ހޮރްމޫޒް ކަނޑު އޮޅީގެ މައްސަަލައިގައި ފްރާންސްގެ ރައީސް މެކްރޮން އާއި އީރާންގެ ރައީސް ޕެޒެޝްކިއާން މަޝްވަރާ ކުރައްވައިފި

ހޮރްމޫޒް ކަނޑު އޮޅީގެ މައްސަލައިގައި އީރާންގެ ރައީސް މަސްއޫދު ޕެޒެޝްކިއާންއާ ވާހަކަ ދައްކަވައި މަޝްވަރާ ކުރައްވާފައިވާ ކަމަށް، ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.

ބުދަ ދުވަހު މެކްރޮން ވިދާޅުވީ، ޕެޒެޝްކިއާން އާއެކު މަޝްވަރާ ތަކެއް ބާއްވާފައިވާ ކަަމަށާއި، އެ މަޝްވަރާ ތަކުގައި ހޮރްމޫޒް ކަނޑު އޮޅީގައި ކުރިއަށްދާ ދަތުރުފަތުރުގެ ކަންކަމާއި، މިނިވަން ކަމާ އެކު ދަތުރު ކުރުމުގެ މުހިންމު ކަމުގެ މައްޗަށް ވާހަކަ ދައްކަވާފައިވާ ކަމަށެވެ. 

މެކްރޮން އިތުރަށް ވިދާޅުވީ، ހޮރްމޫޒް ކަނޑު އޮޅީގެ ސަލާމަތާއި، ދަތުރުފަތުރަށް މަގު ފަހި ކުރުމަށް، ބައިނަލްއަޤުވާމީ މިޝަނެއް ޤާއިމު ކުރުމަށް ފްރާންސް އާއި އިނގިރޭސިިވިލާތް ގުޅިން ކުރަމުން އަންނަ މަސައްކަތް ބައްލަވައި، އެކަމާ މެދު ވިސްނެވުމަށް އީރާންގެ ރައީސް އަށް އިލްތިމާސް ކުރެއްވި ކަމަށެވެ. 

އެކްސްގައި ކުރެއްވި ޕޯސްޓުގައި މެކްރޮން ވަނީ، މި ފުރުސަތުގެ ބޭނުން ހިފުމަށް އީރާންގެ ރައީސް ޕެޒެޝްކިއާން އަށް ދައުވަތު ދެއްވައިފަ އެވެ. އަދި އެ މައުޟޫގައި އެމެރިކާގެ ރައީސް ޑޮނަލްޑް ޓްރަމްޕްއާ ވާހަކަ ދައްކަވައި، މަޝްވަރާ ކުރެއްވުމަށް ވިސްނަވާ ކަމަށް ވެސް މެކްރޮން ވިދާޅުވި އެވެ. 

އީރާންގެ ސަރުކާރުގެ މީޑިއާ އިން ރިޕޯޓު ކޮށްފައިވާ ގޮތުގައި، މި ފޯނު ކޯލުގައި ޕެޒެޝްކިއާން ވަނީ ބައިނަލްއަޤުވާމީ ޤާނޫނު ތަކުގެ ދަށުން އީރާންގެ ރައްޔިތުންގެ ހައްގުތައް ހާސިލު ކުރުމަށާއި، ހަނގުރާމަ ނިންމުމަށް ޑިޕްލޮމެޓިކް ގޮތުން ސީރިއަސްކޮށް މަސައްކަތް ކުރަން އީރާން ތައްޔާރަށް އޮތް ކަމަށް ފާހަގަ ކުރައްވައިފަ އެވެ. 

އީރާންގެ ސަރުކާރުގެ މީޑިއާ އިން ރިޕޯޓު ކޮށްފައިވާ ގޮތުގައި، އީރާންގެ ރައީސް ވަނީ އެ ޤައުމުން އެމެރިކާ އަށް އިތުބާރު ނުކުރާ ކަމަށް ފާހަގަ ކުރައްވައިފަ އެވެ. އަދި އެކަމުގެ ސަަބަބެއްގެ ގޮތުގައި ފާހަގަ ކުރައްވާފައި ވަނީ އެމެރިކާ އިން ހިންގާ ޢަދާވާތްތެރި އަމަލު ތަކެވެ. އެންމެ ފަހުން ޙަމަލާދިން ދެ ފަހަރު ވެސް، އެމެރިކާ އިން އީރާން އަށް ހަމަލާ ދީފައި ވަނީ މަޝްވަރާތައް ކުރިއަށް ދަނިކޮށެވެ. 

ހޮރްމޫޒް ކަނޑު އޮޅި އޮންނަނީ ދުނިޔޭގެ ތެލުގެ ވިޔަފާރީގެ އެންމެ މުހިންމު މަގެއްގެ ގޮތުގަ އެވެ. މި ސަރަހައްދުގައި ދެކޮޅުވެރިކަން އިތުރު ވުމުން، ދުނިޔޭގެ ތެލުގެ ބާޒާރަށް ބޮޑެތި އަަސަރު ތަކެއް އަންނަނީ ކުރަމުންނެވެ.