މަޝްރޫޢުތައް ހުއްޓިފައި ހުންނަތާ އެތައް ދުވަހެއް! އެކަމަކު އެންމެ ފަހުން ކުށްވެރިވީ ހަނގުރާމައިގެ ހާލަތު!
މެދުއިރުމަތީގެ ހަނގުރާމައާއި ތެލުގެ އަގު ބޮޑުވުމުގެ ސަބަބުން ތަރައްޤީގެ މަޝްރޫޢުތަކަށް ހުރަސްއެޅިފައިވާ ކަމަށް ބިނާރާ ބެހޭ ވަޒީރު ވިދާޅުވި ނަމަވެސް، ގިނަ މަޝްރޫޢުތަކެއް ހަނގުރާމައިގެ މާ ކުރިން ހުއްޓިފައިވާތީ، ވަޒީރު ދައްކަވާ ވާހަކަތަކާއި މަސައްކަތްތައް ހުއްޓުނު ތާރީޚުތަކާ ދިމާނުވާކަން ފާހަގަކުރެވޭ.
ކޮންސްޓްރަކްޝަން މިނިސްޓަރ ޑރ އަބްދުﷲ މުއްތަލިބް | މަޖިލިސް
ވެރިކަމުގެ ފުރަތަމަ ދުވަހުން ފެށިގެން މަޝްރޫޢުތައް ހުރީ ހުއްޓިފަ އެވެ. އާ މަޝްރޫޢު އެއް ނުހިނގާ ތަނުގައި ކުރިން ކުރިއަށް ދިޔަ މަޝްރޫޢުތައް ވެސް ހުރީ މަޑުޖެހިފައެވެ. މަޝްރޫޢުތައް ކުރިއަށް ދަނީ އިނގިލިން ގުނާލެވޭހާ މަދުންނެވެ.
ބިނާރާ ގެދޮރުވެރިކަމާއި ޢުމްރާނީ ތަރައްޤީއާއި ބެހޭ ވަޒީރު ޑރ. ޢަބްދުﷲ މުއްޠަލިބް ދާދިފަހުން ބޭއްވި ނޫސްވެރިންގެ ބައްދަލުވުމުގައި ކުރެއްސެވީ މުޅިން އެހެން ތަސްވީރެކެވެ. މެދުއިރުމަތީގެ ހަނގުރާމައާއި ގުޅިގެން އިމާރާތްކުރުމުގެ ދާއިރާއަށް ބޭނުންވާ ސާމާނު ލިބުމުގައި ގިނަ ހުރަސްތަކެއް ދިމާވަމުންދާ ވާހަކަ ވަޒީރު ވިދާޅުވި އެވެ. އެހެންނަމަވެސް ވަޒީރު ވިދާޅުވީ މިވަގުތު ކުރިއަށްދާ މަޝްރޫޢުތައް އެއްކޮށް ހުއްޓާނުލާ ކުރިއަށް ގެންދަން މަސައްކަތް ކުރައްވާ ކަމަށެވެ.
ދެން ރައްޔިތުން ވިސްނަންވީ މަޝްރޫޢުތައް ހުއްޓުނީ ހަގީގަތުގައި ވެސް އިންތިޚާބުގެ ސަބަބުން ކަމަށްތޯ އެވެ؟ ހަގީގަތުގައި ވެސް މަސައްކަތްތައް ހުއްޓުނީ ހަނގުރާމައިގެ ސަބަބުން ތަކެތި ނުލިބިގެންތޯ އެވެ؟ ހަނގުރާނމައިގެ ސަބަބުން މަޝްރޫޢުތަކުގެ ޓައިމްލައިން އަށް ބަދަލުގެންނަން ޖެހޭ ކަމަށް ވަޒީރު ވިދާޅުވި އިރު ޓައިމްލައިނާއި އެއްގޮތަށް މީގެ ކުރިން ސަރުކާރަށް ކޮށްދެވުނު ކަމެއް ވަޒީރަށް ވިދާޅުވެދެއްވޭނެތޯއެވެ؟
މަޝްރޫޢުތައް މަޑު ޖެހުމުން ވަޒީރުގެ ބަހަނާ އަކީ ނުވަތަ ސަބަބަކީ ތެލުގެ އަގު ދެގުނައަށް ބޮޑުވުމާއި ގުޅިގެން ގިނަ ޢަދަދެއްގެ ތެޔޮ ބޭނުންކޮށްގެން ކުރާ މަސައްކަތްތަކަށް ހުރަސް އެޅޭ ވާހަކަ އެވެ. އެގޮތުން ބިން ހިއްކުމާއި ބަނދަރު ހެދުން ފަދަ މަސައްކަތްތައް މަޑު ޖެހޭނެ ވާހަކަ ވަޒީރު ވިދާޅުވި އެވެ. ކޮންމެހެންވެސް ޚަރަދު ކުޑަކުރަން ޖެހޭ ވާހަކަ ވެސް ވަޒީރު ވިދާޅުވި އެވެ.
