މެސީގެ އިންޑިއާ ދަތުރު، ދަނޑުގައި ހިނގި ހަމަ ނުޖެހުން ތަކަށް ޗީފް މިނިސްޓަރު މަމަތާ ބެނާޖީ މައާފަށް އެދިވަޑައިގެންފި

އިންޓަރ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އިންޑިއާ އަށް ކުރަމުން އަންނަ ދަތުރުގައި، ކޮލްކަތާގައި ހުންނަ ސޯލްޓް ލޭކް ސްޓޭޑިއަމް އަށް ޒިޔާރަތް ކުރިއިރު، އެ ދަނޑުގައި ހިނގި ކަންތައް ތަކަށް ވެސްޓް ބެންގާލްގެ ޗީފް މިނިސްޓަރު މަމަތާ ބެނާޖީ މައާފަށް އެދިވަޑައިގެންފި އެވެ.

އިންޑިއާ އަށް ކުރާ ޓުވާ ދަތުރުގައި މެސީ ކޮލްކަތާ އަށް އައިސްފައި ވަނީ ހުކުރު ދުވަހުގެ ރޭ ދަންވަރުގެ ވަގުތެއްގަ އެވެ. އެއަށްފަހު ހޮނިހިރު ދުވަހު ވަނީ ދަތުރުގެ ޙަރަކާތްތައް ކުރިއަށް ގެންގޮސްފަ އެވެ. ތިން ދުވަހުގެ ދަތުރުގައި ހޮނިހިރު ދުވަހު މެސީ ވަނީ ކޮލްކަތާގެ ސޯލްޓް ލޭކް ސްޓޭޑިއަމް އަށް ޒިޔާރާތް ކޮށްފަ އެވެ.

ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާގެ ގޮތުގައި ގިނަ ބަޔަކު ޤަބޫލު ކުރާ މެސީ، ސޯލްޓް ލޭކް ސްޓޭޑިއަމް އަށް އައި ވަގުތު އެ ދަނޑުގައި 80،000 އަށް ވުރެ ގިނަ ސަޕޯޓަރުން ތިއްބެވެ. އިންޑިއާގައި މެސީ އަށް ބޮޑު ތާއީދެއް އޮންނައިރު، މެސީ ވަނީ ދަނޑަށް އައިސް ސަޕޯޓަރުންނަށް ފެނިލައިފަ އެވެ.

ނަމަވެސް، މެސީ ދަނޑަށް އައިސް ވަރަށް އަވަހަށް ވަނީ ދަނޑުން ގޮސްފަ އެވެ. މީޑިއާ ތަކުގައި ބުނެފައިވާ ގޮތުން މެސީ ދަނޑު ދޫކޮށް އަވަހަށް ގޮސްފައި ވަނީ ސަލާމަތީ ގޮތުން އެކަށީގެންވާ ވަރުގެ ފިޔަވަޅު ތަކެއް އެޅިފައި ނެތުމުގެ ސަބަބުންނެވެ. އެހާ އަވަހަށް މެސީ ދަނޑު ދޫކޮށް ދިޔުމުން، ދަނޑުގައި ތިބި ސަޕޯޓަރުން ވަނި ރުޅި ގަދަވެފަ އެވެ. އަދި އެ މީހުން ވަނީ ދަނޑަށް އަރައި ގަނެ، ހަމަ ނުޖެހުން ހިންގައި، ދަނޑުގައި ހުރި ސާމާނު ތަކަށް ވެސް ގެއްލުން ދީފަ އެވެ. 

އެކަމާ ގުޅިގެން ޗީފް މިނިސްޓަރު މަމަތާ ބެނާޖީ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މެސީ އިންޑިއާ އަށް އައިސް އުޅުމުގެ ތެރޭގައި ހިނގި ހިމާތަވެރި ހާދިސާއާ ގުޅިގެން މެސީގެ ކިބައިން މައާފަށް އެދިވަޑައިގަންނަވާ ކަމަށެވެ. އަދި ފުޓުބޯޅަ އާއި ކުޅިވަރަށް ލޯބި ކުރާ އެންމެހާ ފަރާތްތައް އަދި މެސީގެ ސަޕޯޓަރުންގެ ކިބައިން ވެސް މައާފަށް އެދޭ ކަމަށް ޗީފް މިނިސްޓަރު ވަނީ ވިދާޅުވެފަ އެވެ. 

އެ ހާދިސާއާ ގުޅިގެން އިތުރު ތަހުގީގު ކުރިއަށް ގެންދިޔުމަަށް ޚާއްސަ ކޮމެޓީއެއް އެކުލަވާލައްވާފައިވަ ކަމަށާއި، އެ ކޮމެޓީގެ ރައީސް އަކަށް ހަމަޖައްސަވާފައި ވަނީ ރިޓަޔާ ކުރައްވާފައިވާ ފަނޑިޔާރު އާޝިމް ކުމާރު ރޭ ކަމަށް ވެސް ޗީފް މިނިސްޓަރު މަމަތާ ބެނާޖީ ވިދާޅުވި އެވެ. މީގެ އިތުރުން އެ ކޮމެޓީގެ މެމްބަރުންގެ ގޮތުގައި ޗީފް ސެކްރެޓަރީ އާއި، ހޯމް ލޭންޑް ހިލް އެފެއާޒް ޑިޕާޓްމަންޓުގެ އިތުރު ޗީފް ސެކްރެޓަރީއެއް ވެސް ހިމެނޭ ކަމަށް ހާމަ ކުރައްވާފައިވެ އެވެ. 

