ރާއްޖޭގެ ފަތުރުވެރިކަން ބޮޑުތަނުން ދަށަށް ހިނގައްޖެ

މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ބައިނަލްއަގުވާމީ ދަތުރުފަތުރަށް އެރި ބުރޫތަކާއެކު، މިދިޔަ އޭޕްރިލް މަހު ރާއްޖޭގެ ފަތުރުވެރިކަމަށް ބޮޑު ހީނަރުކަމެއް އައިސްފައިވާކަމަށް ތަފާސްހިސާބުތަކުން ދައްކައިފިއެވެ.

ތަފާސްހިސާބުތައް ދައްކާގޮތުން 2026 ވަނަ އަހަރުގެ އޭޕްރިލް މަހު ރާއްޖެއަށް ޒިޔާރަތްކޮށްފައިވަނީ 147,600 ފަތުރުވެރިންނެވެ. މިއީ 2025 ވަނަ އަހަރުގެ އޭޕްރިލް މަހު ރާއްޖެއަށް ޒިޔާރަތްކުރި 198,322 ފަތުރުވެރިންނާ އަޅާބަލާއިރު 25.6 އިންސައްތައިގެ ދަށްވުމެކެވެ. އެއީ އަދަދުގެ ގޮތުން ބަލާނަމަ 50,722 ފަތުރުވެރިންގެ މަދުވުމެކެވެ. މީގެ އިތުރުން، 168,366 ފަތުރުވެރިން ޒިޔާރަތްކުރި 2024 ވަނަ އަހަރުގެ އޭޕްރިލް މަހާ އަޅާބަލާއިރުވެސް، މިއަހަރުގެ އޭޕްރިލް މަހުގެ އަދަދު ވަނީ 12.3 އިންސައްތަ ނުވަތަ 20,766 ފަތުރުވެރިން މަދުވެފައެވެ.

މިދިޔަ މަހު ރާއްޖެއަށް ޒިޔާރަތްކުރި ޖުމްލަ މީހުންގެ އަދަދުވެސް ވަނީ ދަށަށް ގޮސްފައެވެ. އެގޮތުން 2025 ވަނަ އަހަރުގެ އޭޕްރިލް މަހު ޖުމްލަ 202,214 މީހުން ރާއްޖެއަށް ޒިޔާރަތްކޮށްފައިވާއިރު، 2026 ވަނަ އަހަރުގެ އޭޕްރިލް މަހު މި އަދަދު ވަނީ 24.4 އިންސައްތަ ދަށަށް ގޮސް 152,861 އަށް ތިރިވެފައެވެ. މިއީ 49,353 މީހުންގެ މަދުވުމެކެވެ.

އޭޕްރިލް މަހު ރާއްޖެއަށް ޒިޔާރަތްކުރި މީހުންގެ ތަފްސީލަށް ބަލާއިރު، އޭގެ ތެރޭގައި ހިމެނެނީ 147,600 ފަތުރުވެރިންނާއި، ވިޔަފާރި ބޭނުންތަކަށް އައި 1,804 މީހުންގެ އިތުރުން ކްރޫޒްލައިނާތަކުން އައި 3,457 ފަސިންޖަރުންނެވެ. މިދިޔަ މަހު ދުވާލެއްގެ މައްޗަށް ރާއްޖެއަށް އެވްރެޖްކޮށް ޒިޔާރަތްކޮށްފައިވަނީ 4,920 ފަތުރުވެރިންނެވެ.

ރާއްޖޭގެ އިގްތިސާދުގެ މައިނާރަކީ ފަތުރުވެރިކަން ކަމަށްވެފައި، ފަތުރުވެރިން އަންނަ މިންވަރަށް އަންނަ މިފަދަ ބަދަލުތަކަކީ ރިސޯޓުތަކާއި، ގެސްޓްހައުސްތަކާއި، އެއާލައިންތަކުގެ އިތުރުން ފަތުރުވެރިކަމާ ގުޅުންހުރި އެހެނިހެން ވިޔަފާރިތަކަށް ނޭދެވޭ އަސަރު ކުރާނެ ކަމެއް ކަމަށް ބެލެވެއެވެ.