ޕީއެންސީގެ އެތެރޭގައި މި ހިނގަނީ ކޮން ކަންތައްގަނޑެއް؟

ރާއްޖޭގައި އޮންނަނީ ދެ މޫސުމެވެ. ހުޅަނގު މޫސުމާ އިރުވައި މޫސުމެވެ. ބައެއް ގައުމުތަކަށް 4 މޫސުން އަންނަ އިރު ސަރުކާރު ހިންގާ ޕީޕަލްސް ނެޝެނަލް ކޮންގްރެސް (ޕީއެންސީ) އަށް ވެސް އަންނަ މޫސުންތަކުގެ އަދަދު ބުނެދެވޭނެ މީހަކު ހުރި ހެނެއް ހިޔެއް ނުވެ އެވެ. އެ ޕާޓީ އަށް އަންނަ ބައެއް މޫސުން ތަކުގައި ކަމުގޮސް، ނިކަން ރަނގަޅު ވެގެން އުޅޭ މީހުންނަށް ދެން އަންނަ މޫސުމުގައި ކުރިމަތިލާން ޖެހެނީ ބާކީ ކަމާއި، އެކަނިވެރިކަމާ އެވެ. ޕީއެންސީ އަށް މީހުން ރަނގަޅުވުމާ ކަމުދިޔުމާއި، ބާރު ދިނުމާއި، ބާރުތައް އަތުލުން ވެސް ގުޅިފައި ވަނީ މިބުނާ މޫސުންތަކާ އެވެ. 

އެންމެ ފުރަތަމަ ފެނިގެން ދިޔައީ ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ ވަރެއް މި ސަރުކާރަށް ނެތިގެން އުޅުއްވި މަންޒަރެވެ. ރައީސް ޑރ. މުހައްމަދު މުއިއްޒު ވެރިކަމަށް ގެނައުމަށް އެންމެ ބުރަ މަސައްކަތެއް ކުރެއްވި އެއް ބޭފުޅަކީ ވެސް އަބްދުއްރަހީމް ކަމަށް އޭނާ ވަނީ ވިދާޅުވެފަ އެވެ. ޕޯޑިއަމްގައި ގަދަ ބަސް ވިދާޅުވުމާއި މުއިއްޒު ވެރިކަމަށް ގެންނަން މޮޅެތި ހިސާބުތައް ޖެއްސެވި ކަަމަށް އޭނާ ވިދާޅުވިއިރު އޭރު އަބްދުއްރަހީމަށް އޮތީ ވަރުގަދަ ބާރެކެވެ. 

މީހުން އައްޔަނު ކުރުމާއި، މީހުން ވަކި ކުރުމުގެ ބާރެވެ. މީހުންނަށް ރުހުން ދިނުމުގެ ބާރެވެ. ޕީއެންސީގެ ޖަލްސާތައް ކުރިއަށް ގެންދިއުމުގެ ބާރެވެ. ޖަލްސާތަކުގައި ވާހަކަދެއްކެވުމުގެ ބާރެވެ. ބައެއް ވުޒާރާތަކުގެ މިނިސްޓަރުން ފެންވަރުގެ މަގާމުތަކަށާއި ސްޓޭޓް މިނިސްޓަރުންފެންވަރުގެ މަގާމުތަކަށް ވެސް ބޭފުޅުން އައްޔަން ކުރައްވަމުން ގެންދެވީ އަބްދުއްރަހީމްގެ ލަފާގެ މަތިންނެވެ. އަބްދުއްރަހީމަކީ އޭރު ނެތްވަރުގެ މޮޅު "އެޑްވައިޒަރ" އެކެވެ. ޚުދު މުއިއްޒު ސަރުކާރުގެ އެންމެ މުހިންމު އެއް ވުޒާރާ ކަމުގައިވާ ޓޫރިޒަމް މިނިސްޓަރު ކަން ދެއްވީ ވެސް އަބްދުއްރަހީމްގެ ދަރިކަލުންނަށެވެ.

ނަމަވެސް މަންޒަރު ބަދަލުވަމުން ބަދަލުވަމުން ގޮސް އަބްދުއްރަހީމްގެ ދަރިކަލުން ވަޒީރުކަމުން ވަކިކުރި އެވެ.  ޕީއެންސީން ރެކޯޑް ހެއްދެވިކަމަށް ބުނާ ބޮޑު ޖަލްސާ ނިންމާލީ އަބްދުއްރަހީމަށް އަނގައިން ބުނާނެ ފުރުސަތެއް ނުދީ އެވެ. ކުރިން ކީ ލަވަ ބަދަލުވީ ވަރު ހާމަވީ، ރައީސް މުއިއްޒުގެ ތަގުރީރުންނެވެ. އަބްދުއްރަހީމް ގެ ބުރަ މަސައްކަތުން ވެރިކަމަށް އާދެވުނު ކަމަށް ވިދާޅުވި ރައީސް އެ ރޭ ވިދާޅުވީ އަމިއްލަ އަށް ކަންކަން ކުރެއްވި ވާހަކަ އެވެ. އެއްކަލަ މޮޅު އެޑްވައިޒަރުގެ ނަން ވެސް ވިދާޅުނުވި އެވެ. 

