20 ބިލިއަން ޑޮލަރުގެ އެއްބަސްވުމަކީ ގިނަ ދިރާސާތަކަކާއި މަޝްވަރާތަކަށްފަހު ނިންމެވި ނިންމެވުމެއް: މުއްތަލިބު
21 ސެޕްޓެމްބަރު 2026 | ހޯމަ 17:37ރަސްމާލޭގައި 20 ބިލިއަން ޑޮލަރުގެ މެރީނާއެއް ތަރައްގީކުރުމަށް ޔޫއޭއީގެ އީގަލް ހިލްސްއާއެކު ސޮއިކުރި އެއްބަސްވުމަކީ، ރާއްޖެއަކީ މަތީ އާމްދަނީ ލިބޭ ގައުމަކަށް ހެދުމަށް ކުރެވުނު ފުން ދިރާސާތަކެއްގެ ނަތީޖާ ކަމަށް ވަޒީރު ޑރ. މުއްތަލިބު ވަނީ ވިދާޅުވެފައި
ރަސްމާލޭގައި މެރީނާ އެއް ތަރައްގީކުރުމަށް ޔޫއޭއީގެ އީގަލް ހިލްސް އާއި ދިވެހި ސަރުކާރުން ހޯމަ ދުވަހު ސޮއިކުރުން | ހައުސިންގ މިނިސްޓްރީ
ރަސްމާލޭގައި މެރީނާއެއް ތަރައްގީކޮށް ހިންގުމަށް ޔުނައިޓެޑް އަރަބް އެމިރޭޓްސް (ޔޫއޭއީ)ގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާއެކު ސޮއިކުރި 20 ބިލިއަން ޑޮލަރުގެ އެއްބަސްވުމަކީ ގިނަ ދިރާސާތަކަކާއި މަޝްވަރާތަކަށްފަހު ނިންމެވި ނިންމެވުމެއް ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
އެކްސްގައި އިނގިރޭސި ބަހުން ކުރެއްވި ޕޯސްޓެއްގައި ވަޒީރު މުއްތަލިބު ވިދާޅުވީ، މިއީ ވަރަށް ސީރިއަސްކޮށް އަދި އެހާމެ ބޮޑު އަހައްމިއްޔަތުކަމެއް ދެއްވައިގެން ނިންމެވި ނިންމެވުމެއް ކަމަށެވެ. އަދި ކުރިއަށް އޮތް ތަނުގައި ވެސް މިފަދަ ކަންކަމުގައި ގެންގުޅުއްވާނެ އުސޫލަކީ މިއީ ކަމަށް ފާހަގަކުރެއްވި އެވެ.
ވަޒީރު ވިދާޅުވި ގޮތުގައި، މި ސޮޔާއެކު ނިންމި ނިންމުމުގެ ފަހަތުގައި ގުނާ ނުލެވޭހާ ގިނަ ވަގުތުގެ ދިރާސާތަކާއި، ތަޖުރިބާ ހޯދުމުގެ ދަތުރުތައް ހިމެނެ އެވެ. އަދި މި މަޝްރޫއު ރައީސް ޑރ. މުޙައްމަދު މުއިއްޒުގެ ސިޔާސަތުތަކާއި ތަސައްވުރާ އެއްގޮތަށް ބައްޓަންކުރުމަށްޓަކައި އެމަނިކުފާނާއެކު ދިގު މަޝްވަރާތަކެއް ކުރެވުނު ކަމަށް ވެސް ވިދާޅުވި އެވެ. މީގެއިތުރުން ދާއިރާގެ މާހިރުންނާއި މަސައްކަތުގެ ބައިވެރިންނާ އެކު ކުރެވުނު މަޝްވަރާތަކާއި، މީގެ ސަބަބުން ދިވެހިރާއްޖެއަށް ކުރާނެ އަސްލު އަސަރުތަކާއި ލިބޭނެ ކުރިއެރުންތަކާ މެދު ފުންކޮށް ވިސްނަވާފައިވާނެ ކަމަށް ވެސް ވަޒީރު ވިދާޅުވި އެވެ.
