ބޭރުގެ ނޫސް ޗެނަލްތަކުން ގެގް އޯޑަރާ ޚިލާފު ކޮންޓެންޓު ދެއްކިޔަސް، އެ ކޮންޓެންޓު މަނާކުރުމުގެ ވިސްނުމެއް ސަރުކާރުގެ ނެތް، ފިޔަވަޅު އަޅަނީ ރާއްޖޭގެ ނޫސްވެރިންނަށް!

ކްރިމިނަލް ކޯޓުން ނެރެފައިވާ އަނގަ ބަންދު ކުރުމުގެ އަމުރު (ގެގް އޯޑަރ) އާ ޚިލާފު ކޮންޓެންޓު ގެނައި ނަމަވެސް، އެފަދަ ކޮންޓެންޓު ދައްކާ ބޭރުގެ ޗެނަލްތައް ރާއްޖޭގައި މަނާ ކުރުމުގެ އެއްވެސް ވިސްނުމެއް ނުގެންގުޅޭކަމަށް ސަރުކާރުން ބުނެފިއެވެ. 

ރައީސުލްޖުމްހޫރިއްޔާއަށް ތުހުމަތުތަކެއް ކޮށް އަދަދު ނޫހުން ގެނެސްދިން އައިޝާ ޑޮކިއުމެންޓްރީގެ ވާހަކަ ސީދާކޮށް ވެސް ނުސީދާކޮށް ވެސް ދެއްކުން މަނާކޮށް "މުޅި ރާއްޖެ" އަށް ކްރިމިނަލް ކޯޓުން އަމުރެއް ނެރެފައިވާއިރު،  އެ އަމުރާ ގުޅިގެން ފުލުހުންނާއި، ކޮންޓްރޯލް ކޮމިޝަނާއި، ރައީސް އޮފީސްވެސް ހިމެނޭގޮތަށް އެކި އިދާރާތަކުން ގެންދަނީ ނުސްވެރިންނަށް އަމާޒުކޮށް ފިޔަވަޅުތައް އަޅަމުންނެވެ.

އެހެންނަމަވެސް، ބޭރުގެ ބައެއް ޗެނަލްތަކުން އެ ޑޮކިއުމަންޓްރީގެ ވާހަކަ ގެންދަނީ ރިޕޯޓު ކުރަމުންނެވެ.

ވީއިރު، އެފަދަ ޗެނަލްތައް މަނާ ކުރުމަކީ ރާއްޖޭގެ ސަރވިސް ޕްރޮވައިޑަރުންނާ ގުޅިގެން މިވަގުތު ސަރުކާރުން ކުރާނެ ކަމެއްތޯ ރާއްޖެޓީވީން ވަނީ ބުރާސްފަތި ދުވަހުގެ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުޙައްމަދު ހުސައިން ޝަރީފް (މުންދު) އާ ސުވާލު ކޮށްފައެވެ. 

އެ ސުވާލުގެ ޖަވާބުގައި މުންދު ވިދާޅުވީ، އެފަދަ ކޮންޓެންޓު ގެނައި ނަމަވެސް، އެ ކޮންޓެންޓު ގެންނަ ބޭރުގެ ޗެނަލްތައް ރާއްޖޭގައި މަނާ ކުރުމުގެ އެއްވެސްަ ވިސްނުމެއް ނެތް ކަމަށެވެ. އަދި އެއީ ކޯޓުން ކުރާ ކަމެއްކަމަށް މުންދު ވިދާޅުވިއެވެ. 

ރައީސް މުހައްމަދު މުއިއްޒުގެ މައްޗަށް ކުރެވޭ ޖިންސީ ގޯނާ އާއި، ފުރައްސާރަ އާއި، އަދި މަގާމުގެ ނުފޫޒު ނަހަމަ ގޮތުގައި ބޭނުންކުރުމުގެ ތުހުމަތުތަކާ ގުޅޭގޮތުން ޚަބަރު ފެތުރި ދެ ނޫސްވެރިއަކު ދިވެހިރާއްޖޭގައި ޖަލަށްލާފައިވާއިރު، އެކަން ކުށްވެރިކޮށް މޯލްޑިވްސް ޖަރނަލިސްޓް އެސޯސިއޭޝަންގެ އިތުރުން އިތުރު އެކިއެކި ޖަމިއްޔާ ޖަމާއަތްތަކުންވެސް ވަނީ ކަންބޮޑުވުން ފާޅުކޮށްފައެވެ. އަދި ރާއްޖޭގެ ވަކިވަކި ނޫސްވެރިންނާއި މީޑިއާތަކަށް އަމާޒުކޮށް ފިޔަވަޅުތައް އަޅަމުންދާކަމަށް އެތައް ބަޔަކު ގެންދަނީ ބުނަމުންނެވެ.