"އައިޝާ ޑޮކިއުމެންޓްރީ" ގެ ވާހަކަ ސީދާކޮށް ވެސް ނުސީދާކޮށް ވެސް ދެއްކުން މަނާކޮށް "މުޅި ރާއްޖެ" އަށް އަމުރެއް ނެރެފި
10 މެއި 2026 | އާދީއްތަ 15:27ޝަރީއަތުގައި ހިނގަމުންދާ މައްސަލައަކާ ގުޅިގެން "އައިޝާ" ޑޮކިއުމެންޓްރީގެ އެއްވެސް ވާހަކައެއް ސީދާކޮށް ނުވަތަ ނުސީދާކޮށް ދެއްކުން މަނާކޮށް ކްރިމިނަލް ކޯޓުން "މުޅި ރާއްޖެ" އަށް އަމުރެއް ނެރެފި. މި އަމުރު ނެރުނީ މައްސަލައިގެ ހަސްމުންގެ އަބުރާއި އިއްޒަތް ރައްކާތެރިކުރުމަށާއި، ޖިންސީ ކުށުގެ މައްސަލަތަކުގެ ސިއްރު ހިފެހެއްޓުމަށް ގާނޫނުއަސާސީން ލިބިދޭ ބާރުގެ ދަށުން ކަމަށް ކޯޓުން ބުނޭ. އެހެންކަމުން މި ޑޮކިއުމެންޓްރީއާ ގުޅޭ އެއްވެސް މައުލޫމާތެއް ފެތުރުމަކީ ކޯޓުގެ ހުރުމަތް ކެނޑުން ކަމުގައި ބެލެވޭނެ ކަމަށްވެސް ކޯޓުން ވަނީ ކަނޑައަޅާފައި.
ކްރިމިނަލް ކޯޓު | ރާއްޖެއެމްވީ
އަދަދު ނޫހުން ގެނެސްދިން އައިޝާ ޑޮކިއުމެންޓްރީގެ ވާހަކަ ސީދާކޮށް ވެސް ނުސީދާކޮށް ވެސް ދެއްކުން މަނާކޮށް "މުޅި ރާއްޖެ" އަށް ކްރިމިނަލް ކޯޓުން އަމުރެއް ނެރެފި އެވެ.
ޝަރީއަތުގައި ހިނގަމުންދާ މައްސަަލައެއްގައި ވަކި ގޮތަކަށް އަމަލު ނުކުރުމަށް އަންގާ ކްރިމިނަލް ކޯޓުން ނެރުު އަމުރުގައި ބުނެފައިވަނީ ދައުވާ ފޯމާއެކު، ޕްރޮސިކިއުޓަރ ޖެނެރަލްގެ އޮފީހުން ހުށަހަޅާފައިވާ ސިޓީގައި، ސަބަބު ބަޔާންކޮށް، މި މައްސަލާގެ ޝަރީޢަތް ހިނގަމުންދާއިރު ވަކި ގޮތަކަށް އަމަލުކުރުން ހުއްޓުވުމުގެ އަމުރަކަށް އެދި ހުށަހަޅާފައިވެ އެވެ. މިކަމުގެ ޤާނޫނީ ހުއްޖަތެއްގެ ގޮތުގައި މީގެ ކުރިން ދިވެހިރާއްޖޭގެ ސުޕްރީމް ކޯޓުގައި ހިނގަމުންދިޔަ ދެ ގަޒިއްޔާއެއްގައި ވެސް މިފަދަ އަމުރު ނެރެފައިވާތީ، އެ އަމުރުތަކަށް ރިއާޔަތްކޮށް ދިނުމަށް އެދިފައިވާ ކަމަށް އަމުރުގައި ބުނެފައިވެ އެވެ.
