އުންމީދު ވަރަށް ބޮޑު، ޤައުމުގެ މިސްރާބު ރަނގަޅު ކުރުމަށް އެކުގައި މަސައްކަތް ކުރެވޭނެ: ތިން ރައީސުންގެ ކޮމެޓީ
ބައްދަލުވުމަަށް ފަހު މީޑިއާ ތަކަށް ދެއްވި ބްރީފިންއެއްގައި ކޮމެޓީގެ ފަރާތުން ފައްޔާޒް ވިދާޅުވީ، ޕާޓީ ތަކަށް އެ މައްސަލަތައް ގެންގޮސްގެން ކުރިއަށް ދާނެ ގޮތަކާ މެދު ވާހަކަ ދެކެވުނު ކަމަށް.
ބައްދަލުވުމަށް ފަހު ތިން ރައީސުންގެ ކޮމެޓީ އިން މީޑިއާ ތަކަށް ދެއްވި ބްރީފިން. | ރާއްޖެ އެމްވީ
ކުރީގެ ތިން ރައީސުން އުފައްދަވާފައިވާ ކޮމެޓީގެ ފުރަތަމަ ބައްދަލުވުން ބާއްވާފައިވާއިރު، ޤައުމު މިހާރު މިދާ މިސްރާބު ރަނގަޅު ކުރުމަށް އިދިކޮޅު ފަރާތް ތަކަށް ރަނގަޅު މަސައްކަތެއް ކުރެވޭނެ ކަމަށް އެ ކޮމެޓީ އިން ބުނެފި އެވެ.
ކުރީގެ ރައީސް މުޙައްމަދު ނަޝީދު އާއި، ރައީސް އިބްރާހީމް މުޙައްމަދު ސޯލިޙް އަދި ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ފަރާތުން ކަނޑައެޅުއްވި ކޮމެޓީގެ ފުރަތަމަ ބައްދަލުވުން ބާއްވާފައި ވަނީ ހޯމަ ދުވަހުގެ މެންދުރު އެވެ. މެންހަޓަންގައި ކުރިއަށް ދިޔަ އެ ބައްދަލުވުމުގައި ކޮމެޓީގައި ހިމެނޭ ހަ މެމްބަރުން ވެސް ބައިވެރިވެފައި އެވެ.
މި ކޮމެޓީގައި ހިމެނޭ މެމްބަރުންނަކީ ރައްޔިތުންގެ މަޖިލީހުގެ ކުރީގެ ނައިބު ރައީސް އީބާ ޢަބްދުﷲ އާއި، އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އާއި، ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ) އާއި، އަލިފުށީ ދާއިރާގެ ކުރީގެ މެމްބަރު މުޙައްމަދު ރަޝީދު ޙުސެއިން (ބިގޭ) އާއި، ކުރީގެ މިނިސްޓަރު މުޙައްމަދު މަލީޙު އަދި އިސްމާއީލް ޒަރިޔަންދު އެވެ.
ބައްދަލުވުމަަށް ފަހު މީޑިއާ ތަކަށް ދެއްވި ބްރީފިންއެއްގައި ކޮމެޓީގެ ފަރާތުން ފައްޔާޒް ވިދާޅުވީ، ޕާޓީ ތަކަށް އެ މައްސަލަތައް ގެންގޮސްގެން ކުރިއަށް ދާނެ ގޮތަކާ މެދު ވާހަކަ ދެކެވުނު ކަމަށެވެ. ފައްޔާޒް ވިދާޅުވީ އެ ޙަރަކާތްތައް ކުރިއަށް ދާނެ ގޮތާއި، ދުވަހުން ދުވަހަށް މައުލޫމާތު ހާމަ ކުރުމުގެ އިންތިޒާމެއް ހަމަޖައްސައިގެން ކުރިއަށް ގެންދަވާނެ ކަމަށެވެ.
އިތުރަށް ފައްޔާޒް ވިދާޅުވީ މި މަސައްކަތުގައި ކޮމެޓީގެ އުންމީދު ވަރަށް ބޮޑު ކަމަށެވެ. މިހާރު ދިވެހި ރާއްޖެ ދަތުރު ކުރަމުންދާ މިސްރާބުން ރަނގަޅު ކުރުމަށް، އިދިކޮޅު ފަރާތްތަކުން އެކުވެގެން ރަނގަޅު މަސައްކަތެއް ކުރެވޭނެ ކަމަށް ވެސް ފައްޔާޒް ވަނީ ވިދާޅުވެފަ އެވެ.
ކުރީގެ ތިން ރައީސުން އެކުވެގެން މަސައްކަތް ކުރަން ނިންމާފައި ވަނީ، ރައީސް ޑޮކްޓަރު މުޙައްމަދު މުޢިއްޒުގެ ސަރުކާރުން ކަންކަން ކުރަމުންދާ ގޮތުގެ ސަބަބުން ރައްޔިތުންގެ މެދުގައި ސަރުކާރާ މެދު އޮތް ނުތަނަވަސްކަން އިތުރުވެފައިވާ ވަގުތެއްގަ އެވެ.
ތިން ރައީސުން ނެރެފައިވާ ބަޔާނެއްގައި ބުނެފައި ވަނީ، ރައީސް މުއިއްޒުގެ ސަރުކާރުން ޤާނޫނު އަސާސީ އިން ރައްޔިތުންނަށް ކަށަވަރު ކޮށްދޭ އަސާސީ ޙައްޤު ތަކަށް ފާޅުގައި އަރައިގެންފައިވާ ކަމަށާއި، ޝަރުއީ ކޯޓު ތަކަށް ވެސް ނުފޫޒު ފޯރުވަމުންދާ ކަމަށެވެ. އަދި ރައްޔިތުންގެ މަޖިލީހުގެ ބާރު ކަނޑުވާލައި، ދައުލަތުގެ މުއައްސަސާ ތަކުގެ މުސްތަޤިއްލުކަން ގެއްލުވާލާފައިވާ ކަމަށް ވެސް ވަނީ ފާހަގަކޮށްފަ އެވެ.
ހަމަ އެހެންމެ މިނިވަން ނޫސްވެރިކަމަށް ހުރަސް އެޅުމާއި، ނޫސްވެރިން ޖަލަށްވެސް ލަމުންދާ ކަމަށް ފާހަގަ ކޮށްފައިވެ އެވެ. އަދި ރައްޔިތުންގެ އާންމު ޙާލަތު ދަށްވެ، އިޤްތިސާދު ހީނަރުވެ، ތަކެތީގެ އަގު އެތައް ގުނައަކަށް އުފުލިފައިވާކަން ވެސް ވަނީ ފާހަގަކޮށްފަ އެވެ. އަދި މި ޙާލަތުގައި ވެސް ސަރުކާރުގެ އިސްރާފު އިންތިހާއަށް ބޮޑުކަމަށް ބަޔާނުގައިވެ އެވެ.