މިއަދުގެ މި ސޮޔާއެކު ނިންމި ނިންމުމުގެ ފަހަތުގައި، ގުނާ ނުލެވޭހާ ގިނަ ވަގުތުގެ ދިރާސާތަކާއި، ތަޖުރިބާ ހޯދުމުގެ ދަތުރުތަކާއި، ރައީސުލްޖުމްހޫރިއްޔާގެ ސިޔާސަތުތަކާއި ތަސައްވުރާ އެއްގޮތަށް މިކަން ބައްޓަންކުރުމަށް އެމަނިކުފާނާއެކު ކުރެވުނު ދިގު މަޝްވަރާތައް ހިމެނޭ. މީގެ އިތުރުން، ދާއިރާގެ މާހިރުންނާއި މަސައްކަތުގެ ބައިވެރިންނާއެކު ކުރެވުނު މަޝްވަރާތަކާއި، މީގެ ސަބަބުން ދިވެހިރާއްޖެއަށް ކުރާނެ އަސްލު އަސަރުތަކާއި ލިބޭނެ ކުރިއެރުންތަކާ މެދު ކުރެވުނު ފުން ވިސްނުންތައް ވެސް މީގެ ތެރޭގައި ހިމެނޭޑރ. އަބްދުﷲ މުއްތަލިބު
މުއްތަލިބު ވިދާޅުވީ ހިތުގައި އޮތް އެންމެ ބޮޑު ޔަގީންކަމަކީ، ރާއްޖޭގެ ގުދުރަތީ ރީތިކަމުން އުފެދޭ އިގުތިސާދީ މަންފާ، މިހާތަނަށް ލިބެމުންދިޔަ މިންވަރަށްވުރެ ބޮޑަށް ދިވެހި ރައްޔިތުންނަށް ލިބެންޖެހޭ ކަމަށެވެ.
މީގެއިތުރުން، މި މަޝްރޫއަކީ 2040 ވަނަ އަހަރު އަންނަންވާއިރު، ރާއްޖެއަކީ މަތީ އާމްދަނީ ލިބޭ ގައުމަކަށް ހެއްދެވުމަށް ރައީސް މުއިއްޒު ގެންގުޅުއްވާ ތަސައްވުރު ހަގީގަތަކަށް ހެދުމަށްޓަކައި ބައްޓަންކުރެވިފައިވާ މުހިންމު މަސައްކަތެއް ކަމަށް ވެސް ވަޒީރު މުއްތަލިބު ފާހަގަކުރެއްވި އެވެ.
ރަސްމާލޭގައި 20 ބިލިއަން ޑޮލަރުގެ ބިޔަ މަޝްރޫއެއް ހިންގުމަށް، އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" ކުންފުންޏާއެކު ދިވެހި ސަރުކާރުން އެއްބަސްވުމެއްގައި ސޮއިކޮށްފައިވަނީ ހޯމަ ދުވަހު އެވެ.
މި އެއްބަސްވުމުގެ ދަށުން ރަސްމާލޭގައި ބައިނަލްއަޤްވާމީ ފެންވަރުގެ ވޯޓަރފްރަންޓް އަދި މެރީނާ މަޝްރޫއެއް ތަރައްޤީކުރުމަށް ވަނީ ހަމަޖެހިފަ އެވެ. ސަރުކާރުން ހާމަކުރި ގޮތުގައި މިއީ ދިވެހިރާއްޖޭގެ ތާރީޚުގައި މިހާތަނަށް ހިންގޭ ބޭރުގެ އެންމެ ބޮޑު އެއް އިންވެސްޓްމަންޓް މަޝްރޫ އެވެ.
އެކި ފިޔަވަހިތަކަކަށް ބަހާލައިގެން ކުރިއަށްގެންދިއުމަށް ހަމަޖެހިފައިވާ މި ބިޔަ މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އީގަލް ހިލްސްއާ ހަވާލާދީ ރިޕޯޓުތައް ބުނެ އެވެ. ސަރުކާރުން ދެކޭގޮތުގައި މިއީ ރާއްޖޭގެ އިގުތިސާދީ މުސްތަގުބަލަށް އިންގިލާބީ ބޮޑު ބަދަލެއް ގެނެސްދޭނެ މުހިންމު މަޝްރޫއެކެވެ.
