ދޫ ބަންދު ކުރުމަކީ އެއްވެސް ޒަމާނެއްގައި އެއްވެސް ވެރިއަކަށް ކާމިޔާބު ކުރެވުނު ކަމެއް ނޫން: ކުރީގެ މެންބަރު އިބްރާހިމް ރަޝީދު
އަދަދު ނޫހުގެ ދެ ނޫސްވެރިން ހައްޔަރުކުރި މައްސަލަ ކުށްވެރިކުރައްވައި، މިއީ ނޫސްވެރިންނާއި ރައްޔިތުންނަށް ބިރުދެއްކުމަށް ސަރުކާރުން ކުރާ ކަމެއްގެ ގޮތުގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވަނީ ސިފަ ކުރައްވާފައި. ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން ހިފެހެއްޓުމަށް "ގެގް އޯޑަރު" ފަދަ ވަސީލަތްތައް ބޭނުންކުރި ނަމަވެސް، ރައްޔިތުންގެ ދޫ ބަންދުނުކުރެވޭނެ ކަމަށާއި ގާނޫނުއަސާސީން ލިބިދޭ އަސާސީ ހައްގުތައް ދިފާއުކުރުމުގައި ދިވެހިން ފަހަތަށް ނުޖެހޭނެ ކަމަށް އޭނާ ވިދާޅުވި. އަދި ދައުލަތުގެ ބާރު ބޭނުންކޮށްގެން ދޭ އިންޒާރުތަކަށް ނޫސްވެރިން ބޯނުލަނބާނެ ކަމަށް ވެސް އޭނާ ފާހަގަކުރެއްވި.
ރާއްޖެޓީވީގެ ފަލަސުރުހީ ޕްރޮގްރާމްގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވާހަކަ ދައްކަވަނީ. | ރާއްޖެއެމްވީ
އިންސާނުންގެ ދޫ ބަންދު ކުރުމަކީ އެއްވެސް ޒަމާނެއްގައި އެއްވެސް ވެރިއަކަށް ކާމިޔާބު ކުރެވުނު ކަމެއް ނޫން ކަމަށާއި، ރާއްޖޭގައި ވެސް މިކަން ނުކުރެވޭނެ ކަމަށް މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިބްރާހިމް ރަޝީދު ވަނީ ރައީސް ޑރ.މުހައްމަދު މުއިއްޒުގެ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. 12 މެއި 2026 ވަނަ ދުވަހު އަދަދު ނޫހުގެ ނޫސްވެރިން ކަމަށްވާ މުހައްމަދު ޝަހުޒާން އާއި ލީވާން އަލީ ނާސިރު ޖަލަށްލީ މައްސަލަ ވަރަށް ބޮޑަށް ކުށްވެރިކޮށްފައިވެ އެވެ. އަދި މިއީ ރައްޔިތުންނާއި، ނޫސްވެރިންނަށް ބިރު ދެއްކުމުގެ ގޮތުން ކުރި ކަމެއްގެ ގޮތުގައި އޭނާ ސިފަ ކުރެއްވި އެވެ.
އިބްރާހިމް ރަޝީދު ވިދާޅުވީ، އިންސާނުންގެ ދޫ ބަންދު ނުކުރެވޭނެ ކަމަށާއި، މިއީ އެއްވެސް ޒަމާނެއްގައި އެއްވެސް ވެރިއަކަށް ކާމިޔާބު ކަމާއެކު ކުރެވުނު މަސައްކަތެއް ނޫން ކަމަށެވެ. އަދި ވިދާޅުވީ ގަލަމުގެ މިނިވަންކަމާއި، ފިކުރު ކުރުމުގެ މިނިވަންކަން ނުހިފެހެއްޓޭނެ ކަމަށެވެ.
