ރައީސް މުއިއްޒުގެ އަތްޕުޅުގައި ނައިބު ރައީސް ބަދަލު ކުރުމުގެ ބާރު އޮތް ނަމަ މިހާރު 10 ނުވަތަ 12 ނައިބު ރައީސުން އައްޔަން ކުރާނެ: ނިޝާން
9 މެއި 2026 | ހޮނިހިރު 08:33ސަރުކާރުގެ ކުންފުނިތަކާއި މުއައްސަސާތަކުގެ އިސްވެރިންނަށް އެއްވެސް ބާރެއް ނެތް ކަމަށާއި، ކަންކަމުގެ ޒިންމާ ނެންގެވުމުގެ ބަދަލުގައި ރައީސުލްޖުމްހޫރިއްޔާ ކަންކަމުން ރެކިވަޑައިގަންނަވާ ކަމަށް ގާނޫނީ ވަކީލު ނިޝާން ވަނީ ވިދާޅުވެފައި. މީގެ އިތުރުން ސަރުކާރުގެ އިދާރާތަކުގެ މެދުގައި އެއްވެސް ކޯޑިނޭޝަނެއް ނެތް ކަމަށާއި، މި ސަރުކާރު މިހާރު ވަނީ ފެއިލްވެފައި ކަމަށް އޭނާ ފާހަގަކުރެއްވި. މި ހާލަތުގެ ސަބަބުން ކުރިއަށް އޮތް ތަނުގައި ގައުމަށް ހުރިހާ ގޮތަކުން ދަތިތަކާ ކުރިމަތިވާނެ ކަމަށް ވެސް ނިޝާން ވިދާޅުވި.
ރާއްޖެޓީވީގެ ފަލަސުރުހީ ޕްރޮގްރާމްގައި މަޝްހޫރު ގާނޫނީ ވަކީލު މުހައްމަދު ނިޝާން އިބްރާހިމް ވާހަކަ ދައްކަވަނީ. | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ އަތްޕުޅުގައި ނައިބު ރައީސް ބަދަލު ކުރުމުގެ ބާރު އޮތް ނަމަ މިހާރު 10 ނުވަތަ 12 ނައިބު ރައީސުން އައްޔަން ކުރާނެ ކަމަށް ގާނޫނީ ވަކީލު މުހައްމަދު ނިޝާން އިބްރާހިމް ވިދާޅުވެއްޖެ އެވެ.
މިސަރުކާރުގެ ނައިބް ރައީސް އަކީ އަލްއުސްތާޛު ޙުސައިން މުޙައްމަދު ލަޠީފް އެވެ.
ރާއްޖެޓީވީގައި ވާހަކަ ދައްކަވަމުން ނިޝާން ވިދާޅުވީ ރައީސް މުއިއްޒުގެ މިސަރުކާރުގައި މިހާތަނަށް އައިރު މިނިސްޓްރީތަކާއި، މުއައްސަސާތަކުގެ އިތުރުން ކުންފުނިތަކުގެ ވެރީންގެ ގޮތުގައި ދެތިން ހަތަރު ބޭފުޅުން އައްޔަން ކޮށްފައިވާ ކަމަށެވެ. އަދި ހަމައެކަނި ބަދަލު ނުކުރެވި ހުރި ބޭފުޅަކީ ނައިބު ރައީސްގެ މަގާމު ކަމަށާއި، އެބޭރު ވެސް ރައީސް މުއިއްޒުގެ އަތްޕުޅުގައި އޮތް ނަމަ މިހާރު 10 ނުވަތަ 12 ނައިބު ރައީސުން އައްޔަން ކުރާނެ ކަމަށް އޭނާ ވިދާޅުވި އެވެ.
ނިޝާން ވިދާޅުވީ މިނިސްޓްރީތަކާއި، ކުންފުނިތަކުގެ ވެރީންގެ އަތުގައި އެއްވެސް ބާރެއް ނެތް ކަމަށާއި، އެއީ ހަމައެކަނި ތިއްބަވާ ބައެއް ކަމަށެވެ. އަދި ގިނަ ފަހަރަށް ކުންފުނިތަކުން ކުރަމުންދާ މަސައްކަތްތަކުގެ ފުރިހަމަ މައުލޫމާތު ރައީސް އޮފީހަށް ވެސް ނޭނގޭ ކަމަށް އޭނާ ވިދާޅުވި އެވެ.
މީގެ އިތުރުން ނިޝާން ވިދާޅުވީ ގައުމުގައި ހިނގާ އެއްވެސް ގޯސް ކަމެއް ރައީސް މުއިއްޒަށް އެނގިވަޑައިނުގަންނަވާނެ ކަމަށާއި، އެކަމުގެ ޒިންމާ ވެސް ނަންގަވަން ޖެހޭނީ ސަރުކާރުގެ އެހެން ބޭފުޅުން ކަމަށެވެ. އަދި އެފަދަ ހުރިހާ ކަމަކުން އެމަނިކުފާނު ރެކިވަޑައިގަންނަވާނެ ކަމަށް ނިޝާން ވިދާޅުވި އެވެ.
