އީރާންގެ ކާގޯ ބޯޓެއް އެމެރިކާ އިން ހިފެހެއްޓުމުން ޗައިނާ އިން ކަންބޮޑުވުން ފާޅުކޮށްފި

އީރާނުގެ ދިދަ ނަގައިގެން ދަތުރުކުރި މުދާ އުފުލާ ބޯޓަކަށް އެމެރިކާގެ ސިފައިން ހުރަސްއަޅައި، އެ ބޯޓު ހިފެހެއްޓި މައްސަލައިގައި ޗައިނާއިން ކަންބޮޑުވުން ފާޅުކޮށްފިއެވެ. ޗައިނާގެ ފޮރިން މިނިސްޓްރީގެ ތަރުޖަމާނު ހޯމަ ދުވަހު ވިދާޅުވީ، ކަމާބެހޭ ހުރިހާ ފަރާތްތަކުން ވެސް ޒިންމާދާރުކަމާއެކު ހަނގުރާމަ ހުއްޓާލުމުގެ އެއްބަސްވުމަށް އިޙްތިރާމްކޮށް، އެއަށް އަމަލުކުރަން ޖެހޭނެ ކަމަށެވެ.

ޗައިނާގެ ފޮރިން މިނިސްޓްރީގެ ތަރުޖަމާނު ގުއޯ ޖިއާކުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ހޮރްމޫޒް ކަނޑުއޮޅީގެ މަސްރަހަކީ ނާޒުކު އަދި އޮޅުންބޮޅުން ބޮޑު މަސްރަހެއް ކަމަށެވެ. އަދި މަސްރަހު އިތުރަށް ގޯސްވިޔަނުދީ، އެ ކަނޑުއޮޅިން އާންމު އުސޫލުން އުޅަނދުފަހަރު ދަތުރުކުރުމުގެ ފުރުސަތު އަލުން ހުޅުވާލުމަށް ބޭނުންވާ މާހައުލެއް ގާއިމުކުރުމަށް އޭނާ ވަނީ ގޮވާލައްވާފައެވެ.

އީރާނުގެ ބަނދަރުތައް ބަންދުކޮށް އެމެރިކާއިން އަޅާފައިވާ ފިޔަވަޅުތަކާ ޚިލާފަށް ދަތުރުކުރަން އުޅުނު އީރާނުގެ މުދާ އުފުލާ ބޯޓަކަށް ބަޑިޖަހައި، އެ ބޯޓު ހިފަހައްޓާފައިވާ ކަމަށް އެމެރިކާއިން ކުރިން ވަނީ ބުނެފައެވެ. ނަމަވެސް އީރާނުގެ އަސްކަރިއްޔާއިން ބުނެފައިވަނީ އެ ބޯޓަކީ ޗައިނާއިން ފުރައިގެން ދަތުރުކުރި ބޯޓެއް ކަމަށާއި، އެމެރިކާ ސިފައިން ހިންގި "ހަތިޔާރު އެޅި ކަނޑުފޭރުމުގެ" މި އަމަލަށް ބަދަލުހިފާނެ ކަމަށެވެ.

މީގެ އިތުރުން، ހަނގުރާމަ ހުއްޓާލުމަށާއި މަޝްވަރާތަކަށް ލިބިފައިވާ ފުރުސަތުގެ ބޭނުން ހިފައި، އެކަން އެގޮތުގައި ކުރިއަށް ގެންދިއުމަށް ވެސް ޗައިނާ ސަރުކާރުން ހޯމަ ދުވަހު ވަނީ ކަމާބެހޭ ފަރާތްތަކަށް އިލްތިމާސްކޮށްފައެވެ.

ތަރުޖަމާނު ގުއޯ ވިދާޅުވީ، ސުލްހައަށް މަގުފަހިވެފައިވާ މި ދަނޑިވަޅުގައި، ވީހާވެސް އަވަހަކަށް ހަނގުރާމަ ނިމުމަކަށް ގެނައުމަށްޓަކައި އެކަމަށް ބޭނުންވާ އެކަށީގެންވާ މާހައުލެއް ބިނާކުރަން ޖެހޭ ކަމަށެވެ.