ފިކުރުކުރުމެއްގެ މިނިވަންކަމަކީ އެއްވެސް ނުދެވޭ އެއްޗެއް އިންސާނުންނަށް، އެހެން އިންސާނަކަށް. އޭނަ ބުއްދިން އޭނަ ޚިޔާލަށް އަންނަ ޝުއޫރުތައް ފާޅުކުރެވޭނެ. ދެން އަޅުގަނޑު މި އޮތީ ގާނޫނުއަސާސީން ވަރަށް ބޮޑަށް އަސާސީ ހައްގު ބާބުގައި، ދުލުގެ މިނިވަންކަން، ޚިޔާލު ފާޅުކުރުމުގެ، ޝައޫރުތައް ފާޅުކުރެވި، އިހުތިޖާޖުކުރުމާ، އެކި ކަންކަމުގައި ވާހަކަދެއްކުމާ ބަހުސްކުރެވުނު ވަރަށް ފުޅާ ދާއިރާއެއްގައިދޭނެ. އޮއްވައި ތި ފާހަގަކުރެވުނީ، މިއަދު އެ ދިޔައީ ކަންތައްތަކުން ރައްޔިތުންނަށް ބިރުދައްކައިގެން. ބިރު އެ ބާރެއްގެ ގޮތުގައި. ބިރެއް ނުގަންނާނެ މީހާ ރައްޔިތުންނެއް. ޖެހިލުންވެސް ނުވާނެ މީހާ ރައްޔިތުންނެއް. އެއަށްވުރެ މާ އެހެން މަރުހަލާއެއްގައި ދިވެހިރާއްޖޭގެ ރައްޔިތުން މި އޮތީ ޑިމޮކްރަސީ މިގައުމަށް ގެނެސްފައި. މި ގާނޫނުއަސާސީ ހޯދާފައި. ރާއްޖޭގައި ތިބި ހުރިހާ ރައްޔިތުންވެސް ޖަލަށް ދާން ތައްޔާރަށް ތިބޭނީ މިކަހަލަ ކަމެއް ވެއްޖެ.މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު
ޝަރީއަތުގައި ހިނގަމުންދާ ކަމަކާ ގުޅިގެން ވަކި ގޮތަކަށް އަމަލު ނުކުރުމަށް އަންގައި ނެރޭ އަމުރު (ގެގް އޯޑަރ) އަށް އިޝާރާތް ކުރައްވައި އިބްރާހިމް ރަޝީދު ވިދާޅުވީ މިއީ ކޮވިޑް-19 ނޫން ކަމަށާއި، މި ވަބާ މުޅި ގައުމުގައި ފެތުރުނު ގޮތަށް މިފަދަ އޯޑަރެއް ނުފެތުރޭނެ ކަމަށެވެ. މިއީ ރައްޔިތުން ބަލައިގަންނާނެ ގެގް އޯޑަރެއް ނޫން ކަމަށް އޭނާ ވިދާޅުވި އެވެ.
މިއީ އެމެރިކާ ތެރެއިން އައި އެއްޗެއް. އެންމެ ހަޅޭލަވަނީ ވެސް މި އެމެރިކާއަށް. އެމެރިކާ ތެރޭގައި، އެމެރިކާ ކޮންގްރެސް ތެރޭގައި ކުރީގައި ހަމަ އެގޮތަށް ރައްޔިތުން ޚިޔާލު ފާޅުކުރަނީ. އެންމެން ހައްގުުތަކަށް ގޮވަނީ. އެހެންވީމާ، ހައްގުތަކަށް ނުގޮވޭ ގޮތަށް، ހައުސް އޮފް ރެޕްރެޒެންޓަރުންނާއި އެ މީހުންގެ ލޮބީ ވެސް ނުކުރެވޭ ގޮތަށް ވަކި ކަންތައްތަކަކަށް އުފެއްދި އެއްޗެއް މި އެއްޗަކީ. ދެން މީތި ނަގައިގެން ހިރަފުސް ފޮޅާލައިގެން އަނެއްކާ އެކި ނަންނަމުގައި ދެން އުޅޭނެ ފާޑުފާޑުގެ ލޯޔަރުންނޭ ކިޔާފައި. މި މީހުން ގެންގުޅޭ އެކަމަށް ވަގަށް ގެޔަށް ވެސް ވަންނަ ލޯއެރުން އުޅޭނެ. ތަށިބަރި ހިފައިގެން އެއްދުވަސް މުލިއާގެ ތެރެއިން ނުކުންނަނިކޮށް ފެނުނެއްނު. އޭގެ ލޯޔަރެއް. ކޮންމެ ވެރިކަމެއްގައި ވެސް އުޅޭނެ އެކަހަލަ ލޯޔަރުން. މި މީހުން ތަންތާގައި ހުންނަ މިކަހަލަ އެތިއެތިކޮޅު ނަގައިގެން ގިގް އޯޑާ މިހާރު ކިޔަނީ. ދިވެހިރާއްޖޭގެ ރައްޔިތުން ދަންނަ އެއްޗެއް ނޫން. މިހާރު އެހެން ވެރިކަންތައް ވެސް މައުމޫނުގެ ވެރިކަން ވެސް، ވަޙީދުވެރިކަން ވެސް، ފެނިއްޖެ. ދެން ހުރި މީހެއްގެ ވެރިކަން ޔާމީނު. މި ގިގް އޯޑަރެއްގެ ވާހަކައެއް ނުދައްކާ އެއްވެސް ރައްޔިތެއް. އާއްމުވެގެންވާ ގިގެއް އޯޑަރެއް ނެރެގެން މިހާރު މިއަދު އެ އޯޑަރުގެ ދަށުން އަޅުގަނޑު ހައިރާންވޭ.މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު
އިބްރާހިމް ރަޝީދު ވިދާޅުވީ މުޅި ގައުމު ކަންބޮޑުވެފައިވާ މައްސަލައަކާ ގުޅޭގޮތުން ނޫސްވެރިންނަށް ސުވާލު ކުރެވޭނެ ކަމަށާއި، އަދަދުގެ ނޫސްވެރިޔާ ވެސް ކުރީ އެފަދަ ސުވާލެއް ކަމަށެވެ. އަދި ވިދާޅުވީ މިއަދު އާރާބާރުގެ ބޭނުންކޮށް ރައްޔިތުންނާއި، ނޫސްވެރިންނަށް އިންޒާރު ދިން ނަމަވެސް އެ އިންޒާރުތަކަށް ބޯނުލަވާނެ ކަމަށެވެ.