ނަމަވެސް ހުރިހާ ރަނގަޅު ކަމެއްގެ ކްރެޑިޓް ރައީސް މުއިއްޒު އަބަދުވެސް ނަންގަވާ ކަމަށާއި، އެކަން ކުންފުނިތަކާއި، މިނިސްޓްރީތަކުން ވެސް ފެންނަމުންދާ ކަމަށް ނިޝާން ވިދާޅުވި އެވެ.
މި ވާ މުއްދަތުގެ ތެރޭގައި ދާނެ ހިސާބަކާ މެދު އަޅުގަނޑުމެން ފުންކޮށް އެބަޖެހޭ ވިސްނަން. މިހާރު މި ހާލަތުގައި ހުރީމަ. އެހެންވީމަ، ނޭނގޭނެ. މިހާރު މިސާލަކަށް، ދެންމެ ތި ވިދާޅުވީ އެއާޕޯޓްސް ކޮމްޕެނީ. އެއާޕޯޓްސް ކޮމްޕެނީ އެކަންޏެއް ނޫން. ކޮންމެ ތަނެއްގައި ވެސް ތި ސުވާލު ކުރިޔަސް ކޮންމެ ތަނެއްގައި ހުރި މީހަކުވެސް ދޭނީ އެ ޖަވާބު. އެއީ ކީއްވެގެން. އެގޮތަށް އޮންނާނެ ބައިވަރު އެ މީހުންނަށް ވާހެން ނުވައެއް ނޭނގޭނެ. ރައީސް އޮފީސް ތެރެއިންވެސް އެއާޕޯޓްސް ކޮމްޕެނީއަށް އަމުރުކުރަނީ. މިނިސްޓްރީން ވެސް އަމުރުކުރަނީ. މިނިސްޓްރީން ކުރާ ކަމެއް، ރައީސް އޮފީހަކަށް އެނގިވަޑައެއްނުގަންނަވާ. އެއަރޕޯޓުން ކުރާ ކަމެއް، މިނިސްޓްރީއަކަށް އެނގިވަޑައެއްނުގަންނަވާ. އެހެންވީމާ، އެއަރޕޯޓްސް ކޮމްޕެނީން އަމުރުކުރާނެ އެތައް ތަނެއް އޮވޭ. އެމް.ޑީ ހުންނަނީ ނަމެއްގައި. އެމް.ޑީއަކަށް ސުވާމީ ގޮތެއް ނޭނގޭ. ރައީސުލްޖުމްހޫރިއްޔާ އޮފީސް ތެރެއިން ކަނޑައަޅާފައި ހުންނަ މީހަކު ނޭނގި ވެސް ލަނީ. ރައީސުލްޖުމްހޫރިއްޔާ އިރުކޮޅަކު ބުނާނެ ޓީވީއަށް އަރާ ތިމަންނައަކަށް ނޭނގޭ މިކަން މިއިން ވާކަމެއް. އެކަމަކު އަނެއް މީހާ އަނެއް ދުވަހު ބުނާނެ ރައީސުލްޖުމްހޫރިއްޔާ ވިދާޅުވެގެންނޭ. އެހެންވީމަ 115 ދަށުން ރައީސުލްޖުމްހޫރިއްޔާ އައްޔަން ކުރާ މީހާ ވެސް ރައީސުލްޖުމްހޫރިއްޔާ ވިދާޅުވަނީ ތިމަންނަ އަށް އެނގިގެން ހިނގާ ކަމެއް ނޫނޭ. ކޮންމެ ކަމެއްގައި ވެސް ރައީސުލްޖުމްހޫރިއްޔާއަށް އެނގޭ ކަމެއް ނެތް.ގާނޫނީ ވަކީލު މުހައްމަދު ނިޝާން އިބްރާހިމް
ނިޝާން ވިދާޅުވީ މި ސަރުކާރު ވަނީ ފެއިލްވެފައިވާ ކަމަށާއި، ރައީސް މުއިއްޒު ފެއިލްވާ ހިސާބުން އެމަނިކުފާނުގެ ފަހަތްޕުޅުން މަސައްކަތް ކުރައްވާ ހުރިހާ ބޭފުޅުން ވެސް ދާނީ ފެއިލްވަމުން ކަމަށެވެ. މިސަރުކާރުގައި ކުރިއަށް އޮތް ދުވަސްތަކުގައި ގައުމަށް ހުރިހާ ގޮތަކުން ދަތިވާނެ ކަމަށް އޭނާ ވިދާޅުވި އެވެ.
