އެމްއެމްޕީއާރްސީގެ ހިޔާނާތުގެ ތަހުގީގު: މިއީ އަންނަ ރުޅިއަކުން ނުވަތަ ހިތްހަމަ ޖައްސާލުމަށް ދައްކާ ވާހަކައެއްތަ؟

ދިވެހިރާއްޖޭގެ ފަހުގެ ތާރީޚެއްގައި ހިންގާފައިވާ އެންމެ ބޮޑު އަދި އެންމެ ނުފޫޒުގަދަ ކޮރަޕްޝަނަކީ އެމްއެމްޕީއާރްސީގެ ބޮޑު ހިޔާނާތެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ފެންމަތިވި މި މައްސަލައަކީ ދައުލަތުގެ އެތައް ބިލިއަން ރުފިޔާއެއް ގެއްލި، ރާއްޖޭގެ ސިޔާސީ މަސްރަހު މުޅިން ބަދަލުކޮށްލި ކަމެކެވެ. ނަމަވެސް، މިއަދާ ހަމައަށް އައިއިރުވެސް މި މައްސަލައިގައި އިންސާފު ގާއިމުކުރެވިފައި ނުވުމަކީ ރައްޔިތުންގެ ބޮޑު ކަންބޮޑުވުމެކެވެ.

ސަރުކާރުތަކުގެ ވައުދާއި، އަމަލީ މަސައްކަތަށް ބަލާއިރު، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރު ވެރިކަމަށް އައީ މި ހިޔާނާތުގެ މައްސަލަ ބަލައި، ގެއްލުނު ފައިސާ ހޯދާނެ ކަމުގެ ފޮނި އުންމީދުތަކަކާ އެކުގަ އެވެ. އެގޮތުން ރިޔާސީ ކޮމިޝަނެއް އުފައްދައި، އެތައް މިލިއަން ރުފިޔާއެއް އެ މަސައްކަތަށް ހޭދަކުރި އެވެ. ނަމަވެސް ފަސް އަހަރުގެ ދައުރު ނިމިގެން ދިޔައިރު، މި މައްސަލައިގައި މާބޮޑު ކުރިއެރުމެއް ލިބިފައިނުވެ އެވެ. މިއީ ރައްޔިތުންގެ މެދުގައި ސަރުކާރުތަކަށް އޮތް އިތުބާރު ކުޑަވެގެން ދިޔަ މައިގަނޑު އެއް ސަބަބު ކަމަށް ވެސް ގިނަ ބަޔަކު ބުނެ އެވެ.

އޭގެފަހުން 2023 ވަނަ އަހަރުގެ ރިޔާސީ އިންތިޚާބުގެ ކެމްޕޭން ތެރޭގައި މިހާރުގެ ރައީސް ޑރ. މުހައްމަދު މުއިއްޒު އެންމެ ބޮޑަށް ޕްރޮމޯޓް ކުރެއްވި އެއް ވައުދުފުޅަކީ ހިޔާނާތުގެ މައްސަލަތައް ބަލައި، ކޮރަޕްޝަން މި ގައުމުން ނައްތާލާނެކަމުގެ ވައުދުފުޅެވެ. އަދި ވެރިކަމަށް ވަޑައިގަތުމަށްފަހު ވެސް އެކިއެކި ޖަލްސާތަކުގައި މި ވާހަކަ ތަކުރާރު ކުރައްވަމުން ގެންދަވަ އެވެ. ޚާއްސަ ގޮތެއްގައި އެމްއެމްޕީއާރްސީ ހިޔާނާތުގެ މައްސަލަ ބަލައި، ފައިސާ ހޯދާނެ ވާހަކަ އެވެ. 

އެގޮތުން ޖުލައި 2024 ގައި ބޭއްވި ޕީއެންސީން ޖަލްސާއެއްގައި ރައީސް މުއިއްޒު ވިދާޅުވީ، ދައުލަތުގެ މުދާ ނަހަމަ ގޮތުގައި ވިއްކައިގެން ފައިދާ ހޯދި ފަރާތްތަކުގެ ކިބައިން އެ މުދާ އަނބުރާ ހޯދާނެ ކަމަށެވެ. 

ނަމަވެސް، ގިނަ ފަހަރަށް ރައީސް މުއިއްޒު މި ވާހަކަ ދައްކަވަނީ ސިޔާސީ މަސްރަހު ހަލަބޮލިވާ ދަނޑިވަޅުތަކުގަ އެވެ. އެކަން ވަރަށް ސާފުކޮށް މިއޮތީ މިފަހަރު މިއޮތީ ފެނިފަ އެވެ. ކުރީގެ ތިން ރައީސުން ގުޅިވަޑައިގެން ސަރުކާރާ ދެކޮޅަށް ސިޔާސީ ހަރަކާތްތައް ވަރުގަދަކުރަމުންދާ ދަނޑިވަޅެއްގައި، 14 މެއި 2026 ގައި ރައީސް މުއިއްޒު ވަނީ އެމްއެމްޕީއާރްސީ ހިޔާނާތް ފަދަ ރާއްޖޭގައި ހިންގާފައިވާ ބޮޑެތި ކޮރަޕްޝަންގެ މައްސަލަތައް ބެލުމަށް އަނެއްކާ ވެސް މިނިވަން މުއައްސަސާތަކަށް ގޮވާލައްވާފަ އެވެ. އަދި މި ހިޔާނާތުގައި އިސްކޮށް ތިބި މީހުން ދޫވެފައި ތިބި ތިބުމަށް އެމަނިކުފާނު ފާޑު ވިދާޅުވި އެވެ.

މީގެ އިތުރުން ކޮވިޑް-19 ގެ ވެންޓިލޭޓަރު ހިޔާނާތުގެ ވާހަކައަކީވެސް ރައްޔިތުން ހަނދާން ނެތޭނެ ކަމެއް ނޫން ކަމަށް ވިދާޅުވެ، އެކަމުގައި ޝާމިލުވާ ފަރާތްތަކަށް އަދަބު ދޭންޖެހޭނެ ކަމަށް ވިދާޅުވި އެވެ.

ނަމަވެސް، މި ހުރިހާ ވާހަކަތަކެއް ދައްކަވާއިރު ވެސް، އަމަލީ ގޮތުން ނަތީޖާއެއް ފެންނަން ނެތުމަކީ ސުވާލު އުފެދޭ ކަމެއް ނުންތޯ އެވެ. އެމްއެމްޕީއާރްސީގެ މައްސަލަ ބަލައި، ކުރިއަށް ގެންދަން ނުކުރޭނެ ކަަމަށް ތަކުރާރުކޮށް ކުރީގެ ރައީސް ޔާމީން ވިދާޅުވަމުން ގެންދަވާ ވާހަކަތަކުގައި ވެސް ބުރަދަނެއް ހުރިކަން ހާމަވެ އެވެ. އެއީ  މި ސަރުކާރަށް ދެ އަހަރަށް ވުރެ ގިނަ ދުވަސްވެގެން ދިޔައިރު، ތަހުގީގަށް އެއްވެސް ކުރިއެރުމެއް ލިބިފައިނުވާތީ އެވެ. 

އެހެންކަމުން މިއީ ސިޔާސީ ގޮތުން ރައީސް މުއިއްޒަށް ދަތިވާ ކޮންމެ ފަހަރަކު ރައްޔިތުންގެ ސަމާލުކަން އަނބުރާލުމަށް ބޭނުންކުރާ ހަތިޔާރެއްގެ ގޮތުގައި ބެލުމުގެ ޖާގަ އެބައޮތެއްނުންތޯއެވެ!