އަޅުގަނޑާއި ރައީސް ނަޝީދު މި ތިބީ ސޯބެ އަށް މި އިންތިޚާބު ކާމިޔާބުކޮށްދިނުމަށްޓަކައި ކުރެވެން އޮތް ހުރިހާ ކަމެއް ކުރަން ތައްޔާރަށް: ރައީސް ސޯލިހު
ރައީސް ސޯލިހު ވިދާޅުވީ، ސޯބެގެ ކެމްޕެއިންގައި ވީހާވެސް ބޮޑަކަށް ބައިވެރިވެވަޑައިގެން، އިންތިޚާބު ކާމިޔާބު ކޮށްދިނުމަށް ކުރެވެން އޮތް ހުރިހާ ކަމެއް ކުރަން ރައީސް ނަޝީދާއި އެމަނިކުފާނު ތިއްބެވީ ތައްޔާރަށް ކަމަށް. އަދި މިވަގުތު މާލޭގައި ތިއްބެވި ނަމަވެސް ކެމްޕެއިންގެ ކަންކަން ވަރަށް ގާތުން ބައްލަވަމުން ގެންދަވާ ކަމަށާއި، މިހާރު ފެންނަ މަންޒަރުތަކަށް ބަލާއިރު މި އިންތިޚާބު ސޯބެ ބޮޑުތަނުން ކާމިޔާބު ކުރައްވާނެ ކަމުގެ ޔަގީންކަން އެބައޮތް ކަމަށް.
ހޯމަ ދުވަހުގެރޭ މާލޭގައި ބޭއްވި ސޯބެގެ ކެމްޕެއިން ޖަލްސާގެ ތެރެއިން: ސޯބެގެ ދެ ފަރާތުން ކުރިީގެ ރައީސް ނަޝީދު އަދި ކުރީގެ ރައީސް ސޯލިހު | އެމްޑީޕީ ސެކްރިޓޭރިއެޓް
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަކުރައްވާ އަބްދުﷲ ސޯދިގު (ސޯބެ) އަށް މި އިންތިޚާބު ކާމިޔާބުކޮށްދެއްވުމަށްޓަކައި އެކުގައި ކުރެވެން ހުރި ހުރިހާ މަސައްކަތެއް ކުރެއްވުމަށް އެމަނިކުފާނާއި ކުރީގެ ރައީސް މުހައްމަދު ނަޝީދު ތިއްބެވީ ތައްޔާރަށް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އައްޑޫ ސިޓީގެ ކުރީގެ މޭޔަރުކަން ވެސް ކުރައްވާފައިވާ ސޯބެގެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ، ސޯބެގެ ކެމްޕެއިންގައި ވީހާވެސް ބޮޑަކަށް ބައިވެރިވެވަޑައިގެން، އިންތިޚާބު ކާމިޔާބު ކޮށްދިނުމަށް ކުރެވެން އޮތް ހުރިހާ ކަމެއް ކުރަން ރައީސް ނަޝީދާއި އެމަނިކުފާނު ތިއްބެވީ ތައްޔާރަށް ކަމަށެވެ. އަދި މިވަގުތު މާލޭގައި ތިއްބެވި ނަމަވެސް ކެމްޕެއިންގެ ކަންކަން ވަރަށް ގާތުން ބައްލަވަމުން ގެންދަވާ ކަމަށާއި، މިހާރު ފެންނަ މަންޒަރުތަކަށް ބަލާއިރު މި އިންތިޚާބު ސޯބެ ބޮޑުތަނުން ކާމިޔާބު ކުރައްވާނެ ކަމުގެ ޔަގީންކަން އެބައޮތް ކަމަށް ވެސް އެމަނިކުފާނު ވިދާޅުވި އެވެ.