އެގޮތުން ގަޛްފުގެ ކުށަކީ އިސްލާމީ ޝަރީޢާގައި ބޮޑެތި ފާފަތަކުގެ ތެރެއިން ފާފައަކަށްވާއިރު، މިކަން ހަރުކަށި އިބާރާތުން ނަހީ ކުރައްވާ ހަރުކަށި އަދަބު ކަނޑައަޅާފައިވެއެވެ. މިކަން މިހައި ބޮޑަށް އިސްލާމްދީނުގައި ނަހީ ކުރައްވާފައި ވަނީ، އަބުރު ރައްކާތެރިކުރުމަށާއި ޢިއްޒަތުއް ނަފްސު ރައްކާތެރިކުރުމުގެ ގޮތުން ކަމަށް އަމުރުގައ ބުނެފައިވެ އެވެ.
އަދި މީހެއްގެ މައްޗަށް ޖިނާއީ ތުހުމަތެއް ކުރެވި ދައުވާ އުފުލިގެންވާ ހާލަތުގައިވެސް ޤާނޫނު އަސާސީ އިން ދަޢުވާ ލިބޭ މީހާ އަށް އަދި ކުށުގެ ޝިކާރައަށްވީ މީހާއަށް ކަށަވަރުކޮށްދޭ ހައްޤުތަކެއްވެ އެވެ. މިގޮތުން، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 33 ވަނަ މާއްދާގައި ނަމާ އަބުރު ރައްކާތެރިކުރެވިފައި އޮތުމަކީ ކޮންމެ މީހަކަށްމެ ކަށަވަރުކޮށްދީފައިވާ ހައްޤެއް ކަމަށެވެ. އަދި ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 51 ވަނަ މާއްދާގެ (އ) އަށް ބެލުމުން، އެކަށީގެންވާ ޝައްކެއް ނެތް މިންވަރަށް މީހެއްގެ މައްޗަށް ކުށް ސާބިތުވާކަމަށް ޝަރުއީ ކޯޓަކުން ހުކުމްކޮށްގެން މެނުވީ މީހަކު ކުށެއް ކުރީކަމަށް ޤާނޫނީ ގޮތުން ބެލޭނެ ހަމައެއް ނެތްކަން އެނގެ އެވެ.
އަމުރުގައި ބުނެފައިވަނީ ޝަރީޢަތުގެ މަރުހަލާގައި މައްސަލަ އޮންނަ ހާލަތުގައިވެސް، ދެ ހައްޤު ބެލެންސް ވެގެންދާނެ ފަދައަކުން ދަޢުވާ ލިބޭ ފަރާތާއި ކުށުގެ ޝިކާރައަށްވީ ފަރާތުގެ ހައްޤުތައް ހަމަހަމަކުރެވެންޖެހޭ ކަމަށެވެ. އަދި އެފަދައިން އަމަލު ނުކުރެވޭނަމަ އިޔާދަނުކުރެވޭނެފަދަ ގެއްލުންތަކެއް ކުރިމަތިވުމުގެ ފުރުސަތު އޮވެދާނެއެވެ. އަދި މައްސަލައިގެ މައުޟޫއަށް ކޯޓުން ވަކި ގޮތެއް ނިންމުމުގެ ކުރިން، ޤާނޫނު އަސާސީގައި ބަޔާންވެގެންވާ ޙައްޤުތަކަށް އެއްވެސް އަސަރެއް ނުކުރާނޭ މޭރުމަކުން، ޤާނޫނު އަސާސީގެ އެންމެހައި ހަމަތަކާއި ޤާނޫނާއި އެންމެހައި ފަރުދުންގެ ޙައްޤުތަކާއި މިނިވަންކަން ނެގެހެއްޓުމުގެ ޒިންމާ ކޯޓުތަކަށް މަތިކޮށްފައިވާ ކަމަށެވެ.
