މަޖިލީހުގެ ފުރަތަމަ ދައުރު ދިގުދަންމާލައިފި
މަޖިލީހުގައި ނުނިމި ހުރި މުހިންމު މަސައްކަތްތައް ނިންމުމަށްޓަކައި، މި ހިނގާ ފުރަތަމަ ދައުރު މި މަހުގެ 31 ވަނަ ދުވަހުގެ ނިޔަލަށް ދަންމާލުމަށް 58 މެންބަރުންގެ ވޯޓާއެކު ވަނީ ފާސްކޮށްފައެވެ. ގަވާއިދުގައިވާ ގޮތުން މި ދައުރު މި މަހުގެ 15 އަށް ހަމަވި ނަމަވެސް، މަސައްކަތްތައް ނުނިމި ހުރުމުން ދައުރު އިތުރުކުރުމުގެ އިޚުތިޔާރު މަޖިލީހަށް ލިބިގެންވެއެވެ. މި ނިންމުން ނިންމާފައިވަނީ މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލައެއްވެސް ހުށަހަޅާފައިވާ ދަނޑިވަޅެއްގައެވެ.
ދިވެހިރާއްޖޭގެ ރައްޔިތުންގެ މަޖިލިސް ކުރާގެ | ރާއްޖެއެމްވީ
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ދިގުދަންމާލައިފިއެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި ނިންމަންޖެހޭ މުހިންމު މަސައްކަތްތަކެއް ހުރުމުން، ދައުރުގެ މުއްދަތު މި މަހުގެ 31 ވަނަ ދުވަހުގެ ނިޔަލަށް އިތުރުކުރުމަށް ފާސްކޮށްފައިވަނީ ބުރާސްފަތި ދުވަހުގެ ޖަލްސާގައެވެ.
ބުރާސްފަތި ދުވަހުގެ ޖަލްސާގައި އެކަމަށްޓަކައި ނެގުނު ވޯޓުގައި ބައިވެރިވެވަޑައިގެންނެވި 69 މެންބަރުންގެ ތެރެއިން 58 މެންބަރުން ވަނީ ދައުރު އިތުރުކުރަން ފެންނަކަމަށް ވޯޓުދެއްވާފައެވެ. ދައުރު ދަންމާލުމާ ދެކޮޅަށް ވޯޓުދެއްވީ 11 މެންބަރުންނެވެ.
އަހަރެއްގެ ފުރަތަމަ ދައުރު ކުރިއަށްދާނީ ފެބްރުއަރީ މަހުގެ އެއްވަނަ ދުވަހުން ފެށިގެން މެއި މަހުގެ 15 ވަނަ ދުވަހުގެ ނިޔަލަށް ކަމަށާއި، ނަމަވެސް ދައުރު ހަމަވާއިރު މަޖިލީހަށް ހުށަހަޅާފައިވާ މުހިންމު މަސައްކަތްތައް ނުނިމި ހުރެއްޖެނަމަ، މަޖިލީހުގެ ނިންމުމަކުން ދައުރުގެ މުއްދަތު އިތުރުކުރެވޭނެކަމަށް މަޖިލީހުގެ ޤަވާއިދު ބުނެއެވެ.
މަޖިލީހުގެ މިދިޔަ ދުވަސްތަކުގައި ގިނަ ޖަލްސާތަކެއް އެކި ސަބަބުތަކާހުރެ ކުރުކޮށް، ޖަލްސާތައް ކެންސަލް ކުރަމުންދިޔަ ނަމަވެސް، މިހާރު ދައުރު ދިގު ދަންމާލުމަށް ފާސްކޮށްފައި މިވަނީ ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަޙުމަދު ނާޒިމްގެ އިތުބާރު ނެތް ކަމުގެ މައްސަލަވެސް ފެންމަތިވެފައިވާ ދަނޑިވަޅެއްގައެވެ.
