އީރާންގެ ސިފައިންގެ ތަންތަނަށް ހަމަލާ ދީފައިވާ ކަމަށް އެމެރިކާ އިން ބުނެފި

އެމެރިކާގެ ސިފައިންނަށް އަމާޒުކޮށް ހަމަލާ ދިނުމުގައި ޒިންމާވަން ޖެހޭ އީރާންގެ ތަންތަނަށް ހަމަލާ ދީފައިވާ ކަމަށް އެމެރިކާގެ އަސްކަރިއްޔާ އިން ބުނެފި އެވެ.

ބުރާސްފަތި ދުވަހު އެމެރިކާގެ އަސްކަރިއްޔާ އިން ބުނެފައި ވަނީ، އީރާން އިން އެމެރިކާގެ ސިފައިންނަށް އަމާޒުކޮށް ދީފައިވާ ހަމަލާ ތަކަކީ އެއްވެސް ސަބަަބެއް ނެތި ދިން ހަމަލާ ތަކެއް ކަމަށެވެ. 

މީގެ ކުރިން އީރާންގެ އަސްކަރީ ކޮމާންޑުން ބުނީ، އެމެރިކާ އިން ހޮރްމޫޒް ކަނޑު އޮޅީގައި ދަތުރު ކުރަމުން ދިޔަ އީރާންގެ ބައެއް އުޅަނދު ތަކާއި، އީރާންގެ ބައެއް ރައްޔިތުންނަށް އަމާޒުކޮށް ހަމަލާ ދީފައިވާ ކަމަށެވެ،. އަދި އެއީ އެމެރިކާ އިން ހަނގުރާމަ މެދު ކަނޑާލުމުގެ އެއްބަސްވުމާ ޚިލާފަށް ކޮށްފައިވާ ކަމެއް ކަމަށް އީރާން އިން ތުހުމަތު ކޮށްފައިވެ އެވެ. 

އެމެރިކާގެ އަސްކަރިއްޔާގެ ބަޔާނުގައި ބުނެފައި ވަނީ، އެމެރިކާގެ ސިފައިންނަށް އަމާޒުކޮށް ހަމަލާ ދީފައިވާ އީރާންގެ ތަންތަނަށް ހަމަލާ އަމާޒު ކުރި ކަމަށެވެ. އޭގެ ތެރޭހައި މިސައިލް އާއި ޑްރޯން ދޫކުރާ ތަންތަނާއި، ކޮމާންޑް އެންޑް ކޮންޓްރޯލް ތަންތަނާއި، އިންޓެލިޖެންސް އަދި ސާވެއިލެންސް އަދި ރިކޮނިސެންސް ނޯޑްތައް ހިމެނޭ ކަމަށް ބަޔާނުގައި ބުނެފައިވެ އެވެ.

އެމެރިކާގެ ނޭވީގެ ތިން ޑިސްޓްރޯޔަރު ކަމަށްވާ ޓްރަކްސްޓަން، ޕެރާލްޓް އަދި މޭސަން ހޮރްމޫޒް ކަނޑު އޮޅިން، އޮމާން ކަނޑަށް ދަތުރު ކުރަމުން ދިޔަ ވަގުތު އީރާންގެ ގިނަ މިސައިލްތަކާއި ޑްރޯންތަކާއި ކުދި ބޯޓު ތަކުން ހަމަލާ އަމާޒު ކުރި ކަމަށް އެމެރިކާގެ އަސްކަރިއްޔާ އިން ބުނެފައިވެ އެވެ. 

އީރާން އިން ދިން ހަމަލާ ތަކުގައި އެމެރިކާގެ ސިފައިންގެ އެއްވެސް އާލާތަކަށް ގެއްލުމެއް ލިބިފައި ނުވާ ކަމަށް ވެސް، އެމެރިކާ އަސްކަރިއްޔާ އިން ބުނެފައިވެ އެވެ. އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ ހަނގުރާމަ އިތުރަށް ފުޅާ ވުމަކީ އެމީހުން ބޭނުންވާ ގޮތެއް ނޫން ކަމަށެވެ. ނަމަވެސް، އެމެރިކާ ސިފައިން ރައްކާތެރި ކުރުމަށް ތައްޔާރަށް ތިބި ކަމަށް ވެސް ބުނެފައިވެ އެވެ. 

މި ހަމަލާ ތަކުގެ ސަބަބުން، މިދިޔަ އޭޕްރީލް މަހު އެކުލަވާލާފައިވާ ހަނގުރާމަ މެދު ކަނޑާލުމުގެ އެއްބަސްވުމަށް ކުރާނީ ކޮން އަަސަރު ތަކެއް ކަމެއް ސާފެއް ނުވެ އެވެ. ނަމަވެސް، އެމެރިކާގެ ސެންޓްކޮމް އިން ބުނީ، މި ހަމަލާ ތަކަކީ އަމިއްލަ ނަފްސު ދިފާއު ކުރުމުގެ ގޮތުން ދީފައިވާ ހަމަލާ ތަކެއް ކަމަށެވެ.