ޒަހަމްގައި މަލަން އަޅާނީ އެންގީމަތާ އެވެ.

މި ސަރުކާރު ވެރިކަމަށް އައީ ކުރީގެ ރައީސް އަބްދުﷲ ޔާމީންގެ ފޮޓޯ ފުޅާއި އެމަނިކުފާނުގެ ނަންފުޅު ޖަހާފައި ހުރި ހުސް ގޮނޑިއެއް ދައްކައިގެންނެވެ. އެއިރު އެއީ ޒައީމެވެ. އެއިރު އެއީ އެފަދަ ދެވަނައެއް ނެތް ބޭފުޅެކެވެ. ނަމަވެސް ވެރިކަން ލިބުނު ހިސާބުން އެމަނިކުފާނު ބާކީކޮށްލީ އެވެ. މިއީ ހަގީގަތެވެ. މި ވާހަކަ މާ ދިގުކޮށް ނުދެއްކި ނަމަވެސް އެކަން ދިވެހި ހުރިހާ ރައްޔިތުން ދަންނާނެ އެވެ. 

ރައީސް ޔާމީން މި ސަރުކާރާއި ދެކޮޅުވި ސަބަބު ވެސް މާ ތަފްސީލުކޮށް ކިޔައިދޭން ޖެހެނެހެން ހިއެއް ނުވެ އެވެ. ދެން ފެނުނީ އެމަނިކުފާނަށް މަލާމާތާއި ފުރައްސާރަ ކުރަން ފެށިތަނެވެ. ރަންގަނޑެއް ގުއިގަނޑަކަށް ވެއްޖެ އެވެ. މި ސަރުކާރުގެ ވެރިން އެމަނިކުފާނަށް ކުރުދޮށިން ދޭން ފެށީ އެވެ. ނަމަވެސް އެކަމުގެ ސަބަބުން މި ސަރުކާރަށް ލިބުނު ގެއްލުން ވަކި ކުޑައެއް ނޫނެވެ. ދެން މި ޖެހުނީ ޑެމޭޖް ކޮންޓްރޯލް ކުރާށެވެ. 

ރައީސް ޑރ. މުހައްމަދު މުއިއްޒުގެ އިރުޝާދުފުޅާ ލަފާފުޅުގެ މަތިން ކަންކަން ކުރައްވާ ވެރިން ތިއްބެވި ސަރުކާރުން މުޅި މަންޒަރު ބަދަލުކުރަން ފަށައިފި އެވެ. ޒަހަމްތަކުގައި މަލަން އަޅާ ޒަހަމްތައް ފޮރުވަން ފަށައިފި އެވެ. ޖެހިތަނުގައި ރިހުން ފިލާވަރަށް ފިރުމަން ވެސް ފަށައިފި އެވެ. ހަމަ ޔަގީނުންވެސް އިރުޝާދުފުޅާ ލަފާފުޅުގެ މަތިން ނޫނީ މިފަދަ ކަމެއް ނުވާނެ އެވެ. ތުންތުން މަތިން އަޑުއިވޭ ވާހަކައެއް އެބައޮތެވެ. އެއީ ގަނޑުވަރުން ނެރުނު ރިޔާސީ އެންގެވުމެއްގެ ވާހަކަ އެވެ. އެއީ ޑެމޭޖް ކޮންޓްރޯލް ކުރަން ރައީސް ޔާމީނަށް ހުށާމަދު ކުރުމެވެ. 

މިކަން ހަވާލުކުރެވުނީ ވެސް ވަރަށް އެކަމަށް އެކަށޭނެ ބޭފުޅަކާއެވެ. އިކޮނަމިކް މިނިސްޓަރު މުހައްމަދު ސައީދާ އެވެެ. މިނިސްޓަރު ސައީދަކީ ހުށާމަދު ކުރަން އެފަދަ ދެވަނައެއް ނެތް ބޭފުޅެކެވެ. އެކަން ދިވެހި ރައްޔިތުންނަށް އެނގޭނެ އެވެ. މީގެ ކުރިން ވެސް ރައީސް ޔާމީން އަކީ ރަތް ފިނިފެންމަލަކަށް ހެއްދެވި އެވެ. އެހެންވީމާ ސައީދު ނޫން ދެން  އިތުރު ފަރާތެއް މިކަން ކުރަން އެހާ އައުލާކަންވެސް ބޮޑެއް ނޫނެވެ. 

