އީރާން އާއެކު އެއްބަސްވުމަކަށް އައުމުގެ ފުރުސަތު ބޮޑު، ނޫން ނަމަ ހަމަލާ ދޭނަން: ޓްރަމްޕް

އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ކުރަމުން އަންނަ މަސައްކަތުގައި، އެއްބަސްވުމަކަށް އައުމުގެ ފުރުސަތު ވަރަށް ބޮޑު ކަމަށާއި، ނޫން ނަމަ އީރާން އަށް އަލުން ހަމަލާތައް ދޭން ފަށާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ބުދަ ދުވަހު ޓްރަމްޕް ވިދާޅުވީ، އީރާން އިން އެއްބަސްވުމަކަށް އަތުވެއްޖެ ނަމަ، އަދި ހުށަހަޅާފައިވާ ކަންކަމަށް އެއްބަސްވެއްޖެ ނަމަ ހަނގުރާމަ ނިމޭނެ ކަމަށެވެ. ނަމަވެސް، އެކަން ނުކުރެވިއްޖެ ނަމަ އަލުން ބޮމުގެ ހަމަލާތައް ފެށޭނެ ކަމުގައި ވެސް ޓްރަމްޕް ވިދާޅުވި އެވެ. 

ޓްރަމްޕް މިހެން ވިދާޅުވެފައި ވީ ނަމަވެސް، އެމެރިކާ އިން ހުށަހަޅާފައިވާ ކަންކަމަށް އީރާން އިން ވަކި ޖަވާބެއް ދީފައި ނުވެ އެވެ. އީރާން އިން ބުނެފައި ވަނީ އެމެރިކާގެ ޖަވާބު އެ ޤައުމުން ދިރާސާ ކުރަމުން އަންނަ ކަމަށެވެ. މަޝްވަރާ ތަކުގައި ބައިވެރިވާ އީރާންގެ މަންދޫބުން ވަނީ، އެމެރިކާ އިން މަޝްވަރާގެ ވާހަކަތައް ލަސް ކުރަމުން އަންނަ ކަމަށް ތުހުމަތު ކޮށްފަ އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ފާއިތުވި 24 ގަޑިއިރުގެ ތެރޭގައި ވަރަށް ރަނގަޅު ވާހަކަ ތަކެއް ދެކެވިފައިވާ ކަމަށެވެ. އަދި ވަރަށް އަވަހަށް އެއްބަސްވުން ފުރިހަމަ ކުރެވިދާނެ ކަމަށް ޤަބޫލު ކުރައްވާ ކަމަށް ވެސް ޓްރަމްޕް ވިދާޅުވި އެވެ.

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އީރާން އިން އަދިވެސް ގެންދަނީ އެމެރިކާގެ ހުށަހެޅުން ދިރާސާ ކުރަމުން ކަމަށެވެ. އަދި އީރާން އިން އެކަން ރަނގަޅަށް ބަލައި، އެ ޤައުމުގެ ރައުޔު ފައިނަލް ކުރުމަށް ފަހު ޕާކިސްތާންއާ ހިއްސާ ކުރާނެ ކަމަށް ވެސް ވިދާޅުވެފައިވެ އެވެ. ޕާކިސްތާން އަކީ މި މަޝްވަރާ ތަކުގައި މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. 

ސުލްޙައި މަޝްވަރާ ތަކުގައި އަމަލީ ގޮތުން ބައިވެރިވާ ޕާކިސްތާންގެ އޮފިޝަލުންނާ ހަވާލާދީ ބުދަ ދުވަހު ރޮއިޓާސް އިން ވެސް ވަނީ، ވަރަށް އަވަހަށް ހަނގުރާމަ ހުއްޓާލުމުގެ އެއްބަސްވުމެެއްގައި އެމެރިކާ އާއި އީރާން އިން ސޮއި ކޮށްފާނެ ކަމަށް ބުނެފަ އެވެ.