އެމެރިކާ އަށް ޖަވާބު ދޭން ވަގުތު ނަގާނެ، އެމީހުންގެ ސުން ގަޑި އަކީ އަހަރަމެންނަށް މުހިންމު އެއްޗެއް ނޫން: އީރާން

އެމެރިކާގެ ހުށަހެޅުން ތަކަށް ޖަވާބު ދިނުމުގައި ލަސްވަނީ އެ ލިޔުމުގައި ހިމެނޭ ޓެކްނިކަލް ކަންކަން ދިރާސާކޮށް ބެލުމަށް، ވަރަށް ގިނަ ފަރާތް ތަކަކުން ބައިވެރިވާން ޖެހޭތީ ކަމަށް އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވެއްޖެ އެވެ. 

އެމެރިކާ އިން އުންމީދު ކޮށްގެން ތިބީ، ހުކުރު ދުވަހުގެ ވަގުތެއްގައި އީރާން އިން ޖަވާބު ހުށަހަޅާނެ ކަމަށެވެ. ނަމަވެސް އީރާން އިން މިހާތަނަށް އެއްވެސް ޖަވާބެއް ހުށަހަޅާފައި ނުވެ އެވެ. އެކަމާ ގުޅޭ ގޮތުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ބަޔާނެއް ނެރުއްވާފައި ވަނިކޮށް، ބަޣާއީ ވިދާޅުވީ އެމެރިކާގެ ހުށަހެޅުން މިހާރު ވެސް ދިރާސާ ކުރަމުން އަންނަ ކަމަށާއި، އެކަމަށް ރައްދު ދޭނީ އެކަމަަށް އެންމެ އެކަށީގެންވާ ވަގުތުގައި ކަމަށެވެ. 

އެމެރިކާގެ ސިޔާސީ ލީޑަރުން ކަނޑައަޅާ ސުން ގަޑި ތަކަކީ އީރާން އަށް އެއްވެސް މުހިންމު ކަމެއް ނޫން ކަމަށާއި، އެފަދަ ސުންގަޑި ތަކަކީ އެންމެ ފަހުގެ ވަގުތު ކަމަށް ބަަލައިގެން އީރާން އިން މަސައްކަތް ނުކުރާ ކަމަށް ވެސް ބަޣާއީ ވިދާޅުވި އެވެ. އެއާ އެކު އޭނާ ވިދާޅުވީ، އީރާން އިން ކުރާ މަސައްކަތް ކުރާނީ އެ ޤައުމުގެ އަމިއްލަ ގޮތުގައި ކަމަަށެވެ. 

އެމެރިކާގެ ހުށަހެޅުމަށް އީރާން އިން ޖަވާބި ދިނުމުގައި، ވަރަށް ގިނަ އިދާރާ ތަކާއި، ވަރަށް ގިނަ ފަރުދުން ބައިވެރިވާން ޖެހޭ ކަމަށް ވަނީ ފާހަގަ ކޮށްފަ އެވެ. މި މަޝްވަރާ ތަކުގެ ޓީމު ލީޑު ކުރައްވަނީ އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް އެވެ. އަދި އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް އަކީ ވެސް މި މައްސަލައިގެ ވަރަށް މުހިންމު ބައިވެރި އެކެވެ. މީގެ އިތުރުން ހަނގުރާމަ ހިމެނޭހެން އީރާންގެ ސަލާމަތީ ކަންކަން ބަލަހައްޓާ ނެޝަނަލް ސުޕްރީމް ސެކިއުރިޓީ ކައުންސިލް ވެސް މި މަސައްކަތުގައި ބައިވެރިވެ އެވެ.

އެންމެ ފަހުގެ މަރުޙަލާއެއްގެ ގޮތުގައި، އެމެރިކާ އަށް ފޮނުވާ ޖަވާބަށް އީރާންގެ ރޫހީ ލީޑަރު ހުއްދަ ދޭން ޖެހޭނެ އެވެ. އެހެންކަމުން މި ހުރިހާ މަރުޙަލާއެއް ފުރިހަމަ ކުރުމަށް ވަގުތު ނަގާނެ އެވެ.