"ކޮންމެ މެންދުރަކަށް ފަހުން ފިނިކަން ހަވީރުގެ އަންނަނީ!"

ރާއްޖޭގެ ސިޔާސީ މައިދާނުގައި ބަދަލު ނުވެ އޮތް ހަމައެކަނި ފިކުރަކީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އެވެ. ގިނަ ޕާޓީ ތަކެއް އެކުލެވޭ ސިޔާސީ ނިޒާމަކަށް ރާއްޖެ ފުރޮޅާލި ފަހުން، ސިޔާސީ އެތައް ޕާޓީ ތަކެއް ވުޖޫދުވެ، ވުޖޫދުން ފޮހެވިގެން ގޮސްފި އެވެ. ނަމަވެސް، އެއް ވިސްނުމެއްގައި، އަދި އެއް ފިކުރެއްގައި މިއަދާ ހަމައަށް އޮތް ހަމައެކަނި ޕާޓީ އަކީ އެމްޑީޕީ އެވެ.

އެމްޑީޕީ އަކީ ޚިޔާލު ތަފާތުވުން ތަކާއި، ދެބަސްވުން ތަކުން ޙައްލު ހޯދައި، އެއްބަސްވުމަކަށް އަންނަ ޕާޓީ އެކެވެ. މިއަދާ ހަމައަށް ފެންނަން އޮތް ހަގީގަތަކީ އެއީ އެވެ. ސިޔާސީ ވާދަވެރިކަމާއި، ލީޑަރުންގެ ވާދަވެރިކަން އެމްޑީޕީގެ ތެރޭގައި އޮތެއް ކަމަކު، އެމްޑީޕީ އިން އަބަދު ވެސް ދެބަސްވުމުން އެއްބަސްވުމަކަށް އާދެވެ. އެމްޑީޕީ އާއެކު ވުޖޫދުވެގެން އައި ޕާޓީތައް މިއަދު ސިޔާސީ މައިދާނުން ގެއްލިގެން ދިޔައިރު ވެސް، ބަދަލުވުމެއް ނެތި އެމްޑީޕީ އޮތް ސަބަބަކީ އެއީ އެވެ.

ދިވެހި ރައްޔިތުންގެ ޕާޓީ (ޑީއާރުޕީ) އަށް ފަހު، ދެން އުފެދުނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެވެ. މި ދެ ޕާޓީ ވެސް ވުޖޫދުން ފޮހެވިގެން ދާން ޖެހުނީ، އިސް ލީޑަރުންގެ ދެ މެދުގައި އުފެދުނު ނުތަނަވަސްކަމުގެ ތެރެއިންނެވެ. އެ ފިކުރުގެ ތިން ވަނަ ޕާޓީ އަކަށް މިއަދު އެ އޮތީ، ޕީޕަލްސް ނެޝަނަލް ކޮންގްރެސް (ޕީއެެންސީ) އެވެ. މިއީ ފާއިތުވި 19 ވަރަަކަށް އަހަރުގެ ތެރޭގައި އެއް ފިކުރަކުން އުފެދުނު ތިން ވަނަ ޕާޓީ އެވެ.

މިއަދު ވެސް އެމްޑީޕީގެ އެތެރޭގައި ދެބަސްވުންތައް އޮވެ އެވެ. ލީޑަރުންގެ ޚިޔާލު ތަފާތުވުންތަކާއި، އާންމު މެމްބަރުންގެ ދެބަސްވުންތައް ވެސް އޮވެ އެވެ. އެކަމަކު، މިއަދު އެންމެނަށް ވެސް ޔަގީންވާ ކަމަކީ، އެމްޑީޕީ އިން، ދެބަަސްވުން ތަަކަށް ހައްލު ހޯދާނެ އެވެ. އެއްބަސްވުމަކަށް އަންނާނެ އެވެ. ލީޑަރުން އެކައްޗެއް ކިޔައި، އާންމު މެމްބަރުން އެއް ކުރުވާނެ އެވެ. އެމްޑީޕީ ދެމި އޮތީ އެ އުސޫލުގެ ތެރޭގަ އެވެ. 

އެކަމާ އެންމެ ގުޅުން ހުރި ވާހަކައެއް ވިދާޅުވެފައިި އޮތީ، ކުރީގެ ރައީސް އިބްރާހީމް މުޙައްމަދު ސޯލިޙު އެވެ. 2018 ވަނަ އަހަރު ވެރި ކަމުގެ ހުވާ ކުރެއްވުމަށް އޮތް ޖަލްސާ އާއި، 2022 ވަނަ އަހަރު އޮތް އެމްޑީޕީގެ ކޮންގްރެސްގައި ވެސް ރައީސް ސޯލިޙު ވިދާޅުވީ އެ ވާހަކަ އެވެ. އޭގެ ފަހުން، މިއަދު އެމްޑީޕީގެ މެމްބަރުން ވެސް ބުނަމުން އެ އަންނަނީ އެ ވާހަކަ އެވެ. 

" ކޮންމެ ފަދަ ހޫނެއް ވިޔަސް، މެންދުރުގެ އަވިގަދަ ވަގުތުގާ

            ކޮންމެ މެންދުރަކަށް ފަހުން، ފިނިކަން ހަވީރުގެ އަންނަނީ "

އެމްޑީޕީގެ އެެތެރޭގައި ދެބަސްވުމެއް އުފެދޭ ކޮންމެ ފަހަރަކު، އެންމެ ބޮޑު އުފާވެރި ކަމެއް ފެންނަނީ، އެމްޑީޕީއާ އިދިކޮޅު ޕާޓީ ތަކުގެ ކިބައިންނެވެ. އެއީ އެމްޑީޕީގެ ސަފުތައް ރޫޅި، އެމްޑީޕީ ރޫޅިގެން ދާން އެވެރިން އެދޭލެއް ބޮޑު ކަމުންނެވެ. އެކަމަކު، ހަގީގަތަކީ އިއްޔެ ވެސް، އަދި މިއަދު ވެސް އެކަން އެހެން ނުވުމެވެ. ކުރިން ވެސް މި ބުނިހެން، އެމްޑީޕީ އެއް ގަލަކަށް އަރާތީ އެވެ.

މިއަދު އަނެއްކާ ވެސް އެމްޑީޕީ ފެންނަނީ ވަރުގަދަ ކޮށެވެ. އެމްޑީޕީ އިން އަނެއްކާ ވެސް ރާއްޖޭގެ ސިޔާސީ މަސްރަހު ބަދަލު ކޮށްލައި، ލީޑަރުންގެ އެންމެ ފުރިހަމަ ނަމޫނާ ދައްކައިފި އެވެ. އެމްޑީޕީގެ އިސް ލީޑަރުން ހައްލު ހޯދައިފި އެވެ. އެއް ގަަލަކަށް އަރައިފި އެވެ. ޚިޔާލު ތަފާތުވުން ތަކުން ދުރުވެ، އެއް ޚިޔާލަަކަށް އަތުވެއްޖެ އެވެ. މަޤުސަދު ވަރަށް ސާފެވެ. 2028 ވަނަ އަހަރުގެ ރިޔާސީ އިންތިޚާބު ކާމިޔާބުކޮށް، ދިވެހި ރައްޔިތުންނަށް ހެޔޮ ވެރި ކަމެއް ކޮށްދިނުމެވެ. 

އާދެ، ކޮންމެ މެންދުރަކަށް ފަހުން ފިނިކަން ހަވީރުގެ އަންނާނެ އެވެ.