މާލޭގެ ޑެޕިއުޓީ މޭޔަރުކަމަށް އެމްޑީޕީ ފަރާތުން ވާދަކުރައްވާނީ މީކާއީލް!
މާލޭގެ ޑެޕިއުޓީ މޭޔަރު ކަމަށް އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް ބޭއްވި އެތެރޭގެ ވޯޓު މެދުހެންވޭރު ދާއިރާގެ ކައުންސިލަރު މީކާއީލް މުޙައްމަދު ރިޔާޒް ކާމިޔާބު ކުރައްވައިފި. ހަތަރު ކައުންސިލަރަކު ވާދަކުރެއްވި މި ވޯޓުގައި މީކާއީލަށް ހަތް ވޯޓު ލިބިވަޑައިގެންފައިވާއިރު، ސިޓީ ކައުންސިލްގެ އަޣުލަބިއްޔަތު އެމްޑީޕީއަށް އޮތުމުން މި މަޤާމަށް އޭނާ އިންތިޚާބުވާނެކަން މިހާރު ވަނީ ވަރަށް ބޮޑަށް ބެލެވިފައި.
މެދުހެންވޭރު ދާއިރާގެ ކައުންސިލަރު މީކާއީލް މުޙައްމަދު ރިޔާޒް (މިކީ) | އެމްޑީޕީ
މާލޭގެ ޑެޕިއުޓީ މޭޔަރު ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީން) މެދުހެންވޭރު ދާއިރާގެ ކައުންސިލަރު މީކާއީލް މުޙައްމަދު ރިޔާޒް (މިކީ) ހޮވަން ނިންމައިފިއެވެ.
އެމްޑީޕީން އެގޮތަށް ނިންމާފައިވަނީ އައު ކައުންސިލަރުން ހުވާ ކުރުމުގެ ރަސްމިއްޔާތަށްފަހު ނެގި ވޯޓުގައެވެ. އެގޮތުން މި މަޤާމަށް އޭނާގެ އިތުރުން 3 ކައުންސިލަރަކު ޝައުޤުވެރިކަން ފާޅުކުރިއެވެ. އެއީ މާފަންނު ހުޅަނގު ދާއިރާގެ ކައުންސިލަރު މުޙައްމަދު ރިޟްވާން ޢަލީ (ރިލޭޭ)، މާފަންނު މެދު ދާއިރާގެ ކައުންސިލަރު ޢާއިޝަތު ޙަނާ އަދި ހުޅުމާލޭ އުތުރު ދާއިރާގެ ކައުންސިލަރު ފާޠިމަތު ޒަހިއްޔާއެވެ.
އޭގެ ތެރެއިން އެންމެ ގިނަ ވޯޓު ލިބިފައިވަނީ މީކާއީލްއަށެވެ. އެގޮތުން މީކާއީލަށް ހަތް ވޯޓު ލިބިފައިވެއެވެ.
މާލޭ ސިޓީ ކައުންސިލްގެ ސޯޅަ ގޮނޑި އެމްޑީޕީން ކާމިޔާބު ކޮށްފައިވާތީ މާލޭގެ ޑެޕިއުޓީ މޭޔަރު ކަމަށް ނަގާ ވޯޓު ކާމިޔާބު ކުރާނީ މީކާއީލްކަމަށް ބެލެވެއެވެ.
ލޯކަލް ކައުންސިލްތަކުގެ ފަސްވަނަ ދައުރަށް އިންތިޚާބުވި ކައުންސިލަރުން ހުވާކުރުމާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުން އިޤްރާރުގައި ސޮއިކުރުމުގެ ރަސްމިއްޔާތު ރާއްޖޭގެ އެކި ކަންކޮޅުތަކުގައި އާދިއްތަ ދުވަހު ވަނީ ކުރިއަށް ގެންގޮސްފައެވެ.
