އިޒްރޭލް އިން ދިން ހަމަލާ ތަކެއްގައި ހަމާސްގެ ލީޑަރުގެ ދަރިކަލުން ޒަޚަމުވެއްޖެ

އިޒްރޭލް އިން ޣައްޒާ ސިޓީ އަށް ދިން ވަރުގަދަ ހަމަލާ ތަކެއްގައި ހަމާސްގެ ސިޔާސީ ގޮފީގެ އިސް ވެރިޔާ ޚަލީލް އަލް ޙައްޔާގެ ދަރިކަލުން ޒަޚަމުވެފައިވާ ކަމަށް އޭނާ ކަށަވަރު ކޮށްދެއްވައިފި އެވެ. 

އަލް ޖަޒީރާ އަށް ދެއްވި ބަސްދީގަތުމެއްގައި ޚަލީލް އަލް ޙައްޔާ ވިދާޅުވީ، އިޒްރޭލް އިން ދިން މި ހަމަލާ އަމާޒު ކޮށްފައި ވަނީ ޣައްޒާ ސިޓީގެ ދަރަޖް އަވަށަށެވެ. 

ޣައްޒާގެ ދަރަޖް އަވަށަށް އިޒްރޭލް އިން ދިން ވައިގެ ހަމަލާގައި އެކަކު ޝަހީދުވެފައިވާއިރު، އިތުރު 10 މީހަކަށް އެކިވަރުގެ އަނިޔާތައް ލިބިފައިވާ ކަމަށް ވަނީ ރިޕޯޓު ކޮށްފަ އެވެ. މި ހަމަލާގައި ޒަޚަމުވެފައިވާ މީހުންގެ ތެރޭގައި ޚަލީލް އަލް ޙައްޔާގެ ދަރިކަލުން ހިމެނޭ ކަމަށް ވެސް ރިޕޯޓު ތަކުގައި އޭރު ބުނެފައިވެ އެވެ. ފަހުން އޭނާ ވަނީ އަލް ޖަޒީރާ އަށް އެކަން ކަށަވަރު ކޮށްދީފަ އެވެ. 

މި ހަމަލާއާ ގުޅޭ ގޮތުން ވާހަކަ ދައްކަވަމުން ޚަލީލް އަލް ޙައްޔާ ވިދާޅުވީ، މިއީ އިޒްރޭލް އިން ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ލާާއިންސާނީ އުދުވާނުގެ އިތުރު ބޮޅެއް ކަމަށެވެ. އަދި މިއީ މިދިޔަ އަހަރުގެ ސެޕްޓެމްބަރު މަހުގެ ނުވަ ވަނަ ދުވަހު، ޤަތަރުގެ ދޯހާގައި މަޝްވަރާ ތަކަށް ގޮސް ތިބި ފަލަސްޠީނުގެ ވަފުދަށް އަމާޒުކޮށް ދިން ހަމަލާ ތަކުގެ އިތުރު ހަމަލާއެއް ކަމަށް ވެސް އޭނާ ސިފަ ކުރެއްވި އެވެ. 

ޚަލީލް އަލް ޙައްޔާ އިތުރަށް ވިދާޅުވީ، އިޒްރޭލް އިން ދެމުންދާ މިފަދަ ހަމަލާ ތަކުގެ ސަބަބުން ފަލަސްޠީނުގެ މިނިވަން ކަމަށް ކުރާ މަސައްކަތަށް އެއްވެސް ބުރުލެއް ނާރާނެ ކަމަށެވެ. އަދި ފަލަސްޠީނުގެ ލީޑަރުން ޝަހީދު ކޮށްލުމަކުން، ނުވަތަ އެ ބޭފުޅުންގެ ދަރިންނަށް ހަމަލާދީ ޒަޚަމުކޮށްލުމަކުން ފަލަސްޠީނުގެ މުޖާހިދުން ޖެހިލުން ނުވާނެ ކަމަށް ވެސް އޭނާ ވިދާޅުވި އެވެ. 

ޣައްޒާގައި އިޒްރޭލް އިން ހިންގަމުންދާ ޤަތުލު އާންމު ހުއްޓުވުމަށް ބައިނަލްއަޤުވާމީ މުޖުތަމައުން މަސައްކަތް ކުރަމުން ގެންދިޔަ ނަމަވެސް، އިޒްރޭލް އިން ދަނީ މީހުން ދިރިއުޅޭ ސަރަހައްދު ތަަކަށް އަމާޒުކޮށް މެދު ކެނޑުމެއް ނެތި ހަމަލާތައް ދެމުންނެވެ. މި ހަމަލާ ތަކުގައި މިހާތަނަށް ފަލަސްޠީނުގެ އެތައް ހާސް ރައްޔިތުންނެއް ވަނީ ޝަހީދުވެފަ އެވެ.