މިއީ ޑިމޮކްރަސީގެ ރިވެތި މިސާލު ދައްކަވައި، އިސްތިއުފާ ދެއްވަންވީ ވަގުތު!

ދުނިޔޭގެ ކުރިއަރާފައިވާ ޑިމޮކްރަސީ ތަކުގައި ވެސް، ރައްޔިތުންގެ އިތުބާރު ނެތްކަން ޔަޤީންވުމާ އެކު ވެރިން ދެއްވަނީ އިސްތިއުފާ އެވެ. ސަރުކާރަށް ރައްޔިތުންގެ ތާއީދު ނެތްކަން ވޯޓަކުން ކަށަވަރު ވެއްޖެ ނަމަ، ރައްޔިތުންގެ ބަސް ޤަބޫލު ކުރުމަށް ފަހު ވެރިން ފަހަތަށް ޖެހިވަޑައިގަންނަވަ އެވެ. ފަހަރުގައި މަގާމު ދޫކޮށްލުމަކީ ހިތްދަތި ކަމަކަށް ވިޔަސް، އެއީ ޑިމޮކްރަސީގެ ރިވެތި މިސާލެކެވެ. އެއީ ޑިމޮކްރަސީގެ ހަމަތަކާއި، މިންތަކުގެ ތެރޭގައި އޮންނަ ކަމެކެވެ.

ދައްކަން މި އުޅެނީ ހޮނިހިރު ދުވަހު ރާއްޖޭގައި ކުރިއަށް ދިޔަ ރައްޔިތުންގެ ޚިޔާލު ހޯދުމުގެ އާންމު ވޯޓުގެ ވާހަކަ އެވެ. މިއީ ސީދާ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އާއި، އެމަނިކުފާނުގެ ސަރުކާރުން ބޭނުން ވެގެން ނެގި ވޯޓެވެ. ޤާނޫނު އަސާސީ އަށް އިސްލާޙު ގެނެސް، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮލުމަށް ހުށަހެޅި ޚިޔާލެވެ. ޤަނޫނު އަސާސީ އަށް އެ ބަދަލު ގެނެވެނީ ރައްޔިތުންގެ ޚިޔާލު ހޯދައިގެން ކަމަށްވުމާ އެކު، ރައްޔިތުންގެ ކިބައިން އެ ވޯޓަށް އެހީ އެވެ.

މި އިންތިޚާބުގައި ރައީސް ޑޮކްޓަރު މުޢިއްޒު ހުންނެވީ ވަކި ސްޓޭންޑެއް ނަންގަވައިގެންނެވެ. އެއީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށެވެ. އެކަން ކުރަން ޖެހޭ ސަބަބު ތަކާއި، އެމަނިކުފާނު އެކަން ކުރަން ބޭނުންފުޅުވާ ސަބަބުތައް ރައީސް މުޢިއްޒު ގެންދެވީ އެތައް ޖަލްސާގައި ވިދާޅުވަމުންނެވެ. ފާޅުގައި ނިކުންނަވައި އެކަމަށް ކެމްޕެއިން ކުރައްވައި، ދައުލަތުގެ ވަސީލަތްތައް ފާޅުގައި ބޭނުން ކުރެއްވި އެވެ. ފާޅުގައި ރައީސް މުޢިއްޒު ވިދާޅުވީ، އެ ބަދަލު ގެންނަން އެމަނިކުފާނު ބޭނުންފުޅުވާ ކަމަށާއި، ރައްޔިތުން އެކަމަށް ތާއީދު ކޮށްދެއްވުމަށް އެދިވަޑައިގަންނަވާ ކަމަށެވެ. 

ސީދާ ރައީސް ބޭނުންފުޅު ވެގެން ހުންނެވި ބަދަލެއްގެ ނަތީޖާ ނިކުތީ ދިމާ އިދިކޮޅަށެވެ. ގާތް ގަނޑަކަށް ވޯޓުލީ މީހުގެ 70 އިންސައްތަ މީހުން ވަނީ އެ ބަދަލު ގެނައުމާ ދެކޮޅަށް ވޯޓު ދީފަ އެވެ. ދެ އިންތިޚާބު އެއްކުރަން ދިވެހި ރައްޔިތުންގެ ތެރެއިން ވޯޓުގައި ބައިވެރިވި ބޮޑު އިންސައްތައެއް ވަނީ ނޫނެކޭ ބުނެފަ އެވެ. މިއީ ރައްޔިތުންގެ މަޖިލީހުގެ 70 އިންސައްތަ އަށް ވުރެ ގިނަ މެމްބަރުންގެ ވޯޓާ އެކު ފާސް ކުރި އިސްލާޙެކެވެ. މިކަމަށް ރައްޔިތުންގެ ޚިޔާލަށް އެހުމުން، 70 އިންސައްތަ އަށް ވުރެ ގިނަ ރައްޔިތުން އެކަމަށް ނޫނެކޭ ބުނެއްޖެ އެވެ. މިއީ ވިސްނާލަން ޖެހޭ ކަމެކެވެ. 

