އިހުތިރާމް ކެމްޕޭނުގައި ބައިވެރިވާން މީޑިއާތަކަށް ގޮވާލާއިރު، "ގަޓަރ ޕްރެސް" މަތިން ހަނދުމަފުޅު ނެތްތޯ؟
23 ސެޕްޓެމްބަރު 2026 | ބުދަ 06:12މީޑިއާތަކަށް "ގަޓަރ ޕްރެސް" ފަދަ ބަހުގެ ހަމަލާތައް އަމާޒުކުރައްވައި، ނޫސްވެރިންގެ އަގުވައްޓާލުމަށް ރައީސް މުއިއްޒު މަސައްކަތްކުރައްވާފައިވޭ، ނޫސް އިދާރާތައް ބަލައި ފާސްކުރުމާއި ނޫސްވެރިންނަށް ފިޔަވަޅު އެޅުން ފަދަ ކަންކަން ހިނގަމުންދާއިރު، ސަރުކާރުން "އިހުތިރާމް" ކެމްޕޭނުގައި ބައިވެރިވާން މީޑިއާތަކަށް ދައުވަތު ދިނުމަކީ ދެފުއްދެގޮތް އަމަލެއްގެ ގޮތުގައި ގިނަ ބަޔަކު ސިފަކުރޭ
ރައީސް މުއިއްޒު ނޫސްވެރިންނާ ބައްދަލުކުރެއްވުން | ރައީސް އޮފީސް
ރައީސް ޑރ. މުހައްމަދު މުއިއްޒުގެ ސަރުކާރުން، މުޖުތަމައުގެ އެކި ދާއިރާތަކުގެ ބައިވެރިވުމާއެކު، އެކަކު އަނެކަކަށް އިހުތިރާމްކުރާ ދިވެހިރާއްޖެއެއް ބިނާކުރުމަށްޓަކައި "އިހުތިރާމް" ކުރިއެރުވުމުގެ ގައުމީ ކެމްޕޭނެއް މިވަނީ ފަށާފަ އެވެ. އަދި މީޑިއާއަކީ ވެސް މި މަސައްކަތުގެ މުހިންމު ބައިވެރިއަކަށް ވާންޖެހޭކަމަށް ބުނެ، ސަރުކާރުން މީޑިއާތަކަށް ވެސް ދައުވަތު ދިނެވެ.
އެހެންނަމަވެސް، މި ސަރުކާރާއި ހުދު ރައީސުލްޖުމްހޫރިއްޔާ މީޑިއާތަކަށް އިހުތިރާމް ކުރައްވަނީ ކިހާ ވަރަކަށްތޯ އެވެ؟
ރައީސް މުޢިއްޒު އަމިއްލަފުޅަށް ވަނީ ތަކުރާރުކޮށް މީޑިއާގެ ބައެއް ފަރާތްތަކަށް ހޫނު ބަހުގެ ހަމަލާދެއްވާފަ އެވެ. ބައެއް ނޫސްތަކަކީ "ގަޓަރ ޕްރެސް" ނުވަތަ ފެންވަރު ދަށް ނޫސްތަކެއްގެ ގޮތުގައި ސިފަކުރައްވައި، ދޮގު ޚަބަރު ފަތުރާކަމުގެ ތުހުމަތު ވަނީ ކުރައްވާފަ އެވެ.
އަދި ނޫސްވެރިންނަކީ ޚަބަރު ފެތުރުމުގެ ބަދަލުގައި ދޭތެރެ ޖައްސައި، ދެބައުޑުވުމުގެ ވާހަކަ ދައްކާ ބައެއްގެ ގޮތުގައި ތަކުރާރުކޮށް ވަނީ ސިފަކުރައްވާފަ އެވެ. ނޫސްވެރިންނަކީ "ގޮސިޕް" ކުރާ ބައެއްކަމަށް ވެސް ވިދާޅުވީ ހުދު ހަމަ އެމަނިކުފާނެވެ.
އެކަން އެކަންޏެއް ނޫނެވެ. މި ސަރުކާރުގެ ދަށުން، ފުލުހުން ވަނީ ނޫސް އިދާރާއަކަށް ވަދެ، ނޫސްވެރިންގެ ސާމާނުތައް ހިފަހައްޓާފަ އެވެ. ކޯޓު އަމުރަކާ ގުޅިގެން ކުރި ރިޕޯޓަކާ ގުޅިގެން ނޫސްވެރިން ޖަލަށްލައި ޖޫރިމަނާ ވެސް ކޮށްފައިވެ އެވެ.
މީޑިއާ އިދާރާތަކަށް ފިޔަވަޅު އަޅާފައިވާއިރު، މީޑިއާ ރެގިއުލޭޓް ކުރުމަށް އަލަށް އެކުލަވާލި އޮނިގަނޑުގެ ދަށުން ރެގިއުލޭޓަރަށް ލިބިދޭ ބާރުތަކާ ގުޅިގެން، ނޫސްވެރިންނާއި ބައިނަލްއަގުވާމީ ނޫސްވެރިކަމުގެ މިނިވަންކަމަށް މަސައްކަތްކުރާ ޖަމިއްޔާތަކުގެ ބޮޑެތި ފާޑުކިޔުންތައް ވަނީ އަމާޒުވެފަ އެވެ.
ސަރުކާރަކުން ތަކުރާރުކޮށް ފާޑުކިޔާ މީޑިއާތަކާ ކުރިމަތިލައި، ނޫސް އިދާރާތައް ބަލައި ފާސްކޮށް، ނޫސްވެރިން ޖަލަށްލައި، ޖޫރިމަނާކޮށް، އަދި ސިޔާސީ ބަސްމަގުން މީޑިއާގެ ބައެއް ފަރާތްތަކަކީ އިތުބާރު ނެތް ބައެއްގެ ގޮތުގައި ސިފަކުރަމުންދާއިރު، "އިހުތިރާމް" ކުރިއެރުވުމަށް ނޫސްވެރިންނަށް ދައުވަތު ދިނުމަކީ ސަރުކާރުގެ ދެފުއް ދެގޮތްކަން ހާމަވާ ކަމެއް ނޫންތޯ އެވެ؟
ރައީސުލްޖުމްހޫރިއްޔާގެ މަގާމުގައި ހުންނަވައިގެން، ނޫސްވެރިކަމަށް ތަކުރާރުކޮށް މަލާމާތްކުރައްވައި، ނޫސްވެރިންނަކީ ދެބައުޑުވާ ބައެއްގެ ގޮތުގައި ސިފަކުރައްވައި، ހިތްޕުޅާނުވާ މީޑިއާ އިދާރާތަކުގެ އަގު ވައްޓާލެއްވުމަށްފަހު، ފަހުން ހަމަ އެ ނޫސްތަކުގެ ދޮރުގައި ޓަކިޖަހައި "އަޅުގަނޑުމެންގެ އިހުތިރާމް ކެމްޕޭނުގައި ބައިވެރިވާނަންތޯ؟" އެހުމުން، މިއީ ޖޯކަކަށް ނުވޭތޯ އެވެ؟
