އާންމުކޮށް ފެނިފައި ނުވާ އީރާނުގެ އައު ރޫހާނީ ލީޑަރާ ބައްދަލު ކުރެއްވި ކަމަށް އީރާނުގެ ރައީސް ވިދާޅުވެއްޖެ

އިރާނުގެ ރޫހާނީ ލީޑަރުގެ މަގާމަށް މާރިޗު މަހުގެ ކުރީކޮޅު އައްޔަންކުރެއްވި ފަހުން އާންމުންގެ ކުރިމައްޗަށް ނުކުމެވަޑައިގެންފައިނުވާ މުޖުތަބާ ޚާމަނާއީއާ ބައްދަލުކުރައްވާފައިވާ ކަމަށް އެ ގައުމުގެ ރައީސް މަސްއޫދު ޕެޒެޝްކިއަން ބުރާސްފަތި ދުވަހު ވިދާޅުވެއްޖެއެވެ.

ދައުލަތުގެ ޓީވީން ދެއްކި ވީޑިއޯއެއްގައި ރައީސް ޕެޒެޝްކިއަން ވިދާޅުވީ، އިސްލާމީ އިންގިލާބުގެ ރޫހާނީ ލީޑަރާ އެކު ބޭއްވި ބައްދަލުވުމުގައި އެންމެ ބޮޑަށް ފާހަގަކުރެވުނީ އެމަނިކުފާނުގެ ދުރުވިސްނުންފުޅާއި، ހިތްތިރިކަމުގެ އިތުރުން އިޚުލާޞްތެރިކަން ކަމަށެވެ.

މެދުއިރުމަތީގެ ހަނގުރާމަ ފެށުނު ފުރަތަމަ ދުވަހު ދިން ހަމަލާތަކުގައި، މުޖުތަބާ ޚާމަނާއީގެ ބައްޕާފުޅު އަދި ކުރީގެ ރޫހާނީ ލީޑަރު އަލީ ޚާމަނާއީ އަވަހާރަވެ، މުޖުތަބާ ޚާމަނާއީއަށް ވަނީ އަނިޔާވެފައެވެ. ރޫހާނީ ލީޑަރުގެ މަގާމާ ހަވާލުވެވަޑައިގަތް ފަހުން މިހާތަނަށް އެމަނިކުފާނު ނެރުއްވާފައިވަނީ ހަމައެކަނި ލިޔުމުން ދެއްވާ ބަޔާންތަކެވެ.

އުމުރުފުޅުން 86 އަހަރުގައި އަލީ ޚާމަނާއީ އަވަހާރަވީ، ތިރީސް އަހަރަށްވުރެ ގިނަ ދުވަހު އީރާނުގެ އެންމެ މަތީ ވެރިޔާގެ ގޮތުގައި ހުންނެވުމަށްފަހުގައެވެ.

އަލީ ޚާމަނާއީ އެ މަގާމާ ހަވާލުވެވަޑައިގަތީ 1989 ވަނަ އަހަރު، އެ ޖުމްހޫރިއްޔާގެ ބާނީ އާޔަތުﷲ ރުހުﷲ ޚުމައިނީ އަވަހާރަވުމާ ގުޅިގެންނެވެ.

އިރާނުގެ ރޫހާނީ ލީޑަރު އައްޔަންކުރުމުގެ މަސްއޫލިއްޔަތު އޮންނަ 88 މެންބަރުންގެ މައްޗަށް އެކުލެވޭ "އެސެމްބްލީ އޮފް އެކްސްޕާޓްސް" އިން މުޖުތަބާ ޚާމަނާއީ އެ މަގާމަށް އައްޔަންކުރިކަން ދައުލަތުގެ ޓީވީން އިއުލާންކުރީ މާރިޗު މަހުގެ 9 ވަނަ ދުވަހުއެވެ.

އެ ދުވަހުން ފެށިގެން އުމުރުފުޅުން 56 އަހަރުގެ މުޖުތަބާ ޚާމަނާއީގެ ފޮޓޯތައް އިރާނުގެ މަގުތަކުގައި ވަރަށް ގިނައިން ހަރުކޮށްފައި ހުރި ނަމަވެސް، އެމަނިކުފާނުގެ ބައްޕާފުޅާ ޚިލާފަށް، އާންމުކޮށް އާ ލީޑަރު ފެނިފައިނުވާކަން ވަނީ ވަރަށް ބޮޑަށް ފާހަގަކުރެވިފައެވެ.