ވަޒީރު އެ ވިދާޅުވަނީ ތެދެއް ކަމަށް ވާ ނަމަ ހަނގުރާމައިގެ ކުރިން ނިންމާނެ ކަމަށް ބުނި ބިން ހިއްކުމުގެ މަޝްރޫޢޫތައް ނުނިމުނީ ކީއްވެތޯ އެވެ. ރަސްމާލޭގެ މަސައްކަތް ރަނގަޅަށް ކުރިއަށް ނުދިޔައީ ކީއްވެތޯ އެވެ. މަޖިލީސް އިންތިޚާބަށް ފެށި މަސައްކަތްތައް އިންތިޚާބުގެ ކާމިޔާބީ އާއި އެކު ހުއްޓިފައި ހުރީ ވެސް މާފަހުން ދިމާވި ހަނގުރާމައިގެ ހާލަތަކާއި ގުޅިގެންތޯ އެވެ؟
މެދުއިރުމަތީގައި މިހާރު ފެށިފައިވާ ހަނގުރާމައިގެ ސަބަބުން ރާއްޖެއަށް ބޭނުންވާ ބޮޑުހިލަ ލިބުމުގައި ގިނަ ދަތިތައް ހުރި ކަމަށް ވަޒީރު ވިދާޅުވާ އިރު މެޓީރިއަލްސް ރާއްޖޭގައި ހުރެ، ތަކެތި ހަލާކުވާ އިރު މަސައްކަތްތައް ކުރިއަށް ނުގެންގޮސް ހުރީ ކޮން ސަބަބަކާއި ހުރެތޯ އެވެ؟ ހަނގުރާމަ ފެށުމުގެ އެތައް ދުވަހެއް ކުރިން ފެށިގެން ހުއްޓިފައި ހުރި ކަންކަން މިއަދު ހަނގުރާމައިގެ ސަބަބުން ކުރިއަށް ނުދާކަމަށް ދެއްކުމަކީ އެކަން ނުވާ އަސްލު ސަބަބުގައި މަތި އެޅުމެވެ. ހަނގުރާމަ އާއި ހިސާބަށް ބަރާބަރަށް ކަންކަން ހިނގަމުން އައި ނަމަ އާއްމުން ތި ވާހަކަ ގަބޫލު ވެސް ކުރީސް ކަންނޭނގެ އެވެ. އެކަމަކު މިއަދު ތިކަހަލަ ވާހަކަތައް އާއްމުން ބަލައިގަންނަނީ ކަން ހިނގާ ގޮތް ބެލުމަށް ފަހުގަ އެވެ.
މަޝްރޫޢުތައް ހުއްޓިފައި ހުރި ޓައިމްލައިނަށް ބެލުމުން ވަޒީރު ދައްކަވާ ވާހަކަ ދިމަ އެއް ނުވެ އެވެ. ހާމަ އަށް ފެންނަން ހުންނަ ކަންކަމުގައި މިފަދަ ދޮގުތައް ހެދުމުން މިއަދު ގެއްލެނީ ރައްޔިތުންގެ އިތުބާރެވެ. ވެއްޓެނީ މުޅި ސަރުކާރުގެ އަގެވެ.
