އަނިޔާގެ ސަބަބުން ރަފީނިއާ އަށް ގިނަ މެޗު ތަކެއް ގެއްލޭނެ

ބާސެލޯނާ އަށް ކުޅެމުން އަންނަ ބްރެޒިލްގެ ފޯވާޑް ރަފީނިއާ އަށް އަނިޔާވެފައިވާއިރު، އޭނާ އަށް ގިނަ މެޗު ތަކެއް ގެއްލޭނެ ކަމަށް ބެލެވިއްޖެ އެވެ. 

ރަފީނިއާ އަށް އަނިޔާވެފައި ވަނީ އެންމެ ފަހުން ބައިނަލްއަޤުވާމީ ރަޙުމަތްތެރި ކަމުގައި ބްރެޒިލް އިން ފްރާންސްއާ ދެކޮޅަށް ކުޅުނު މެޗުގަ އެވެ. އެ މެޗުގައި ބްރެޒިލް ބަލިވިއިރު، ރަފީނިއާގެ ފަލަމަސްގަނޑަށް ވަނީ އަނިޔާވެފަ އެވެ. އަނިޔާގެ ސަބަބުން މެޗުގެ ވަކި ހިސާބަކުން ވަނީ ރަފީނިއާ ބަދަލު ކޮށްފަ އެވެ. 

އެ މެޗަށް ފަހު ކުރިއަށް ގެންދިޔަ ރަފީނިއާގެ މެޑިކަލް ޓެސްޓު ތަކުން އެނގުނު ގޮތުގައި ގާތް ގަނޑަކަށް ފަސް ހަފުތާގެ މުއްދަތަކަށް އޭނާ ކުޅުމާ ދުރުގައި ހުންނަން ޖެހޭނެ އެވެ. އެކަމުގެ ސަބަބުން ކުރިއަށް އޮތް މަސް ދުވަހުގެ ތެރޭގައި ރަފީނިއާ އަށް ބާސެލޯނާގެ މުހިންމު މެޗު ތަކެއް ގެއްލޭނެ ކަމަށް ވަނީ ބެލެވިފަ އެވެ.

އަނިޔާގެ ސަބަބުން ރަފީނިއާ އަށް ހަތް މެޗެއް ގެއްލޭނެ ކަމަށް އަންދާޒާ ކޮށްފައިވެ އެވެ. އޭގެ ތެރޭގައި ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅޭ މެޗާއި، އެސްޕަންޔޯލްއާ ދެކޮޅަށް ކުޅޭ މެޗާއި، ސެލްޓަ ވީގޯއާ ދެކޮޅަށް ކުޅޭ މެޗު އަދި ގެޓާފޭއާ ދެކޮޅަށް ކުޅޭ މެޗު ހިމެނެ އެވެ. މީގެ އިތުރުން ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި އެތުލެޓިކޯއާ ދެކޮޅަށް ކުޅޭ ދެ ލެގުގެ މެޗު ވެސް ނުކުޅެވޭނެ ކަމަށް ބެލެވިފައިވާއިރު، ސެމީ ފައިނަލް އަށް ބާސެލޯނާ ގޮސްފި ނަމަ ފުރަތަމަ ލެގުގެ މެޗު ވެސް ނުކުޅެވޭނެ ކަމަށް ބެލެވިފައިވެ އެވެ.

ރަފީނިއާ އަށް އަނިޔާވެ ކުޅުމާ ދުރުގައި ހުންނަން ޖެހުމަކީ ބާސެލޯނާ އަށް ބޮޑު ގޮންޖެހުމަކަށް ވާނެ އެވެ. ސްޕެނިޝް ލީގުގެ އެއް ވަނައިގައި ބާސެލޯނާ އޮތްއިރު، އެ ޓީމުގައި އެންމެ ރަނގަޅު ކުޅުމެއް ދައްކަމުން އަންނަ އެއް ކުޅުންތެރިޔަކީ ރަފީނިއާ އެވެ. މި ސީޒަންގައި ބާސެލޯނާ އަށް ކުޅެދިން 31 މެޗުގައި ރަފީނިއާ ވަނީ 19 ލަނޑު ޖަަހައިފަ އެވެ.