ގައުމު ސަލާމަތް ކުރުމަށް ކުރީގެ ރައީސް ސޯލިހާއި، ނަޝީދު އަދި ޔާމީން އެކުގައި ނުކުތުމަށް ގޮވާލައްވައިފި
13 މެއި 2026 | ބުދަ 09:55ފައްޔާޒު ވިދާޅުވީ، ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް، ރައްޔިތުންގެ ނުރުހުން ފާޅު ކުރަން ޖެހޭ ކަމަށް. ގައުމު ސަލާމަތްކުރުމަށް ކުރީގެ ތިން ރައީސުން ކަމަށްވާ ސޯލިހާއި، ނަޝީދު އަދި ޔާމީން އެކުގައި ނުކުމެވަޑައިގަތުމަށް ވެސް ފައްޔާޒު ވަނީ ގޮވާލައްވާފައި. މި ތިން ރައީސުންނާއެކު ފަސްޖެހުމެއް ނެތި މި މަސައްކަތް ކުރުމަށް ތައްޔާރަށް ހުންނެވިކަން ފާހަގަކުރައްވައި ފައްޔާޒު ވަނީ މިހާރުން މިހާރަށް ނޫސްވެރިން މިނިވަން ކުރުމަށް ވެސް ގޮވާލައްވާފައި.
އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އޭސީސީ އަށް ހާޒިރުވަނީ. ފައިލް ފޮޓޯ. | އެމްޑީޕީ ސެކްރިޓޭރިއެޓް
ދިވެހިރާއްޖެ ސަލާމަތް ކުރުމަށް އިދިކޮޅުގައި ތިއްބެވި ކުރީގެ ތިން ރައީސުން އެކުގައި ނުކުތުމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ގޮވާލައްވައިފި އެވެ.
ބުދަ ދުވަހު އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ، ރައީސް މުއިއްޒު، ރައީސުލްޖުމްހޫރިއްޔާގެ މަގާމާ ހަވާލުވާން ކުރެއްވި ހުވަޔާ ހިލާފުވެފައިވާ ކަމަށާއި، ބުއްދި ފިލައި ގޮސްފައިވާ ކަމަށެވެ. އަދި އެމަނިކުފާނު ހުންނެވީ މުޅި ދައުލަތް ހިސޯރު ކޮށްގެން ކަމަށް ފައްޔާޒު ވިދާޅުވި އެވެ.
ގައުމުގެ ހާލަތަށް އިޝާރާތް ކުރައްވައި ފައްޔާޒު ވިދާޅުވީ ތަފާތު ވިސްނުންތައް އެއްފަރާތްކޮށް ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް ރައްޔިތުންގެ ނުރުހުމުގެ އަޑު އިއްވަން ޖެހޭ ކަމަށެވެ. މިއީ އިދިކޮޅު ލީޑަރުން އަދި ވަކިން ޚާއްސަކޮށް ކުރީގެ ރައީސް އިބްރާހިމް މުހައްމަދު ސޯލިހާއި، ކުރީގެ ރައީސް މުހައްމަދު ނަޝީދު އަދި ކުރީގެ ރައީސް އަބްދުﷲ ޔާމީން އެކުގައި ނުކުމެ ގައުމު ސަލާމަތް ކުރަންވީ ވަގުތު ކަމަށް އޭނާ ވިދާޅުވި އެވެ.
މި ތިން ރައީސުންނާއެކު ފަސްޖެހުމެއް ނެތި މި މަސައްކަތް ކުރުމަށް ތައްޔާރަށް ހުންނެވިކަން ފާހަގަކުރައްވައި ފައްޔާޒު ވަނީ މިހާރުން މިހާރަށް ނޫސްވެރިން މިނިވަން ކުރުމަށް އިންސާފުވެރި ފަނޑިޔާރުންނާއި މިނިވަން މުއައްސަސާތައް މަސައްކަތްކޮށް ދިނުމަށް އިލްތިމާސްކޮށްފަ އެވެ.
އަދަދުގެ ދެ ނޫސްވެރިން ކަމުގައިވާ ލީވާން އަލީ ނަސީރާއި މުހައްމަދު ޝަހުޒާން 12 މެއި 2026 ގައި ޖަލަށް ލުމާއި ގުޅިގެން ގިނަ ބަޔަކު ދަނީ އެކަން ކުށްވެރި ކުރަމުންނެވެ. އަދި ރައީސް މުއިއްޒުގެ ''ހުދުމުހުތާރު'' ވެރިކަމުން މި ގައުމު ސަލާމަތް ކުރުމަށް ގިނަ ބަޔަކު މަގު މައްޗަށް ނުކުތުމަށް ގިނަ އާއްމު ރައްޔިތުން ސޯޝަލް މީޑިއާގެ އެކިއެކި ފްލެޓްފޯމްތަކުގައި ދަނީ ގޮވާލަމުންނެވެ.
