ރައީސް މައުމޫނުގެ ވެރިކަމުގައި އޮތްގޮތަށް އަތޮޅު އޮފީސްތައް ރައީސް މުއިއްޒު އުފައްވައިފި
ލާމަރުކަޒީ ގާނޫނަށް ގެނައި އިސްލާހާއެކު އަތޮޅު ކައުންސިލްތައް އުވި، އެ އިދާރާތައް ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ދަށުން ހިންގާ އަތޮޅު އޮފީސްތަކަކަށް ބަދަލުކުރުމަށް ރައީސުލްޖުމްހޫރިއްޔާ ނިންމަވައިފި. މި ބަދަލާ ގުޅިގެން އަތޮޅު ކައުންސިލްތަކުގެ މުވައްޒަފުންގެ ވަޒީފާ ނުގެއްލޭނެ ގޮތަށާއި، މުސާރައާއި އިނާޔަތްތަކަށް އުނިކަމެއް ނާންނާނެހެން ކަންކަން ހަމަޖެއްސުމަށް ރައީސް ވަނީ އަންގަވާފަ. މީގެ ފަހުން މި އިދާރާތައް ރަސްމީކޮށް ބޭނުންކުރާނީ "ލޯކަލް ގަވަރމަންޓް އޮތޯރިޓީ - (އަތޮޅު) އޮފީސް" މި ނަން.
ރައީސް ޑރ މުއިއްޒު ބ އަތޮޅު ކައުންސިލް އާ ބައްދަލުކުރެއްވުން - ފައިލް | ރައީސް އޮފީސް
ލާމަރުކަޒީ ނިޒާމުގެ ދަށުން އިދާރީ ދާއިރާތައް ހިންގުމަށް ގެނައި ބަދަލުގެ ދަށުން އުފެއްދި އަތޮޅު ކައުންސިލްތައް އުވާލުމަށްފަހު، ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި އޮތްގޮތަށް އަތޮޅު އޮފީސްތައް ރައީސް ޑރ. މުހައްމަދު މުއިއްޒު އުފައްދަވައިފި އެވެ.
އާދީއްތަ ދުވަހު އައު ކައުންސިލްތައް ހުވާކުރި އިރު، މި ސަރުކާރުން ލާމަރުކަޒީ ގާނޫނަށް ގެނައި އިސްލާހަކާއެކު އަތޮޅު ކައުންސިލްތައް އޮތީ އުވިފަ އެވެ. އަދި އަތޮޅު ކައުންސިލްތައް ލޯކްލަ ގަވަރމަންޓް އޮފީހުގެ ދަށުން ކުރިން އެޓޯލްސް މިނިސްޓްރީ ހިންގި ގޮތަށް ސަރުކާރުން އޮތީ ނިންމާފަ އެވެ.
އާދީއްތަ ދުވަހު ރައީސް އޮފީހުން ލޯކަލް ގަވަރމަންޓް އޮތޯރިޓީއަށް ފޮނުވި ސިޓީއެއްގައި ބުނެފައިވަނީ ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު) 1-85 ވަނަ މާއްދާގެ ދަށުން, އެ އޮތޯރިޓީގެ ޚިދުމަތްތައް އިދާރީ ދާއިރާތަކުގައި ދިނުމަށް ޓަކައި ގާއިމުކުރައްވާ އެ އޮތޯރިޓީގެ އޮފީސްތަކަކީ، އެ އޮތޯރިޓީގެ ބައެއްގެ ގޮތުގައި ގާއިމުކުރެވޭ ތަންތަނަށްވެފައި، އެ ތަންތަނަކީ ސަރުކާރުގެ ވަކި އިދާރާތަކުގެ ގޮތުގައި ގާއިމުކުރެވޭ ތަންތަނަށް ނުވާތީ، އެ ތަންތަނަށް ތަފާތު ވަކި ނަމެއް ހަމަޖެއްސެވުމުގެ ބަދަލުގައި، ކޮންމެ އޮފީހެއްގައި ވެސް "ލޯކަލް ގަވަރމަންތް އޮތޯރިޓީ - (އަތޮޅު) އޮފީސް ނަން ބޭނުންކުރެއްވުމަށް ފެނިވަޑައިގަންނަވާކަމުގައި ދަންނަވަން ރައީސުލްޖުމްހޫރިއްޔާ ވިދާޅުވި ކަމަށެވެ.
މީގެ އިތުރުން، ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު) އަށް ގެނެސްފައިވާ އިޞްލާޙާ ގުޅިގެން، މިހާރު ހިނގަމުންދާ އަތޮޅު ކައުންސިލްގެ އުމުރު ހަމަވުމާއެކު، އަތޮޅު ކައުންސިލްތަކުގެ އިދާރާތައް އުވިގެންދާނެތީ، އެ އިދާރާތަކުގައި މަސައްކަތް ކުރަމުންދާ މުވައްޒަފުންގެ ވަޒީފާއާ ގުޅޭ ކަންކަން, ޤާނޫނު ނަންބަރު 22/2025 (ގާނޫނު ނަންބަރު 2010/7 ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު) އަށް 17 ވަނަ އިޞްލާޙު ގެނައުމުގެ ޤާނޫނު) ގެ 58 ވަނަ މާއްދާގައި ބަޔާންކޮށްފައިވާ ގޮތުގެ މަތިން ހަމަޖެއްސެވުމަށް ދަންނަވާ ކަމަށެވެ.
އަދި، އެ މުވައްޒަފުންގެ ވަޒީފާގެ ކަންކަން ހަމަޖެއްސެވުމުގައި، އެއްވެސް މުވައްޒަފެއްގެ ވަޒީފާ ނުގެއްލޭނެ ގޮތަށް އަދި އެ މުވައްޒަފުންނަށް މިހާރު ލިބެމުންދާ މުސާރައާއި ޢިނާޔަތްތަކަށް އުނިކަމެއް ނާންނާނެ ގޮތަށް، ކަމާބެހޭ ފަރާތްތަކާ މަޝްވަރާކުރައްވައިގެން ކަންކަން ހަމަޖެއްސެވުމަށް ދަންނަވަން ރައީސުލްޖުމްހޫރިއްޔާ ވިދާޅުވި ކަމަށް މި ސިޓީގައި ބުނެފައިވެ އެވެ.
ރައީސްގެ މި އެންގެވުމާއެކު ކުރިން އަތޮޅު ކައުންސިލްތައް އަނބުރާ އަތޮޅު އޮފީސްތަކަށް ބަދަލުވެގެންދާނެ އެވެ. އެގޮތުން ދެން އަތޮޅު ކައުންސިލްގެ ބަދަލުގައި ހުންނާނީ އެ އަތޮޅެއްގެ އަތޮޅު ރަމްޒުކޮށްދޭ އަކުރު ޖެހުމަށްފަހު އޮފީހެވެ. މިސާލަކަށް ލޯކަލް ގަވަރމަންޓް އޮތޯރިޓީ - ކ. އަތޮޅު އޮފީސް އެވެ.
