އެމެރިކާ އާއި އީރާން އިން ސުލްޙައިގެ އެއްބަސްވުމެއްގައި ސޮއި ކުރުން ވަރަށް ގާތް ކަމަށް ބުނެފި

އެމެރިކާ އާއި އީރާންއާ ދެމެދު އުފެދިފައިވާ ހަނގުރާމައިގެ ޙާލަތު ނިމުމަކަށް ގެނައުމަށްޓަކައި، އެއް ޞަފްހާގެ މައްޗަށް އެކުލެވޭ ޚާއްސަ މެމޯއެއްގައި ސޮއި ކުރުމާ ގާތަށް ދެ ޤައުމުން ޖެހިލާފައިވާ ކަމަށް ރިޕޯޓުތައް ބުނެފި އެވެ.

މިކަން ހާމަ ކޮށްފައި ވަނީ ޞުލްޙައިގެ މަސައްކަތުގައި އަމަލީ ގޮތުން ބައިވެރިވާ ޕާކިސްތާންގެ މަސްދަރަކާ ހަވާލާދީ ރޮއިޓާސް ނިއުސް އެޖެންސީ އިންނެވެ. 

ސުލްޙަ ޤާއިމު ކުރުމުގެ މަސައްކަތުގައި އިސްކޮށް އުޅުއްވާ ޕާކިސްތާންގެ މަސްދަރަކުން ރޮއިޓާސް އަށް މައުލޫމާތު ދެމުން ބުނެފައި ވަނީ، ހަނގުރާމަ ހުއްޓާލުމުގެ އެއްބަސްވުމަކަށް އައުމަށް ކުރެވޭ މަސައްކަތްތައް ވަރަށް އަވަހަށް ނިމުމަކަށް އަންނާނެ ކަމަށެވެ. އަދި ދެ ޤައުމުގެ ދެ މެދުގައި އޮތް ނުތަނަވަސްކަން ކުޑަކޮށް، ސުލްޙަ ޤާއިމު ކުރުމަށް ބޭނުންވާ މުހިންމު ކަންކަމާ މެދު މިހާރު ވަނީ ވަަރަށް ބޮޑަށް އެއްބަސްވުމަކަށް އާދެވިފައި ކަމަށް ވެސް އެ މަސްދަރުން ވަނީ ކަށަވަރު ކޮށްދީފަ އެވެ. 

މި މައުލޫމާތަކީ މީގެ ކުރިން އެކްސިއޯސް ނިއުސް ވެބްސައިޓުން ޝާއިއު ކޮށްފައިވާ ރިޕޯޓަކަށް ބާރުދޭ ވާހަކަ ތަކެކެވެ. އެކްސިއޯސް އިން ކުރިން ރިޕޯޓު ކޮށްފައިވާ ގޮތުގައި، އެމެރިކާ އާއި އީރާން އިން ދަނީ ސަރަހައްދީ ހަމަޖެހުން ޤާއިމު ކުރުމަށްޓަކައި ކުރި އަދި ސީދާ އެއްބަސްވުމަކަށް އައުމަށް މަޝްވަރާ ކުރަމުންނެވެ. 

ޕާކިސްތާންގެ މަސްދަރުން އިތުރަށް ބުނެފައި ވަނީ، މިހާރު ކުރިއަށްދާ މަޝްވަރާ ތަކުގެ ތެރެއިން ދެ ޤައުމުން ވެސް ބޭނުން ވަނީ ދިގު ލައިގެންދާ ހަނގުރާމަ އަކަށް ދިޔުމުގެ ބަދަލުގައި، އަވަސް ޙައްލެއް ހޯދުމަށް ކަމަށެވެ. މިގޮތުން އެކުލަވާލެވޭ އެއް ޞަފްޙާގެ މެމޯ އަކީ، ދެ ޤައުމުގެ ދެ މެދުގައި އޮތް ދެބަސްވުންތައް ނިމުމަކަށް ގެނައުމަށް އެޅޭ އެންމެ މުހިންމު ފިޔަވަޅަށް ވެގެންދާނެ ކަމަށް ބެލެވެ އެވެ. 

އެމެރިކާ އާއި އީރާނުގެ ގުޅުން ފާއިތުވި ދުވަސް ތަކުގައި ވަރަށް ބޮޑަށް ގޯސްވެފައިވާ އިރު، މިފަދަ އެއްބަސްވުމަކަށް އާދެވުމަކީ މެދު އިރުމަތީގެ މަސްރަހަށް ލިބޭނެ ވަރަށް ބޮޑު ލުޔެއް ކަމަށް ސިޔާސީ މާހިރުން ދެކެ އެވެ. ނަމަވެސް މި މެމޯގައި ހިމެނޭ ތަފްސީލީ ކަންކަމާއި، އެއްބަސްވުން އިއުލާނު ކުރާނެ ސީދާ ތާރީޚެއް އަދި ރަސްމީ ފަރާތް ތަކުން ހާމަކޮށްފައި ނުވެ އެވެ. 

މި އެއްބަސްވުމާ ގުޅޭ ގޮތުން ޕާކިސްތާން އިން މެދުވެރިއެއްގެ ދައުރު އަދާ ކުރަމުންދާ އިރު، މިއީ ސަރަހައްދީ ސުލްހައަށްޓަކައި ކުރެވޭ ވަރަށް އުންމީދީ މަސައްކަތެއްގެ ގޮތުގައި ވަނީ ފާހަގަ ކުރެވިފައި އެވެ. މަޝްވަރާތައް މިހާރު ގޮސްފައިވާ ހިސާބަށް ބަލާއިރު، ކުރިއަށް އޮތް ކުޑަ ދުވަސްކޮޅެއްގެ ތެރޭގައި މިކަމުގެ ފަހުގެ ނިންމުންތައް ފެނިގެންދާނެ ކަމަށް ބެލެވެ އެވެ.