އޭގެ ފަހުން މަޖިލީހުގައި ވެސް އަބްދުއްރަހީމް ފެނުނީ ގައިދުކޮށް، ބާކީ ކޮށްފައިވާ ދޫންޏެއްގެ ގޮތުގަ އެވެ. ބާކީ ކުރަމުން ކުރަމުން ގޮސް އޭނާ މަޖިލީހުގެ ރައީސް ކަމުގެ މަގާމުން ވަކި ކުރަން އުޅޭ ކަމުގެ އަޑުތައް ވެސް ގަދަވި އެވެ. 

އެ ވަގުތަކީ ރައީސް މުއިއްޒުގެ ދެބެންގެދެދަރި ބޭފުޅެއް ކަމަށްވާ ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހްމަދު ނާޒިމް ގެ މޮޅު ކަމާ، ހިންގުންތެރިކަމުގެ ވާހަކަ ދެއްކުން އިތުރުވެގެން ދިޔަ ވަގުތަކަށެވެ. މި ސަރުކާރުން ޚާއްސަ އިސްކަމެއް ދީގެން މަސައްކަތް ކުރި މީޑިއާ ކޮންޓްރޯ ބިލުގެ ކަންކަމުގައި އިސްކޮށް އުޅުއްވި އެއް ބޭފުޅަކީ ނާޒިމް އެވެ. އޭރު ނާޒިމް އަކީ ސަރުކާރުގެ ސިޔާސަތުތައް ދިފާއުކުރެއްވި ވަރުގަދަ ޝަހުސިއްޔަތެކެވެ. މަޖިލީހުގެ އެންމެ މުހިއްމު ދެ ކޮމިޓީގައި ވެސް ނާޒިމް ކުރައްވާ މަސައްކަތް ވަކިން ފާހަގަ ކުރެވުނެވެ. އެންމެ ފަހުން މަޖިލީހުގެ ރައީސް އަބްދުއްރަހީމް އަބްދުﷲ އަށް ވުރެ ބޮޑަށް ނާޒިމްގެ ނުފޫޒު ގަދަވެ، މަޖިލީހުގެ ރައީސްގެ މަގާމަށް ނާޒިމް އަތުވެދާނެ ކަމުގެ އަޑުތައްވެސް ފެތުރުނެވެ. 

އަނެއްކާ ވެސް މިއޮތީ މޫސުން ބަދަލުވެފަ އެވެ. ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހްމަދު ނާޒިމް އެ މަގާމުން ވަކިކުރުމަށް ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގްރޫޕުން ނިންމައިފި އެވެ. ނާޒިމް އެކަހެރި ކުރުމުގެ މަސައްކަތް ފެށިތާ ދުވަސްކޮޅެއް ވެއްޖެ އެވެ. އެންމެ ފުރަތަމަ އޭނާ ވަކި ކުރީ މަޖިލީހުގެ އެންމެ ބާރުގަދަ ދެ ކޮމިޓީ ކަމަށްވާ ސަލާމަތާ ޚިދުމަތްތަކާ ބެހޭ ކޮމިޓީ (241 ކޮމިޓީ) އާއި މާލިއްޔަތު ކޮމިޓީ އިންނެވެ. އެއަށްފަހު ޕީއެންސީގެ މެންބަރުން މުއާމަލާތްކުރާ މައި ވަޓްސްއެޕް ގްރޫޕުން ނާޒިމް ވަނީ ބޭރުކޮށްލާފަ އެވެ. އެވަރުން ނުވެގެން ނާޒިމްގެ ރިޔާސަތުގައި ޖަލްސާ ނުބޭއްވުމަށް ޕީއެންސީ ގެ މެންބަރުން ވަނީ މަޖިލީހުގެ ޖަލްސާ ވެސް ބޮއިކޮޓް ކުރައްވާފަ އެވެ.

ނާޒިމް އެކަހެރި ކުރިއިރު އަނެއްކާ ވެސް އަބްދުއްރަހީމް މުހިއްމު ވެއްޖެ އެވެ. ސަރުކާރުގެ މުހިންމު ޖަލްސާތަކާއި އިވެންޓްތަކުގައި އަބްދުއްރަހީމް ގެ އަޑު އިވެން ފަށައިފި އެވެ. ރައީސް މުއިއްޒުގެ އެންމެ އަރިސް ބޭފުޅެއްގެ ގޮތުގައި އަނެއްކާ ވެސް އޭނާ ދެއްކުމަށް މަސައްކަތް ފަށައިފި އެވެ. 

މިފަހަރުގެ މޫސުމުގައި ޕީއެންސީގެ ރާޅުތައް މާ ބޮޑަށް ވެސް ބޮޑެވެ. އާއިލީ ގުޅުމަށްވުރެ ސިޔާސީ ގުޅުންތައް މުހިއްމު ވެއްޖެ އެވެ. ނާޒިމްގެ ބަސްވިކުނު ދުވަސްތައް ނިމުމަކަށް އައި އިރު، މި މޫސުމުގައި ޕީއެންސީގެ ތަރި އަކަށް ވެގެންދާނީ ކާކުތޯ ހިތަށް އަރާނެ ލައްކަ މީހުން ތިބޭނެކަން ޔަގީނެވެ.