްވަން ބޭނުން ނުވަނީ ކަމެއް ވެސް ނޭނގެ އެވެ. އެންމެ ކުޑަ މިނުން އިދިކޮޅު މެންބަރުންނަށް ވެސް ވާނުވާ ނާންގަނީ އެވެ.

މިއަދު އެބުނާ "މުހިއްމު މަސައްކަތް" މިއީ ކޮން އެއްޗެއްކަން ކޮންމެވެސް ވަރަކަށް ފަހުމް ވެއްޖެ އެވެ. އިދިކޮޅު މެންބަރުން ތުހުމަތު ކުރައްވާ ގޮތަށް ދައުރު ދަންމާލީ މަސައްކަތެއް ކުރަން ކަމަށް ނުވެދާނެ އެވެ. ނަމަވެސް މިއީ ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމްގެ އިތުބާރު ނެތް ކަމަށް ހުށަހަޅާފައިވާ މައްސަލަ ވީ އެންމެ އަވަހަކަށް ނިންމާލުމަށް ކޮށްގެން އުޅޭ ކަމަކަށް ވެދާނެ އެވެ. 

ތަޅުން ފަޅުކޮށް ބޭއްވުމަށްފަހު ރައްޔިތުންގެ މަޖިލީހުގެ އާންމު ކޮމިޓީގެ ބައްދަލުވުމެއް އެޖެންޑާ ކޮށްފި އެވެ. ނައިބު ރައީސް ނާޒިމް ވަކިކުރުމުގެ މަސައްކަތް ކުރިއަށް ގެންދިއުމަށެވެ. މަޖިލީހުގެ އާންމު ކޮމިޓީން މިހާރު ދަނީ ނައިބު ރައީސް އަހުމަދު ނާޒިމް ވަކިކުރުމުގެ ގަރާރުގެ ބަހުސް ކުރިއަށް ގެންދާނެ ގޮތުގެ އެންމެހާ އިންތިޒާމުތައް ހަމަޖައްސަމުންނެވެ. މީގެ ތެރޭގައި ބަހުސްގައި ވާހަކަދައްކާނެ މެންބަރުންގެ އަދަދާއި، ކޮންމެ މެންބަރަކަށް ލިބޭނެ ވަގުތުގެ އިތުރުން، ނައިބު ރައީސްއަށްާ އަމިއްލަ ދިފާއުގައި ވާހަކަދެއްކުމަށް އެރުވޭނެ ފުރުސަތުތައް ކަނޑައެޅުމަށް މި ވަނީ ނިންމާފަ އެވެ.

އެންމެ ކަމެއްގެ ބޭނުމުގައި މިގޮތަށް ކޮމިޓީ މަރުހަލާގެ އިދާރީ ކަންކަން ބާރަށް ކުރިއަށްދާއިރު ވެސް، މުޅި މަޖިލީހުގެ ސާފު އަޣުލަބިއްޔަތުން ރައްޔިތުންނަށްޓަކައި ކުރަންޖެހޭ އަސާސީ ގާނޫނީ މަސައްކަތްތައް އޮތީ މުޅިން ހުއްޓިފަ އެވެ. ދައުރު ދަންމާލުމަށް ފަހު "މުހިއްމު މަސައްކަތް" ކުރަން ޖަލްސާއެއް ބޭއްވިފައި ނުވުމަކީ، މަޖިލީހުގެ މުޅި ނިޒާމު ހަމައެކަނި ވަކި ފަރާތެއް މަގާމުން ދުރުކުރުމުގެ ސިޔާސީ އެޖެންޑާއަކަށް ހުސްވެފައިވާ ކަމުގެ ސާފު ހެއްކެކެވެ. މި އަހަރުގެ ފުރަތަމަ ދައުރުން އެކަނިވެސް ހާމަވީ ހަމަ އެންމެ ކަމެކެވެ. 20 ވަނަ މަޖިލީހަ އެންމެ ބޭފުޅަކު ޖައްސަވާ ބެރަކަށް ނަށަން ހޭވައްލާ ތައްޔާރަށް ތިބި މެންބަރުންތަކެއް ތިއްބެވި ތަނެއްކަމެވެ. އިދިކޮޅު މެންބަރުން ފިޔަވަ އެވެ.