ފުރަތަމަވެސް ޔަޤީންކޮށް މި އަރުވަނީ، އަޅުގަނޑާއި، ރައީސް ނަޝީދު، މި ތިބީ ސޯބެ ގެ މި ކެމްޕެއިންގައި ޢަމަލީގޮތުން ވީހާވެސް ބޮޑަކަށް ބައިވެރިވި ސޯބެ އަށް މި އިންތިޚާބު ކާމިޔާބުކޮށްދިނުމަށްޓަކައި ކުރެވެން އޮތް ހުރިހާ ކަމެއް ކޮށްދޭން. އަޅުގަނޑުމެން މިތާ ތިބި ނަމަވެސް، ވަރަށް ކައިރިން ކެމްޕެއިން ކުރިއަށްދާގޮތް ބަލަމުން މި ގެންދަނީ. އަޅުގަނޑަށް ވަރަށް ސާފުކޮށް އެ ބައެއް އިރާދަކުރެއްވިއްޔާ މި އިންތިޚާބު ބޮޑުކޮށް ސޯބި ކާމިޔާބު ކުރާނެކަން.ކުރީގެ ރައީސް އިބްރާހިމް މުހައްމަދު ސޯލިހު
މި ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، 2023 ވަނަ އަހަރު ރާއްޖޭގެ ރައްޔިތުން އާ ވެރިޔަކު އިންތިޚާބު ކުރީ އޭރު އޮތް ހާލަތަށް ވުރެ ރަނގަޅު ގޮތްތަކެއް ހޯދުމުގެ ބޭނުމުގައި ކަމަށެވެ. އަދި ޖެހިގެން އައި 2024 ވަނަ އަހަރު ރައްޔިތުންގެ މަޖިލީހުގެ ސުޕަރ މެޖޯރިޓީ ސަރުކާރަށް ދިނީ ވެސް ވެވަޑައިގެންނެވި ވައުދުތައް ފުއްދުމުގެ ފުރުސަތު ދިނުމަށް ކަމަށް އެމަނިކުފާނު ފާހަގަކުރެއްވި އެވެ.
ނަމަވެސް، މިއަދު ގައުމު އޮތް ހާލަތަށް ބަލާއިރު ވެވަޑައިގެންނެވި ވައުދުތައް ނުފުއްދަވާ ކަމަށާއި، ވެރިކަން މިހާރު ބަދަލުވެފައިވަނީ ޚުދުމުޚްތާރު ވެރިކަމަކަށް ކަމަށް ރައީސް ސޯލިހު ތުހުމަތު ކުރެއްވި އެވެ. މިނިވަން މުއައްސަސާތަކުގެ މުސްތަގިއްލުކަން މުޅިން ގެއްލި، ޝަރުއީ ދާއިރާއަށް ނުފޫޒު ފޯރުވަމުންދާ ކަމަށާއި، ރައްޔިތުންގެ އަސާސީ ހައްގުތައް ގެއްލި، މިނިވަން ނޫސްވެރިކަމާއި ޚިޔާލު ފާޅުކުރުމުގެ މިނިވަންކަމަށް އޮތް ޖާގަ ހަނިވެފައިވާ ކަމަށް ވެސް އެމަނިކުފާނު ވިދާޅުވި އެވެ.
ވެރިކަން މިއަދު ވަނީ ޚުދުމުޚްތާރު ވެރިކަމަކަށް ބަދަލުވެފަ. މިނިވަން މުއައްސަސާތަކުގެ މުސްތަޤިއްލުކަން މުޅިން ގެއްލިއްޖެ. ޝަރުޢީ ދާއިރާއަށް ނުފޫޒު ފޯރުވަމުން އެ ގެންދަވަނީ. އަސާސީ ޙައްޤުތައް މުޅިން ގެއްލި ހިނގައްޖެ. މިނިވަން ނޫސްވެރިކަމެއް ކުރާނެ ޖާގައެއް ނެތް. ޚިޔާލު ފާޅުކުރުމުގެ މިނިވަންކަމެއް ނެތް. އެއްވެއުޅުމުގެ މިނިވަންކަމެއް ނެތް. މަޖިލީހުގެ ބާރު ކަނޑުވައިލައިފި.ކުރީގެ ރައީސް އިބްރާހިމް މުހައްމަދު ސޯލިހު
މީގެ އިތުރުން، އެއްވެއުޅުމުގެ މިނިވަންކަން ނެތިގޮސް، ރައްޔިތުންގެ މަޖިލީހުގެ ބާރު ކަނޑުވާލާފައިވާ ކަމަށް ރައީސް ސޯލިހު ވިދާޅުވިއެވެ. އަދި ސަރުކާރުގެ ސިޔާސަތުތަކާ ދެކޮޅަށް ބަސްބުނާ ކޮންމެ މީހަކު ޖަލަށްލަމުންދާ ކަމަށް ވިދާޅުވެ، މިހާރު ބަންދުކޮށްފައި ތިބި ނޫސްވެރިންނާއި، އިހުތިޖާޖު ކުރުމުގެ ތެރެއިން ހައްޔަރުކޮށްފައިވާ އެންމެން ވަގުތުން ވަގުތަށް ދޫކޮށްލުމަށް ރައީސް ޑރ. މުއިއްޒަށް ރައީސް ސޯލިހު ވަނީ ގޮވާލައްވާފަ އެވެ.