އިހައްދުވަހަކު ބޭއްވި ނޫސްވެރިންގެ ބައްދަލުމުގައި މިނިސްޓަރު ސައީދު ވިދާޅުވި އަޑުއެހީމެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ، ކުރީގެ ރައީސް އަބްދުﷲ ޔާމީނު ދެކެ އެންމެ ލޯބިވާ އެންމެ އަޅާލަން ބޭނުންވާ ބޭފުޅާ ކަމަށެވެ. އެވާހަކަ އަޑު އިވިފައި ދެވަނަ ފަހަރަށް އޮޅަ އޮޅައިގެން ވެސް އެވާހަކަ އަޑު އެހީމެވެ. ޔަގީން ކުރާށެވެ. 

ހަމަވީ އެހެންވެ. ރައީސް ޔާމީނަށް ހުށާމަދު ކުރީ އެވެ. ސީދާ ލަފާފުޅާ އިރުޝާދު ފުޅުގެ ދަށުން ކަން ކަށަވަރެވެ. ފުރު ވިސްނުންފުޅާއި ޑެމޭޖް ކޮންޓްރޯލް ކުރާށެވެ. 

މިސުވާލަށް މިނިސްޓަރު ސައީދު ވިދާޅުވީ، ސިނަމާލެ ބްރިޖު މަޝްރޫއުގެ އެންމެ ބޮޑު ކްރެޑިޓެއް ލިބޭނީ ޔާމިނަށް ކަމަށާއި، ޔާމީނަށް ފުރިހަމަ އިހުތިރާމް އޮންނާނެ ކަމަށެވެ.

މިނިސްޓަރު ސައީދު ވިދާޅުވީ ރައީސް މުއިއްޒަކީ ޔާމީނުގެ އެންމެ ލޯބިވާ އެންމެ އަޅާލަން ބޭނުންވާ ބޭފުޅާ ކަމަށާއި، ޔާމީން އަރިހުގައި ހުންނަން ބޭނުންފުޅުވާނެ އެއް ބޭފުޅާ ކަމަށެވެ. އަދި ރައީސް މުއިއްޒުގެ ހިތްޕުޅުގައި ޔާމީންނާ ދޭތެރޭގައި އެއްވެސް ކަހަލަ ހިތްބުރަ ކަމެއް ނޯންނާނެ ކަމަށް މިނިސްޓަރު ސައީދު ވިދާޅުވި އެވެ. 

މީގެ އިތުރުން މިނިސްޓަރު ސައީދު ވިދާޅުވީ ޔާމީންގެ އަރިހުގައި އުޅުއްވާ ދެތިން ބޭފުޅަކު އުޅުއްވަނީ ވަރަށް ހުތުރު ކޮށް ކަމަށާއި، އެބޭފުޅުން އެ ދައްކަވާ ވާހަކަތައް ވެސް ޔާމީން ގަބޫލުފުޅު ނުކުރައްވާނެ ކަމަށެވެ. 

ހަމަ ހިތަށް އެރި އެވެ. މިއީ ހަމަ ސައީދު އަމިއްލަ އިހްތިޔާރުގައި ދައްކަވާ ވާހަކަ ހެއްޔެވެ. ނުވަތަ މިއީ މަޖުބޫރީއެއް ހެއްޔެވެ. ކޮނުނު ކޮނުނުހެން ފަސް ގިނަވާނެއޭ ބުނާ އުސޫލުން މިކަންވީ ހަމަ ހީކުރި ގޮތަށެވެ. ސައީދާއި މި ސަރުކާރުގެ ވެރިން ވިދާޅުވާ ރައީސް ޔާމީންގެ ސިޓިންގ ރޫމް ޖަލްސާއިންނާއި މަގުމަތީގައި 10 މީހުން ނުކުމެ ހިންގާ ހަރަކާތުން ސަރުކާރަށް ބޮޑެތި ގެއްލުން ވަނީ އެވެ. ކުރަން މިއުޅޭ ކަމަކީ ރައީސް ޔާމީނަށް ހުށާމަދުކޮށް ޑެމޭޖް ކޮންޓްރޯލް ކުރުމެވެ. ރިޔާސީ ގަނޑުވަރުގެ އެންމެ މަތީ އެންގެވުމަށެވެ. 

ނަމަވެސް ސުވާލަކީ ޒަހަމުގައި މަލަން އަޅައިގެން ޒަހަމް ފޮރުވިދާނެ ހެއްޔެވެ.