ހަމަލާ ތަކެއް ބަދަލު ކުރި ނަމަވެސް، ޓްރަމްޕް ވިދާޅުވީ މަޝްވަރާތައް ކުރިއަަށްދާ ކަމަށް

އެމެރިކާ އާއީ އީރާންއާ ދެމެދު ހަމަލާ ތަކެއް ބަދަލު ކޮށްފައި ވީ ނަމަވެސް، ސުލްޙައިގެ އެއްބަސްވުމެއް ޤާއިމު ކުރުމުގެ މަޝްވަރާތައް ކުރިއަަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ ހޮރްމޫޒް ކަނޑު އޮޅީގައި އެމެރިކާ އާއި އީރާން އިން ހަމަލާ ތަކެއް ބަދަލު ކޮށްފައި ވަނިކޮށެވެ. މި ހަމަލާތަކާ ގުޅިގެން ސަރަހައްދީ މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ. 

ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެމެރިކާ އިން އަންނަނީ އީރާންއާ ވާހަކަ ދައްކަމުން ކަމަށާއި، އެ ޤައުމާ އެކު މަޝްވަރާތައް ކުރިއަށް ދާ ކަމަށެވެ. މިއީ ދެ ޤައުމުގެ ދެ މެދުގައި އުފެދިފައިވާ ނުތަނަވަސްކަން ކުޑަ ކުރުމަށް، ނުވަތަ ޙައްލު ކުރުމަށް ކުރަމުން އަންނަ މަޝްވަރާ ތަކެއް ކަމަށް މާހިރުން ވަނީ ފާހަގަ ކޮށްފަ އެވެ.

އެމެރިކާ އާއި އީރާންއާ ދެމެދު މިހާރު އޮތީ ހަނގުރާމަ މެދު ކަނޑާލުމުގެ އެއްްބަސްވުމެއް ޤާއިމު ކޮށްފަ އެވެ. އަދި ދެ ޤައުމުގެ ދެ މެދުގައި ދާއިމީ ސުލްޙައިގެ އެއްބަސްވުމެއް އެކުލަވާލުމަށް، ޕާކިސްތާން މެދުވެރި ވެގެން މަސައްކަތް ކުރަމުން އަންނައިރު، އެކަމުގައި ކާމިޔާބު ހޯދިފައި ނުވެ އެވެ.