އެމެރިކާގެ ނައިބު ރައީސް އަށް ޤަތަރުގެ ބޮޑު ވަޒީރު ގޮވާލެއްވީ، އީރާން އާއެކު މަޝްވަރާތައް ފެށުމަށް

އީރާން އާއެކު އައު އެއްބަސްވުމެއް ޤާއިމު ކުރުމަށްޓަކައި ޑިޕްލޮމެޓިކް މަޝްވަރާތައް އަލުން ފެށުމަށް، ޤަތަރުގެ ބޮޑު ވަޒީރު ޝައިޙް މުޙައްމަދު ބިން ޢަބްދުއް ރަޙުމާން އަލް ޘާނީ، އެމެރިކާގެ ނައިބު ރައީސް ޖޭޑީ ވޭންސް އަށް ގޮވާލައްވައިފި އެވެ. 

ޤަތަރުގެ ބޮޑު ވަޒީރު އަދި ފޮރިން މިނިސްޓަރު މިހެން ގޮވާލައްވާފައި ވަނީ، އެމެރިކާގެ ނައިބު ރައީސް ވޭންސް އާއެކު ހުކުރު ދުވަހު ރިޔާސީ ގަނޑުވަރު ވައިޓް ހައުސްގައި ބޭއްވެވި ބައްދަލުވުމުގަ އެވެ. މި ބައްދަލުވުމުގައި ދެ ބޭފުޅުން ވެސް ވަނީ، ސަރަހައްދީ ހަމަޖެހުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވައިފަ އެވެ. 

މި ބައްދަލުވުވުމުގައި ދެ ބޭފުޅުން ވެސް ވަނީ، މިހާރު އޮތް ހަމަ ޖެހުމާއި ނުތަނަވަސްކަމަށް ދާއިމީ ސުލްޙައެއް ގެނައުމަށް ޕާކިސްތާން އިން ކުރަމުން އަންނަ މަސައްކަތްތަކާ ބެހޭ ގޮތުން ވެސް ވާހަކަ ދައްކަވައިފަ އެވެ. ޤަތަރުގެ ފޮރިން މިނިސްޓްރީ އިން އެކްސްގައި ހާމަ ކޮށްފައިވާ ގޮތުގައި، ސަރަހައްދީ މައްސަލަ ތަކުގެ އަސްލު ސަބަބުތައް ދެނެގަނެ، ސުލްޙަވެރި މަގުންނާއި މަޝްވަރާގެ ތެރެއިން އެކަންކަމަށް ޙައްލު ހޯދުމަށް ހުރިހާ ފަރާތް ތަކަކުން ވެސް މެދުވެރިއެއްގެ ދައުރު އަދާ ކުރާ ފަރާތްތަކާ އެކު މަސައްކަތް ކުރުމުގެ މުހިންމުކަން ބޮޑު ވަޒީރު ފާހަގަ ކުރެއްވި އެވެ. 

މީގެ އިތުރުން މުޅި ސަރަހައްދަށް ދާއިމީ ސުލްޙަ ގެނެވޭނެ ފަދަ ފުރިހަމަ އެއްބަސްވުމަކަށް ވާސިލުވުމަށްޓަކައި މިހާރު ކުރިއަށްދާ މެދުވެރިވުމުގެ މަސައްކަތްތަކަށް އެއްބާރުލުން ދިނުމަށް ޤަތަރުގެ ބޮޑު ވަޒީރު ބާރުއެޅުއްވި އެވެ. ޤަތަރަކީ އެމެރިކާގެ މުހިންމު ބައިވެރިއެއްގެ ގޮތުގައި އޮވެ، އީރާން އާއެކު މުއާމަލާތް ކުރުމާއި، ޣައްޒާގައި އިޒްރޭލް އިން ހިންގަމުން އަންނަ ހަނގުރާމަ ހުއްޓުވުމަށް ހަމާސް އާއެކު މަޝްވަރާ ކުރުމުގައި މުހިންމު ދައުރެއް އަދާ ކުރާ ޤައުމެކެވެ. 

މި ހަނގުރާމައިގެ ތެރޭގައި އީރާން އިން ވަނީ، ޤަތަރުގައި ހުރި އެމެރިކާގެ ބައެއް ބޭސް ތަކަަށް ހަމަލާ ދީފަ އެވެ.