ޗީފް މިނިސްޓަރު މަމަތާ ބެނާޖީ ވިދާޅުވީ އެ ކޮމެޓީ އިން ހާދިސާގެ ފުރިހަމަ ތަހުގީގީ ރިޕޯޓެއް އެކުލަވާލާނެ ކަމަށާއި، އެއަށް ފަހު އެކަމުގެ ޒިންމާ ނަގަން ޖެހޭ ފަރާތްތައް ކަނޑައަޅާނެ ކަމަށެވެ. އަދި ކުރިއަށް އޮތް ތަނުގައި އެ ފަދަ ކަމެއް ތަކުރާރު ނުވާނެހެން ކަންކަން ކުރެއްވުމާއި، އިންތިޒާމުތައް ހަމަޖެއްސެވުމަށް ވެސް ހުށަހަޅުއްވާނެ ކަމަށް އޭނާ ވިދާޅުވި އެވެ. 

އިންޑިއާގެ މީޑިއާ ތަކުގައި ބުނެފައިވާ ގޮތުގައި ސޯލްޓް ލޭކް ސްޓޭޑިއަމްގައި ހިނގި ހާދިސާގައި ސަލާމަތީ ކަންކަން ބަލަހައްޓަން ތިބި ސެކިއުރިޓީ ފޯސްތަކާ ދެމެދު ހިނގި ހަމަނުޖެހުން ތަކުގެ ސަބަބުން ވަރަށް ގިނަ ބަޔަކަށް ވަނީ އަނިޔާ ވެސް ވެފަ އެވެ. އަދި އެ ވަގުތު ދަނޑުގެ އިންތިޒާމުތައް ހަމަޖެއްސުމަށް ހުރި ބައެއް ސާމާނު ތަކަށް ވެސް ގެއްލުން ލިބިފައިވާ ކަމަށް ވަނީ ރިޕޯޓު ކޮށްފަ އެވެ. 

މެސީ ފަދަ ދުނިޔޭގެ މަޝްހޫރު ކުޅުންތެރިޔަކު ބައިވެރިވާ ޙަރަކާތެއް ރާވައި ހިންގުމުގައި ފެނިފައި ވަނީ ވަރަށް ދަށް ފެންވަރުގެ އިންތިޒާމު ތަކެއް ކަމަށް ބުނެ، ގިނަ ބައެއްގެ ފާޑު ކިޔުން ވަނީ އަމާޒުވެފަ އެވެ. ޚާއްސަކޮށް އެތައް ހާސް ބަޔަކު އެއްވެ ތިބިއިރު، މެސީ އަށް ފުރިހަމަ ސަލާމަތާއި ރައްކާތެރިކަން ޔަގީން ކުރެވެން ޖެހޭ ކަމަށް ބުނެ ގިނަ ބައެއްގެ ނުރުހުން ވެސް އަމާޒުވެފައިވެ އެވެ. 

ތިން ދުވަހަށް އިންޑިއާ އަށް ކުރާ ދަތުރުގައި މެސީ، އިންޑިއާގެ ޗީފް މިނިސްޓަރުންނާއި، އެގްޒެކްޓިވް އިސްވެރިން އަދި ބޮލީވުޑްގެ ތަރިންނާ ވެސް ބައްދަލު ކުރާނެ އެވެ. މީގެ އިތުރުން، ހޯމަ ދުވަހުގެ ވަގުތެއްގައި އިންޑިއާގެ ބޮޑު ވަޒީރު ނަރެންދްރަ މޯދީއާ ވެސް މެސީ ބައްދަލު ކުރާނެ ކަމަށް ބުނެފައިވެ އެވެ. 

މިއީ މެސީ އިންޑިއާ އަށް އައި ދެ ވަނަ ފަހަރެވެ. މީގެ ކުރިން 2011 ވަނަ އަހަރު ވެސް މެސީ ވަނީ އިންޑިއާ އަށް ގޮސްފަ އެވެ. އެއީ ބައިނަލްއަޤުވާމީ ރަޙުމަތްތެރި ކަމުގައި ވެެނެޒުއެލާއާ ދެކޮޅަށް ކުޅުމަށެވެ. އެފަހަރު ވެސް މެޗު ކުޅެފައި ވަނީ ކޮލްކަތާގެ ސޯލްޓް ލޭކް ސްޓޭޑިއަމްގަ އެވެ. އެ މެޗުގައި އާޖެންޓީނާ އިން ވަނީ 1-0 އިން ވެނެޒުއެލާގެ މައްޗަށް ކުރި ހޯދައިފަ އެވެ.