އެމެރިކާ އާއި އީރާންއާ ދެމެދު ސުލްޙައިގެ އަލި މަގެއް ފެންނާތީ، ޕާކިސްތާންގެ މަރުޙަބާ

އެމެރިކާ އާއި އީރާންއާ ދެމެދު ހިނގަމުން އިންނަ ހަނގުރާމަ ނިންމުމަށް ހަމަޖެހުމެއް  ލިބިދާނެ ކަމުގެ އިޝާރާތްތައް ފެންނަމުންދާތީ، ޕާކިސްތާން އިން އެކަމަށް މަރުޙަބާ ކިޔައިފި އެވެ. 

ޕާކިސްތާންގެ ފޮރިން މިނިސްޓްރީ އން ބުނެފައި ވަނީ، އެމެރިކާާ އާއި އީރާންއާ ދެމެދު ސުލްޙަ ޤާއިމު ކުރުމުގެ އަލި މަގެއް ފެންނަމުން އަންނަ ކަމަށެވެ. ނަމަވެސް، އެކަމާ ގުޅޭ އިތުރު މައުލޫމާތެއް އީރާންގެ ފޮރިން މިނިސްޓްރީ އިން ހާމަ ކޮށްފައި ނުވެ އެވެ. 

މި މައްސަލައިގައި މެދުވެރިއެއްގެ ދައުރު އަދާ ކުރާ ފަރާތެއްގެ ހައިސިއްޔަތުން ދެ ޤައުމުގެ އިތުބާރު ގެއްލިދާނެ ކަންކަން ނުކުރާނެ ކަމަށް، ޕާކިސްތާންގެ ފޮރިން މިނިސްޓްރީ އިން ވަނީ ބުނެފަ އެވެ. އެ މިނިސްޓްރީގެ ބަޔާނުގައި ބުނެފައި ވަނީ، މެދުވެރިންގެ ހައިސިއްޔަތުން މައުލޫމާތު ހާމަ ކޮށްގެން ދެ ފަރާތުގެ އިތުބާރު ގެއްލުވައި ނުލާނެ ކަމަށެވެ. 

ސުލްޙައިގެ މަޝްވަރާ ތަކުގެ ދެ ވަނަ ބުރު ބޭއްވުން ދެން އޮންނާނީ ކޮން ޤައުމެއްގައި ކަމުގެ މައުލޫމާތު ލިބިފައި ނުވާ ކަމަށް ވެސް ޕާކިސްތާން އިން ވަނީ ބުނެފަ އެވެ. ނަމަވެސް، އެ ބައްދަލުވުން އަނެއްކާ ވެސް ޕާކިސްތާންގެ ވެރި ރަށް އިސްލާމްއާބާދުގައި ބޭއްވޭ ނަމަ، އެއީ ވަރަށް ބޮޑު ޝަރަފެއް ކަމަށް ޕާކިސްތާންގެ ފޮރިން މިނިސްޓްރީގެ ބަޔާނުގައި ވަނީ ބުނެފަ އެވެ. 

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ އަކީ، ދެ ޤައުމުގެ ދެ މެދުގައި ދިގު މުއްދަތެއް ވަންދެން އޮތް މައްސަލަ އެކެވެ. މި ދެ ޤައުމުގެ ދެ މެދުގައި ސުލްޙަ ޤާއިމު ކުރުމަށް މެދުވެރިއެއްގެ ދައުރު އަދާ ކުރުމަށް ޕާކިސްތާން އިން އަދި ވެސް އޮތީ ތައްޔާރަށް ކަމަށް، އެ ބަޔާނުން ހާމަވެ އެވެ.