އަދި ޖިނާއީ މައްސަލަތަކުގެ ޝަރީޢަތުގެ އަޑުއެހުންތަކަކީ އާންމު ގޮތެއްގައި ހުޅުވާލެވިގެން ބާއްވާ ޝަރީޢަތުގެ އަޑުއެހުންތަކެއް ކަމުގައިވީނަމަވެސް، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 42 ވަނަ މާއްދާގެ (ނ) ގައި މިކަމަށް އިސްތިސްނާތަކެއް ބަޔާންކޮށްފައިވާ ކަމަށް އަމުރުގައި ބުނެފައިވެ އެވެ. މިގޮތުން، ޖިންސީ މައްސަލަތަކާއި އެބާވަތުގެ އަޚްލާޤީ ގޮތުން ބަދު މައްސަލަތަކުގެ އަޑުއެހުންތައް އާންމުކޮށް ކުރިއަށް ގެންދެވެނީ ޝަރީޢަތްތައް ހުޅުވާނުލާ ކަމަށް އަމުރުގައިވެ އެވެ. އެއީ މުޖްތަމަޢުގެ އަޚްލާޤީ އުސޫލުތައް ހިފެހެއްޓުމުގެ ގޮތުން ކަމަށް ބުނެފައިވެ އެވެ. އަދި މި އުސޫލުގެ މަޤްސަދަކީ ވެސް ދަޢުވާ ލިބޭ ފަރާތުގެ ޙައްޤާއި ކުށުގެ ޝިކާރައަށްވީ ފަރާތުގެ މަސްލަހަތު ހިމާޔަތްކުރުން ކަމަށް އަމުރުގައި ބުނެފައިވެ އެވެ.
އަދި މި ސަބަބުތައް މިހެން ހުރުމުން މި މައްސަލައިގައ ކޯޓުން ވަކިގޮތެއް ކަނޑައަޅަންދެން ދަޢުވާ ކުރެވިފައިވާ ހާދިސާއާ (އައިޝާ ޑޮކިއުމެންޓްރީ) ގުޅުންހުރި ވީޑިއޯ ޑޮކިއުމަންޓަރީ މުޖުތަމަޢުގެ ތެރޭގައި ދައުރު ނުކުރުމަށާއި، މި ޑޮކިއުމަންޓަރީގައި ގެނަސްދީފައިވާ އެއްވެސް ވާހަކައެއް ސީދާ ގޮތުންނާއި ނުސީދާ ގޮތުންވިޔަސް ނުދެއްކުމަށާއި، ޝަރީޢަތަށް ހުށަހެޅިފައި މިވާ ޑޮކިއުމަންޓަރީ އާ ގުޅުވައި މައްސަލައިގެ ޙަސްމަކާއި ނުވަތަ ކުށުގެ ޝިކާރައަށްވީ މީހާ ގެ އެއްވެސް ވާހަކައެއް ނުދެއްކުމަށް އަމުރުކޮށްފައިވެ އެވެ.
އަދި މިބާވަތުގެ މައްސަލަތަކަކީ ޤާނޫނު އަސާސީގެ 42 ވަނަ މާއްދާގެ (ނ) ގެ (1) ވަނަ ނަންބަރުގައި ބަޔާންކުރާ މުޖްތަމަޢުގެ އަޚްލާޤީ އުސޫލުތައް ހިފެހެއްޓުމުގެ ގޮތުން، އާންމުކޮށް ހުޅުވާނުލައި ސިއްރު ކޮށްގެން ކުރިއަށް ގެންދެވޭނެ ޝަރީޢަތްތަކެއް ކަމުގައިވާއިރު، މައްސަލާގައި ހުށަހަޅާފައިވާ ލިޔުންތަކާއި ޝަރީޢަތާއި ގުޅުންހުރި މަޢުލޫމާތުތައް ނުފެތުރުމަށް އަމުރުކޮށް. މިފަދަ ކޮންމެ ކަމަކީ ކޯޓުގެ ޙުރުމަތް ކެނޑުންކަމުގައި ބެލިދޭނެ އަމަލެއްކަމުގައި އަންގާ ކަމަށް އަމުރުގައި ބުނެފައިވެ އެވެ.
