އދ. ތަޖުރިބާކާރުން: ޣައްޒާގައި އިޒްރޭލުން ހިންގި ފަދަ ގަތުލުއާންމާއި ފަނާކުރުންތައް މުޅި ސަރަހައްދަށް ފެތުރުމުގެ ބިރު އެބައޮތް

އިޒްރޭލުން ޣައްޒާގައި ހިންގި ފަދަ ބޮޑެތި ގަތުލުއާންމުތަކާއި ފަނާކުރުންތައް ލުބުނާނާއި އީރާނުގެ އިތުރުން މުޅި ސަރަހައްދަށް ފެތުރިގެން ހިނގައިދާނެ ކަމުގެ ބިރު އެބައޮތް ކަމަށް އދ. ގެ ތަޖުރިބާކާރުން ބުނެފިއެވެ.

ރިޕޯޓްތައް ބުނާގޮތުން، އދ. ގެ އިންސާނީ ހައްގުތަކާ ބެހޭ 12 ތަޖުރިބާކާރަކު ވަނީ އެމެރިކާ އާއި އިޒްރޭލުން އީރާނާއި ލުބުނާނަށް ދެމުންދާ ހަމަލާތައް ކުށްވެރިކޮށްފައެވެ. އެ ބޭފުޅުން ކަންބޮޑުވުން ފާޅުކުރައްވާފައިވަނީ ޣައްޒާއިން ފެންނަމުންދާ ފަދަ ބޮޑެތި ފަނާކުރުންތައް ސަރަހައްދުގެ އެހެން ގައުމުތަކަށް ފެތުރިގެން ދިއުމުގެ ފުރުސަތު އޮތުމުންނެވެ.

އދ. ގެ ތަޖުރިބާކާރުން ނެރުނު ބަޔާނެއްގައި ވިދާޅުވީ، ޣައްޒާގައި ހިންގަމުންދާ ފަދަ ފުޅާދާއިރާއެއްގެ ހަލާކުކުރުންތަކާއި އަނިޔާވެރިކަން، އީރާނާއި ލުބުނާނުގެ އިތުރުން ސަރަހައްދުގެ އެހެން ގައުމުތަކަށް ފެތުރިގެންދާނެ ކަމުގެ ބިރު އޮތުމުން އެކަމާ އިންތިހާއަށް ކަންބޮޑުވާ ކަމަށެވެ.

ޚާއްސަކޮށް ލުބުނާނުގެ ހާލަތާ މެދު އެ ބޭފުޅުން ކަންބޮޑުވުން ފާޅުކުރެއްވިއެވެ. އިޒްރޭލުން ވަކި ހަމަ އެއް އުސޫލެއް ނެތް ގޮތަށް ކުރިއަށް ގެންދާ ބޮން އެޅުމުގެ ހަމަލާތަކާ ގުޅިގެން މިހާތަނަށް 700،000 އަށްވުރެ ގިނަ މީހުން ވަނީ މަޖުބޫރުވެގެން ގެދޮރު ދޫކޮށް ގޮސްފައެވެ. ތަޖުރިބާކާރުން ވިދާޅުވި ގޮތުގައި އިޒްރޭލުގެ މި އަމަލަކީ ހަނގުރާމައިގެ އިތުރު ކުށެކެވެ.

މީގެ އިތުރުން، ލުބުނާނުގެ ދެކުނާއި ބެއިރޫތުގެ ދެކުނު ސަރަހައްދުތަކުގައި ދިރިއުޅޭ ރައްޔިތުން ގެދޮރު ދޫކޮށް ދިއުމަށް އިޒްރޭލުން ނެރެފައިވާ އަމުރުތަކަކީ ކަނޑައެޅިގެން ބައިނަލްއަގުވާމީ ގާނޫނުތަކާ ޚިލާފު އަމަލުތަކެއް ކަމަށްވެސް އެ ބޭފުޅުން ފާހަގަކުރެއްވިއެވެ.

އީރާނުގެ ހާލަތަށް ބަލާއިރު، އެ ގައުމުގެ މަދަރުސާއަކަށް ދިން ހަމަލާއެއްގައި މަދުވެގެން 170 އަންހެން ކުދިން މަރުވި ހާދިސާއާއި، އެސިޑް ވާރޭ ވެހުމަށް މެދުވެރިވި އީރާނުގެ ތެޔޮ ސާފުކުރާ ކާރުޚާނާތަކަށް ދިން ހަމަލާތަކުގެ އިތުރުން، ފެން ސާފުކުރާ ޕްލާންޓަކަށް ދިން ހަމަލާތައް މިނިވަންކަމާއެކު ތަހުގީގު ކުރުމަށް އދ. ގެ ތަޖުރިބާކާރުން ވަނީ ގޮވާލައްވާފައެވެ.