ރައްޔިތުންގެ މެސެޖު ސާފެވެ. ރައްޔިތުންގެ މެސެޖު ފާޅުގައި އެ އޮތީ ފެންނާށެވެ. ރައްޔިތުން ސަރުކާރަށް އަދި ޚުދު ރައީސް މުޢިއްޒު އަށް އެ ދިނީ "ހޫނު" މެސެޖެކެވެ. މި އިންތިޚާބުގެ ނަތީޖާ އިން ދައްކުވައި ދެނީ ދިވެހި ރައްޔިތުންގެ މެދުގައި ރައީސް މުޢިއްޒު އަށް ތާއީދު ނެތް ކަމެވެ. ސަބަބަކީ ސީދާ އެމަނިކުފާނު ހުށަހެޅުއްވި ހުށަހެޅުމަކަށް ރައްޔިތުންގެ މިހާ ބޮޑު އިންސަައްތަ އަކުން ނޫނެކޭ ބުނީމަ އެވެ. އެހެންވީމާ، މިއީ ޑިމޮކްރަސީގެ ރިވެތި މިސާލު ދައްކަވައި އިސްތިއުފާ ދެއްވަންވީ ވަގުތެވެ. ރައްޔިތުންގެ ވިންދާއި އިޙުސާސް ޤަބޫލުކޮށް، ޤައުމުގެ ހިންގުން ދޫކޮށްލަންވީ ވަގުތެވެ.

މިއީ ދުނިޔޭގެ ކުރިއަރާފައިވާ ޑިމޮކްރަސީ ތަކުގައި ވެސް އަޅުގަނޑުމެންނަށް ފެންނަން އޮތް މިސާލެކެވެ. އެގޮތުން 2016 ވަނަ އަހަރުގެ ތެރޭގައި، ޔޫރަޕިއަން ޔޫނިއަންގައި އިނގިރޭސިވިލާތް ދެމި އޮންނާނީތޯ، ނުވަތަ ނޫންތޯ ބެލުމަށް ނެގި ޚިޔާލު ހޯދުމުގެ ވޯޓުގައި އޭރުގެ ބޮޑު ވަޒީރު ޑޭވިޑް ކެމެރޫންގެ ސަރުކާރު ބަލިވުމާ އެކު، ރައްޔިތުންގެ އެ ނިންމުން ޤަބޫލު ކުރައްވައި ބޮޑު ވަޒީރުގެ މަގާމުން ކެމެރޫން އިސްތިއުފާ ދެއްވީ އެވެ. 

މީގެ އިތުރުން 2016 ވަނަ އަހަރު އިޓަލީގެ ޤާނޫނު އަސާސީ އަށް ބަދަލު ގެނައުމަށް އޭރުގެ ބޮޑު ވަޒީރު މަތެއޯ ރެންޒީ ހުށަހެޅުއްވި އިސްލާޙު ތަކަށް އެ ޤައުމުގެ ރައްޔިތުން ނޫނެކޭ ބުނުމާ އެކު، ނަތީޖާ ޤަބޫލު ކުރައްވައި ރެންޒީ ވަނީ ބޮޑު ވަޒީރުގެ މަގާމުން އިސްތިއުފާ ދެއްވައިފަ އެވެ.

ހަމަ އެއާ އެކު، 2014 ވަނަ އަހަރުސްކޮޓްލެންޑަކީ މިނިވަން ވަކި ޤައުމެއްގެ ގޮތުގައި އޮންނަން ފެނޭތޯ ނުވަތަ ނޫންތޯ ބެލުމަށް ނެގި ޚިޔާލު ހޯދުމުގެ ވޯޓުގައި ރައްޔިތުން ނޫނެކޭ ބުނުމާ އެކު، ސްކޮޓްލެންޑުގެ ފަސްޓް މިނިސްޓަރު އެލެކްސް ސަލްމޮންޑް ވެސް ވަނީ މަގާމުން އިސްތިއުފާ ދެއްވައިފަ އެވެ.

ހަމަ އެހެންމެ، 2005 ވަނަ އަހަރު ފްރާންސްގައި ނެގުނު ރައްޔިތުންގެ ޚިޔާލު ހޯދުމުގެ ވޯޓުގައި ބަލިވެ ވަޑައިގަތުމާ އެކު، ފްރާންސްގެ އޭރުުގެ ބޮޑު ވަޒީރު ޖީން ޕިއޭރް ރަފަރިން ވެސް ވަނީ މަގާމުން އިސްތިއުފާ ދެއްވައިފަ އެވެ. މީގެ އިތުރުން ވެސް މިކަހަލަ ކިތަންމެ މިސާލެއް އަޅުގަނޑުމެންނަށް ފެންނަން އެބަ ހުއްޓެވެ.

އެހެންކަމުން، ގިނަ ބަޔަކު ޤަބޫލު ކުރާ ގޮތުގައި ހޮނިހިރު ދުވަހު ނެގުނު ރައްޔިތުންގެ ޚިޔާލު ހޯދުމުގެ ވޯޓުގައި ރައީސް މުޢިއްޒު އާއި ސަރުކާރު ބަލިވެފައިވާއިރު، އެ ނަތީޖާ ޤަބޫލުކޮށް ރައީސް މުޢިއްޒު އިސްތިއުފާ ދެއްވުމަކީ ކުރަން ޖެހޭ ކަމެކެވެ. ރާއްޖޭގެ ބައެއް ސީޔާސީ ލީޑަރުންނާއި، އާންމު ރައްޔިތުން ވެސް އަންނަނީ ރައީސް މުޢިއްޒުގެ އިސްތިއުފާ އަށް ގޮވާލަމުންނެވެ.